தமிழக சட்டமன்ற தேர்தல் களம் அனல் பறக்க தொடங்கியுள்ள நிலையில், ஆளுங்கட்சியான திமுகவின் தேர்தல் பரப்புரை வியூகம் நடுநிலையாளர்கள் மற்றும் அரசியல் விமர்சகர்கள் மத்தியில் பெரும் விவாதத்தை கிளப்பியுள்ளது. நடக்கவிருப்பது மாநிலத்திற்கான தேர்தல், ஆனால் முதலமைச்சர் ஸ்டாலினின் பேச்சுகள் அனைத்தும் டெல்லி அரசியலை நோக்கியே இருப்பது ஏன் என்ற கேள்வி வலுத்துள்ளது.
தமிழகத்தில் நேரடி போட்டியில் இல்லாத பாரதிய ஜனதா கட்சியை முதன்மை எதிரியாக சித்தரிப்பதும், களத்தில் உண்மையான சவாலாக இருக்கும் அதிமுக மற்றும் புதிய சக்தியான தவெக கேட்கும் ஆட்சியின் குறைகள் குறித்த கேள்விகளுக்கு மௌனம் காப்பதும் ஒரு தந்திரமான அரசியல் நகர்வாகவே பார்க்கப்படுகிறது.
முதலமைச்சர் ஸ்டாலின் தனது மேடை பேச்சுகளில் பெரும்பாலும் ‘ஆரிய-திராவிட போர்’, ‘மாநில உரிமைகள்’, ‘டெல்லி ஆதிக்கம்’ போன்ற தேசிய அளவிலான விவகாரங்களுக்கே அதிக முக்கியத்துவம் அளிக்கிறார். உண்மையில் தமிழக சட்டமன்ற தேர்தலில் மக்கள் எதிர்பார்ப்பது கடந்த ஐந்து ஆண்டுகால ஆட்சியின் சாதனைகள், நிறைவேற்றப்படாத வாக்குறுதிகள், விலைவாசி உயர்வு மற்றும் சட்டம் ஒழுங்கு போன்ற உள்ளூர் பிரச்சினைகள் குறித்த பதில்களைத்தான். ஆனால், இவற்றை விடுத்து தேசிய அரசியலை மட்டும் முன்னிறுத்துவது, ஆட்சியின் குறைகளை மறைப்பதற்கான ஒரு தற்காப்பு வியூகமா என்ற சந்தேகம் நடுநிலையாளர்கள் மத்தியில் ஆழமாக எழுந்துள்ளது.
குறிப்பாக, தமிழகத்தில் பலமான எதிர்க்கட்சியாக இருக்கும் அதிமுகவை விமர்சிக்காமல் தவிர்ப்பது அரசியல் வட்டாரத்தில் வியப்பை ஏற்படுத்தியுள்ளது. அதேபோல், நடிகர் விஜய் தொடங்கியுள்ள தமிழக வெற்றி கழகம் இளைஞர்கள் மத்தியில் பெரிய தாக்கத்தை ஏற்படுத்தி வரும் சூழலிலும், அதை ஒரு பொருட்டாகவே மதிக்காமல் திமுக கடந்து செல்வது ஏன்?
போட்டியில் இருக்கும் உண்மையான எதிரிகளை விட்டுவிட்டு, தமிழகத்தில் செல்வாக்கு இல்லாத பாஜகவை தாக்கி பேசுவதன் மூலம் ஒரு போலியான அரசியலை திமுக உருவாக்க முயல்கிறதோ என்ற எண்ணம் மேலோங்கியுள்ளது. அதாவது, “எங்களுக்கு மாற்று பாஜகதான்” என்ற பிம்பத்தை உருவாக்குவதன் மூலம் மற்ற மாநில கட்சிகளின் முக்கியத்துவத்தை குறைக்க திமுக திட்டமிடுகிறது.
தமிழ்நாட்டுக்கும் டெல்லிக்கும் இடையிலான போட்டி என்பது ஒரு ‘கண்ணாமூச்சி’ விளையாட்டு போலவே தெரிகிறது. மத்திய அரசு நிதி வழங்கவில்லை, ஆளுநர் தொல்லை கொடுக்கிறார் போன்ற காரணங்களை அடுக்கி, மாநில அரசின் நிர்வாக தோல்விகளை தேசிய அரசியலின் மீது திசைதிருப்புவது எளிதாக இருக்கிறது. ஆனால், மக்கள் அன்றாடம் சந்திக்கும் மின்சாரக் கட்டண உயர்வு, சொத்து வரி அதிகரிப்பு மற்றும் வேலைவாய்ப்பின்மை போன்ற கவலைகளுக்கு டெல்லி அரசியலால் தீர்வு காண முடியாது. உள்ளூர் பிரச்சினைகளுக்கு பதில் சொல்ல வேண்டிய கட்டாயத்தில் இருக்கும் ஒரு முதலமைச்சர், அதை தவிர்த்துவிட்டு தேசிய அரசியலை மட்டும் பேசுவது ஜனநாயக ரீதியாக ஆரோக்கியமானதல்ல.
இறுதியாக, 2026 தேர்தல் என்பது தமிழகத்தின் எதிர்காலத்தை தீர்மானிக்கும் ஒரு களம். இங்கு மக்கள் விரும்புவது ஒரு வலிமையான மாநில அரசுதான். திமுகவின் இந்த தேசிய அரசியல் வியூகம் வரும் தேர்தலிலும் கைகொடுக்குமா அல்லது மக்கள் “உள்ளூர் குறைகளுக்கு என்ன பதில்?” என்று கேள்வி எழுப்புவார்களா என்பதுதான் இப்போதைய எதிர்பார்ப்பு.
சண்டை நடக்குறது ஊருக்குள்ள… ஆனா நீங்க சத்தம் போடுறது டெல்லியில! இது நிர்வாகத் திறமையா? இல்ல உங்க தோல்வியை மறைக்கப் போடுற வேஷமா? தமிழ்நாட்டு மக்களோட வயிற்று வலிக்கு டெல்லியில மருந்து தேடுறதுதான் உங்க திராவிட மாடலா? கண்ணாமூச்சி விளையாட்டை நிறுத்துங்க… மக்கள் கேள்விக்கு நேர்ல பதில் சொல்லுங்க!
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
