பஹல்காம் தாக்குதலுக்கு 6 நாட்களுக்கு முன் இடமாற்றம்.. கைதான CRPF வீரர் குறித்த அதிர்ச்சி தகவல்..!

பஹல்காம் பயங்கரவாத தாக்குதலை தொடர்ந்து அதிர்ச்சிகரமான தகவல் ஒன்று வெளிவந்துள்ளது. அதாவது பாகிஸ்தானுக்காக உளவு பார்த்ததாக கூறப்படும் ஒரு CRPF ஜவான் கைது செய்யப்பட்ட நிலையில், அந்த வீரர் பஹல்காம் தாக்குதலுக்கு ஆறு நாட்களுக்கு முன்பு  வேறு இடத்துக்கு இடமாற்றல் வழங்கப்பட்டிருந்தது. இந்த மாற்றம் சாதாரண நிகழ்வாக இருக்க வாய்ப்பில்லை என கூறும், திட்டமிட்டு இடமாற்றம் நடந்திருக்கலாம் என்றும் கூறப்படுகிறது.பாகிஸ்தான் உளவு துறையினருடன்  முக்கிய தகவல்களை பகிர்ந்ததாக கூறப்படும் CRPF ஜவான் மோதி ராம் ஜாட் கைது செய்யப்பட்டுள்ளார். இவர் CRPF-ன் 116வது படைப்பிரிவில் உதவி துணை ஆய்வாளராக பஹல்காமில் பணியாற்றி வந்தவர். ஏப்ரல் 22ஆம் தேதி நடந்த பயங்கரவாத தாக்குதலுக்கு ஆறு நாட்களுக்கு முன்பு, அவரது பணியிடம் மாற்றப்பட்டிருந்தது. அந்த தாக்குதலில் 26 பேர் உயிரிழந்தனர். பாகிஸ்தான் ஆதரவு கொண்ட தீவிரவாதிகள் இந்த தாக்குதலை நடத்தியதாக கூறப்படுகிறது.

NIA விசாரணையில் 2023ஆம் ஆண்டு முதல் பாகிஸ்தானிய அதிகாரிகளிடம் பணம் வாங்கி, நாட்டின் பாதுகாப்பு தொடர்பான ரகசிய தகவல்களை CRPF ஜவான் மோதி ராம் ஜாட்  வழங்கியதாக அவர் மீது குற்றம் சாட்டப்பட்டுள்ளது. அவர் சமூக ஊடகங்கள் வழியாக பாகிஸ்தானுடன் தொடர்புகளை ஏற்படுத்தியதாகவும், பல வழிகளில் பணம் பெற்றதாகவும் அதிகாரிகள் தெரிவித்துள்ளனர். மேலும் அவருடைய மனைவியின் வங்கிக் கணக்கில் பாகிஸ்தான் தொடர்புடைய நபர்கள் பல லட்சம் ரூபாய்களை அனுப்பியதும் விசாரணையில் தெரியவந்துள்ளது.

‘ஆபரேஷன் சிந்தூர்’ முடிந்த பின்னர் அவரது இணையச் செயல்பாடுகள் சந்தேகத்துக்கிடமாக இருந்ததை தொடர்ந்து, CRPF அமைப்பு விசாரணையை தொடங்கியது. 4 நாட்கள் தீவிர விசாரணைக்கு பிறகு, ஜாட் பணிநீக்கம் செய்யப்பட்டு மே 21 அன்று NIAவிடம் ஒப்படைக்கப்பட்டார். பாதுகாப்புப் படையினர் மேற்கொண்ட ஆபரேஷன்கள் மற்றும் பாதுகாப்பு மையங்களின் இருப்பிடம் குறித்து பாகிஸ்தானியர்களுக்கு  அவர் தகவல் வழங்கியதாக குற்றம் சாட்டப்பட்டுள்ளது.

இந்த கைது, பாகிஸ்தான் ஆதரவு கொண்ட அமைப்புகள் வடஇந்தியாவில் செயலில் இருப்பது உறுதியாக்கியதோடு, இந்திய உளவுத்துறைகளும் இதற்கெதிராக தீவிர நடவடிக்கைகளை எடுத்து வருகின்றன.

கடந்த இரண்டு வாரங்களில், பஞ்சாப், ஹரியானா மற்றும் உத்தரப்பிரதேச மாநிலங்களில் 15க்கும் மேற்பட்டோர் உளவு சொன்னதாக கைது செய்யப்பட்டுள்ளனர். இவர்களில் ஜோதி மல்ஹோத்ரா மற்றும் குஸாலா என்ற இரு பெண்களும் அடங்குவர் என்பது குறிப்பிடத்தக்கது.