ஜம்மு காஷ்மீரின் ரேயாசி மாவட்டத்தில் உள்ள சலால் அணையின் மூன்று கதவுகளை இன்று திடீரென இந்தியா திறந்தது. இதுகுறித்த காட்சிகளை ANI செய்தி நிறுவனம் பகிர்ந்துள்ளது. அதில், அணையின் கதவுகள் முழுவதும் திறக்கப்பட்ட நிலையில், அதிலிருந்து மிகுந்த வேகத்தில் நீர் வெளியேறுவதை காண முடிகிறது.
இந்த அணை செனாப் ஆற்றில் அமைந்துள்ளது. இதுவரை இந்தியா–பாகிஸ்தான் இடையிலான சிந்து நதிநீர் ஒப்பந்தம்” அடிப்படையில் கட்டுப்பாட்டுடன் செயல்பட்டது. ஆனால் தற்போது இந்த ஒப்பந்தம் இந்தியாவால் நிறுத்தப்பட்டுள்ளது.
இந்த நடவடிக்கை, சமீபத்தில் பாகிஸ்தானில் பயங்கரவாத முகாம்களுக்கு இந்தியா நடத்திய ‘ஆபரேஷன் சிந்தூர்’ எனும் தாக்குதல்களுக்கு பிந்தைய சூழ்நிலையை தொடர்ந்து எடுக்கப்பட்டுள்ளது.
மே 7 அன்று பாகிஸ்தானின் பயங்கரவாத முகாம்களுக்கு இந்தியா துல்லியமான தாக்குதல்களை நடத்தியது. இந்த தாக்குதல்களில் ரஃபேல் விமானங்கள், ஸ்கால்ப் ஏவுகணைகள், ஹாம்மர் குண்டுகள், மற்றும் ட்ரோன் ஆயுதங்கள் பயன்படுத்தப்பட்டன. முக்கியமாக, இந்த தாக்குதல்கள் அனைத்தும் இந்திய எல்லைக்குள் இருந்தபடியே நடைபெற்றன; பாகிஸ்தான் வான்வெளி மீறப்படவில்லை.
இந்த தாக்குதலுக்கு பின்னர் மே 8 அன்று காலை, ராம்பன் மாவட்டத்தில் உள்ள பக்ளியார் அணையின் இரண்டு கதவுகளும் திறக்கப்பட்டன. இதற்கான காரணம், அந்தப் பகுதியில் கடும் மழையால் நீர்மட்டம் அதிகரித்ததை கட்டுப்படுத்தும் முயற்சி என அதிகாரிகள் தெரிவித்தனர்.
சமீபத்தில், பாகிஸ்தானுக்குச் செல்லும் செனாப் ஆற்றின் நீரை இந்தியா மறித்து விட்டது. இதனால், பாகிஸ்தானில் உள்ள சில பகுதிகளில் ஆற்றின் கீழ்மட்ட நிலப்பரப்புகள் நடக்கக்கூடிய அளவுக்கு வறண்டுவிட்டன.
இந்த நிலையில் பக்ளியார் அணையும், ஜெலமில் அமைந்த கிஷன்கங்கா அணையும் திடீரென திறக்கப்பட்டன. இந்த நடவடிக்கைகள் முக்கியத்துவம் வாய்ந்ததாக பார்க்கப்படுகிறது.
பக்ளியார் அணையைப் பற்றிய விவாதங்கள் இந்தியா–பாகிஸ்தான் இடையே ஏற்கனவே இருந்தன. பாகிஸ்தான், இந்த அணையின் வடிவமைப்பே ஒப்பந்தத்துக்கு எதிரானது எனகூறி, ஒரு காலத்தில் உலக வங்கியிடம் முறைப்பாடும் செய்திருந்தது. கிஷன்கங்கா அணை பற்றியும் பல்வேறு சட்ட மற்றும் பன்னாட்டுத் தடையுணர்வுகள் முன்னிலையிலே உள்ளன என்பது குறிப்பிடத்தக்கது.
