தமிழக அரசியல் வரலாற்றில், குறிப்பாக திராவிட முன்னேற்ற கழகத்தின் அண்மைக்கால தேர்தல் தோல்விக்கு பின்னால் இருக்கும் மிக முக்கிய காரணங்களை ஆராய்ந்தால், ஊடகங்களின் மிகைப்படுத்தப்பட்ட விளம்பர அரசியலும், யதார்த்தத்திற்கு புறம்பான வெற்று புகழ்ச்சி தலைப்புகளுமே பிரதானமாக காட்சி அளிக்கின்றன.
“அடித்தார் கில்லி… அதிர்ந்தது டெல்லி”, “ஸ்டாலின் SIXER… அமித்ஷா கிளீன் போல்ட்”, “ஸ்டாலின் எச்சரிக்கை… அமித்ஷா ஷாக்” மற்றும் “எகிறி அடித்த ஸ்டாலின்… டெல்லி காலி” போன்ற மிகைப்படுத்தப்பட்ட ஊடக தலைப்புகள் தான் திமுகவின் தற்போதைய பரிதாபகரமான தோல்விக்கு மிக முக்கிய காரணியாகும். கள யதார்த்தத்தை முற்றிலும் மறைத்து, தங்களின் சொந்த தலைவரைப் பற்றியே ஒரு போலி பிம்பத்தை உருவாக்கியதுடன், அடிமட்ட தொண்டர்களின் உழைப்பை இந்த வெற்று முழக்கங்கள் அடியோடு மழுங்கடித்துவிட்டன என்பதை திமுக தலைமை தற்போது உணர்ந்திருக்கக்கூடும்.
கடந்த ஐந்து ஆண்டுகால திமுக ஆட்சியில், சென்னை போன்ற பெருநகரங்களின் உள்கட்டமைப்பு சீர்கேடுகள், கடுமையான மின்தடைகள், சட்டம் ஒழுங்கு பிரச்சினைகள் மற்றும் அரசு ஊழியர்களின் கோரிக்கைகள் என பொதுமக்கள் மத்தியில் அடுக்கடுக்கான அதிருப்திகள் நிலவி வந்தன. ஆனால், திமுகவின் தகவல் தொழில்நுட்ப அணியும் அவர்களுக்கு சாதகமான சில ஊடகங்களும் மக்களின் இந்த உண்மையான குமுறல்களை காதுகொடுத்துக் கேட்க தயாராக இல்லை. அதற்கு மாறாக, முதல்வர் மு.க.ஸ்டாலின் அவர்கள் டெல்லிக்கு சென்று பிரதமரையோ அல்லது மத்திய அமைச்சர்களையோ சாதாரணமாக சந்தித்து பேசினாலே, அதற்கு “எகிறி அடித்த ஸ்டாலின்… டெல்லி காலி” என்று மேடைக்கு மேடை வெற்று பில்டப் கொடுத்து, மக்களின் கவனத்தை திசைதிருப்பும் மலிவான விளம்பர உத்திகளையே அவர்கள் கையாண்டனர்.
மத்திய அரசை நோக்கி சட்டமன்றத்திலோ அல்லது பொதுக்கூட்டங்களிலோ திமுக தலைமை வழக்கமான அரசியல் விமர்சனங்களை முன்வைக்கும் போது, “அமித்ஷா கிளீன் போல்ட்”, “அமித்ஷா ஷாக்” என்று ஊடகங்கள் உருவாக்கிய கற்பனைக் கதைகள் மக்கள் மத்தியில் மிகப்பெரிய எரிச்சலையே ஏற்படுத்தின. டெல்லியில் இருக்கும் தலைவர்கள் அதிர்ந்துவிட்டார்கள், ஷாக் ஆகிவிட்டார்கள் என்று தமிழகத்தில் உட்கார்ந்து கொண்டு இவர்கள் போடும் போலி புயல்கள், சாமானிய வாக்காளனின் அன்றாட வாழ்வாதார பிரச்சினைகளுக்கு எவ்வித தீர்வையும் தரவில்லை. இந்த அதீத புகழ்ச்சி மற்றும் ‘கில்லி’ தனமான விளம்பரங்கள் யாவும் ஒரு குறிப்பிட்ட வட்டத்திற்குள் மட்டுமே கைதட்டல்களை பெற்றதே தவிர, தேர்தல் களத்தில் வாக்கு எண்ணிக்கையாக மாறவில்லை என்பதை திமுகவினர் இன்னும் புரிந்துகொள்ளாமல் இருப்பதுதான் வேடிக்கை.
இத்தகைய “SIXER” மற்றும் “கிளீன் போல்ட்” கதைகளை தினசரி சமூக வலைத்தளங்களிலும், நாளிதழ்களிலும் பார்த்து பார்த்து திமுகவின் அடிமட்ட தொண்டர்களும், நிர்வாகிகளும் தங்களின் கட்சி மிகவும் பலமாக இருப்பதாக ஒரு தப்பு கணக்குப் போட்டு, நிஜ களப்பணியை முற்றிலுமாக மறந்துவிட்டனர். ‘நம் தலைவர் டெல்லியையே மிரட்டுகிறார், நமக்கு தோல்வியே இல்லை’ என்ற அதீத தற்பெருமையும் எதிர்க்கட்சிகளைக் குறைத்து மதிப்பிட்ட எதேச்சதிகார போக்கும்தான் திமுகவை கோட்டையிலிருந்து எதிர்க்கட்சி வரிசைக்கு தள்ளிவிட்டுள்ளது. மக்கள் தங்களின் அடிப்படை தேவைகளுக்காக வீதிக்கு வந்து போராடும்போது, அதை சரிசெய்யாமல் டெல்லிக்கு சவால் விட்டு கொண்டிருந்தால் என்ன நடக்கும் என்பதற்கான நேரடி சான்றாகவே தற்போதைய தேர்தல் முடிவுகள் அமைந்துள்ளன.
முன்னாள் முதல்வர் கலைஞர் கருணாநிதி அவர்களின் காலத்து அரசியல் என்பது, மக்களின் நாடித்துடிப்பை அறிந்து, களத்தில் நின்று சாமர்த்தியமாக காய்களை நகர்த்துவதாக இருந்தது; அதில் விளம்பரங்களை விட வியூகங்களே அதிகம் இருந்தன. ஆனால், தற்போதைய திமுகவின் அணுகுமுறை என்பது முழுக்க முழுக்க திரைக்கு பின்னால் கார்ப்பரேட் நிறுவனங்களால் எழுதி கொடுக்கப்படும் ஸ்கிரிப்டுகளையும், யூடியூப் தம்ப்நெயில்களையும் மட்டுமே நம்பி நகர்கிறது. ஒரு முதலமைச்சர் மக்களின் முதல்வர் என்பதை பேட்டிகளிலோ, விளம்பரங்களிலோ நிரூபிக்க வேண்டியதில்லை, மக்களின் குறைகளை தீர்க்கும் கோப்புகளில் போடும் கையெழுத்துகளில்தான் நிரூபிக்க வேண்டும் என்ற எளிய யதார்த்தத்தை மாற்று சக்தியாக உருவெடுத்துள்ள புதிய தவெக அரசு தற்போது 15 நாளில் நிரூபித்து காட்டியுள்ளது.
முடிவாக, ஸ்டாலின் அவர்களே! உங்களை சுற்றி நின்று கொண்டு “அடித்தார் கில்லி” என்று ஜால்ரா தட்டிய கூட்டமும், ஊடகங்களின் போலி தலைப்புகளும்தான் உங்களின் இந்த தோல்விக்கு முழு முதற் காரணமாகும். இன்னும் கூட தங்களின் தவறுகளை திருத்தி கொள்ளாமல், வதந்திகளை பரப்புவதிலும், போலி ட்வீட்டுகளை போடுவதிலும் கவனம் செலுத்தும் உங்களின் ஐடி விங் கும்பலால் திமுக இன்னும் பாதாளத்திற்கே செல்லும். இனிமேலாவது இத்தகைய முட்டாள்தனமான, மிகைப்படுத்தப்பட்ட விளம்பர அரசியலை கைவிட்டுவிட்டு, உண்மையான எதிர்க்கட்சியாக மக்கள் பிரச்சினைகளுக்காக குரல் கொடுக்க திமுக முன்வர வேண்டும்; இல்லையெனில், அடுத்தடுத்த தேர்தல்களிலும் இதே போன்றதொரு வரலாற்று பேரழிவை திமுக சந்திப்பது முற்றிலும் தவிர்க்க முடியாததாகிவிடும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
