ஜம்மு காஷ்மீரின் பஹல்காமில் ஏப்ரல் 22ஆம் தேதி நடைபெற்ற பயங்கரவாத தாக்குதலில் 26 பேர் உயிரிழந்தனர். இந்த தாக்குதலுக்கு கடுமையான கண்டனம் தெரிவித்து ரஷ்ய அதிபர் விளாதிமிர் புதின், பிரதமர் நரேந்திர மோடியை தொலைபேசியில் தொடர்பு கொண்டார்.இந்த உரையாடலில், தாக்குதலில் உயிரிழந்தவர்களுக்கு ஆழ்ந்த இரங்கலை தெரிவித்த புதின், இந்த பயங்கரவாத செயலுக்கு பொறுப்பானவர்கள் மற்றும் அவர்களை ஆதரிக்கும் சக்திகள் சட்டத்தின் முன் கொண்டுவரப்பட வேண்டும் என்றும் கூறினார். இந்தியாவுடன் பயங்கரவாத எதிர்ப்பு ஒத்துழைப்பை வலுப்படுத்த ரஷ்யா உறுதியாக இருப்பதாகவும் அவர் தெரிவித்தார்.
இந்த தகவலை இந்திய வெளியுறவு அமைச்சின் செய்தித் தொடர்பாளர் ரந்தீர் ஜெய்ஸ்வால் ட்விட்டர் மூலம் உறுதி செய்துள்ளார்.
மேலும் பிரதமர் மோடி, இந்த ஆண்டில் இந்தியாவில் நடைபெறும் உச்சி மாநாட்டிற்கு புதினை வரவேற்கும் அழைப்பையும் வழங்கியுள்ளார். அதற்கு புதின் இந்தியா வருகை தர ஒப்புக்கொண்டார். புதினின் இந்திய வருகை குறித்த செய்தி பாகிஸ்தானுக்கு கடும் அதிர்ச்சியை ஏற்படுத்தியுள்ளது.
ஏற்கனவே அமெரிக்க அதிபர் டொனால்ட் டிரம்ப், பிரஞ்சு அதிபர் இம்மானுவேல் மாக்ரொன், இத்தாலி பிரதமர் ஜோர்ஜியா மெலோனி ஆகியோர் இந்தியாவுக்கு தங்கள் ஆதரவை தெரிவித்துள்ளனர் என்பது குறிப்பிடத்தக்கது.
