இந்தியா–துருக்கி இடையிலான தொடர்புகள் கொஞ்சம் கொஞ்சமாக முறிக்கப்பட்டு வரும் நிலையில், ‘Boycott Turkey’ என்ற பிரச்சாரம் தேசம் முழுவதும் பலம் பெற்றுவருகிறது. பாகிஸ்தானுக்கு ஆதரவு தெரிவித்த துருக்கி அரசின் நடவடிக்கையினை தொடர்ந்து, இந்திய வெளியுறவு அமைச்சகம் துருக்கி நியமன தூதர் அலி முராத் எர்சாய் அளித்த நம்பிக்கை கடிதத்தை இந்திய ஜனாதிபதிக்கு வழங்க வேண்டிய நிகழ்ச்சியை காலவரையின்றி ஒத்திவைத்துள்ளது.
இந்நிகழ்ச்சி இன்று மாலை 4 மணிக்கு நடைபெற திட்டமிடப்பட்டிருந்தது. ஆனால் சில காரணங்களால் வெளியுறவு அமைச்சகம் இதை தள்ளிப் போட்டதாக தெரிவித்துள்ளது.
நம்பிக்கைக் கடிதம் என்பது ஒரு நாட்டை சேர்ந்த தூதர், வேறு ஒரு நாட்டுக்கு தூதராக நியமிக்கப்படுவதை அதிகாரப்பூர்வமாக அறிவிக்கும் ஆவணம் ஆகும்.
இதற்கிடையில், இந்தியாவின் விமானப் பாதுகாப்பு ஒழுங்கமைப்பு அமைப்பான BCAS (Bureau of Civil Aviation Security), துருக்கியை தலைமையிடமாக கொண்ட Çelebi Aviation Holding நிறுவனத்தின் பாதுகாப்பு அனுமதியை தேசிய பாதுகாப்பு காரணமாக ரத்து செய்துள்ளது. இந்த நிறுவனம், இந்தியாவின் பல விமான நிலையங்களில் பல்வேறு விமானங்களுக்கான தரையிறக்கம் மற்றும் சரக்கு சேவைகளை கையாள்கிறது.
இதுகுறித்த அறிவிப்பில் “Celebi Airport Services India Pvt. Ltd நிறுவனத்திற்கு, தரையிறக்க சேவை நிறுவனமாக 21.11.2022 அன்று பாதுகாப்பு அனுமதி வழங்கப்பட்டது. மேலும், “BCAS இயக்குநருக்கு அளிக்கப்பட்ட அதிகாரத்தின் கீழ், தேசிய பாதுகாப்பு காரணமாக அந்த நிறுவனத்தின் பாதுகாப்பு அனுமதி ரத்து செய்யப்படுகிறது” என தெரிவித்துள்ளது.
துருக்கி பாகிஸ்தானுக்கு ஆதரவளிக்கிறது என்ற பல சான்றுகளும் வெளிவரத் தொடங்கிய நிலையில், இந்தியா துருக்கியுடனான உறவுகளை முடித்து வருகிறது. இதையெல்லாம் வைத்து பார்க்கும்போது பாகிஸ்தானை விட இந்தியாவால் துருக்கிக்கு அதிக நஷ்டமாகும் என தெரிகிறது.
ஜவஹர்லால் நேரு பல்கலைக்கழகம் , ஜாமியா மில்லியா இஸ்லாமியா பல்கலைக்கழகம் ஆகியவை துருக்கி கல்வி நிறுவனங்களுடன் வைத்திருந்த புரிந்துணர்வு ஒப்பந்தங்களை நிறைவு செய்தன.
டெல்லி விமான நிலையம் துருக்கி நிறுவனமான Çelebi-யுடன் கொண்டிருந்த ஒப்பந்தத்தைக் கைவிட்டது.
பாகிஸ்தானுக்கு ட்ரோன்கள் மற்றும் கண்காணிப்பு சாதனங்களை வழங்கியதன் மூலம், இந்தியாவுக்கு எதிராக துருக்கி நேரடியாக உதவியது உறுதி செய்யப்பட்டு உள்ளது. இந்தியா மற்றும் பாகிஸ்தானுக்கிடையிலான பதற்றமான சூழ்நிலையில், இந்திய ராணுவம் நடத்திய ‘Operation Sindoor’-இல், பாகிஸ்தானில் உள்ள தீவிரவாத முகாம்கள் மற்றும் விமான தளங்கள் குறிவைக்கப்பட்டன. இதில், துருக்கியின் இரு பொதுப்பணியாளர்கள் பலியாகினர் எனத் தகவல்கள் தெரிவிக்கின்றன.
இதற்கு முன்பு, துருக்கியில் ஏற்பட்ட நிலநடுக்க பேரழிவின்போது இந்தியா “ஆபரேஷன் தோஸ்த்” மூலம் மருத்துவ குழுவும், நாய் படையணியும் அனுப்பி பெரும் உதவி செய்திருந்தது. ஆனால் அந்த நன்றியை மறந்து, பாகிஸ்தானுக்கு ஆதரவாக துருக்கி செயல்பட்டது இந்தியாவுக்கு மிகுந்த அதிருப்தியை ஏற்படுத்தியுள்ளது.
