பாகிஸ்தானின் ஆதிக்கத்தின் கீழ் இருக்கும் பலூசிஸ்தான் மாகாணத்தில் கடந்த சில தினங்களாக நிலவி வரும் போர் போன்ற சூழல் மற்றும் அதன் பின்னணியில் உள்ள அரசியல் நகர்வுகள் குறித்து பல சர்வதேச அரசியல் விமர்சகர்கள் கருத்து தெரிவித்து வருகின்றனர். சமீபத்தில் ஜாபர் எக்ஸ்பிரஸ் ரயில் மீதான தாக்குதலுடன் தொடங்கிய இந்த வன்முறை படலம், தற்போது பலூசிஸ்தான் விடுதலை போராட்ட வீரர்களுக்கும் பாகிஸ்தான் ராணுவத்திற்கும் இடையிலான நேரடி மோதலாக உருவெடுத்துள்ளது. நோஷ்கி முதல் பாராச்சினார் வரையிலான நீண்ட நிலப்பரப்பில் போராட்ட குழுவினர் ஒருங்கிணைந்த தாக்குதல்களை நடத்தியுள்ளனர். பாகிஸ்தான் ராணுவத்தின் சோதனை சாவடிகள், காவல் நிலையங்கள் மற்றும் சிவில் நிர்வாக அலுவலகங்கள் குறிவைக்கப்பட்டுள்ளன. குறிப்பாக துணை ஆணையர்கள் கடத்தப்பட்டதும், நீதிமன்றங்கள் தீக்கிரையாக்கப்பட்டதும் பாகிஸ்தான் அரசின் அதிகாரம் அந்த பிராந்தியத்தில் எவ்வளவு பலவீனமாக உள்ளது என்பதை உலகிற்கு பறைசாற்றுகிறது.
பாகிஸ்தான் ராணுவம் தனது தரப்பில் ஏற்பட்ட இழப்புகளை மறைக்க முயன்றாலும், பலூசிஸ்தான் விடுதலை இராணுவம் வெளியிட்டுள்ள புள்ளிவிவரங்கள் அதிர்ச்சியை ஏற்படுத்துகின்றன. சுமார் 280-க்கும் மேற்பட்ட பாகிஸ்தான் பாதுகாப்பு படை வீரர்கள் கொல்லப்பட்டதாக போராட்ட குழுவினர் உரிமை கோருகின்றனர். இதற்கு பதிலாக பாகிஸ்தான் அரசு சுமார் 216 பயங்கரவாதிகளை அழித்துவிட்டதாக கூறினாலும், அதில் உண்மைத்தன்மை குறைவாகவே இருப்பதாக அரசியல் விமர்சகர்கள் கருதுகின்றனர். பாகிஸ்தான் ராணுவத்தின் ‘டர்ட்டி ஒர்க்ஸ்’ பிரிவினால் வளர்க்கப்படும் ஆயுத குழுக்களுக்கும் இந்த மோதலில் தொடர்பு இருப்பதாக கூறப்படுகிறது. பல இடங்களில் பாகிஸ்தான் வீரர்கள் போராட்ட குழுவினரை எதிர்கொள்ள அஞ்சி பின்வாங்கியதாகவும், அதன் காரணமாகவே வான்வழி தாக்குதல்கள் மற்றும் ஹெலிகாப்டர்களை பாகிஸ்தான் பயன்படுத்த வேண்டிய சூழல் உருவானதாகவும் தகவல்கள் தெரிவிக்கின்றன.
சீனாவின் கனவு திட்டமான சிபெக் மற்றும் அதன் மையப்புள்ளியான குவாடர் துறைமுகம் இந்த தாக்குதல்களின் முதன்மை இலக்காக மாறியுள்ளது. குவாடர் துறைமுகத்தின் நுழைவாயிலிலேயே தாக்குதல்கள் நடந்திருப்பது சீன முதலீட்டாளர்களுக்கு பெரும் அச்சத்தை ஏற்படுத்தியுள்ளது. கடந்த இரண்டு ஆண்டுகளாகவே குவாடர் துறைமுகத்திற்கு பெரிய அளவில் கப்பல்கள் வராத நிலையில், இத்தகைய பாதுகாப்பு அச்சுறுத்தல்கள் அந்த துறைமுகத்தின் பொருளாதார முக்கியத்துவத்தை முற்றிலுமாக சிதைத்துவிடும். இந்த பதற்றமான சூழலால் காப்பீட்டு நிறுவனங்கள் அந்த பகுதிக்கு வரும் சரக்கு வாகனங்களுக்கு அதிக கட்டணம் வசூலிக்கும் நிலை ஏற்பட்டுள்ளது. இது பாகிஸ்தானின் ஏற்கனவே நலிவடைந்திருக்கும் பொருளாதாரத்தை மேலும் பாதாளத்திற்கு தள்ளும் என்பதில் சந்தேகமில்லை.
வழக்கம்போல பாகிஸ்தான் தனது உள்நாட்டு பிரச்சினைகளுக்கும் பாதுகாப்பு தோல்விகளுக்கும் இந்தியாவின் மீது பழிசுமத்தத் தொடங்கியுள்ளது. ஆனால் இந்த முறை ஆச்சரியமளிக்கும் விதமாக, அவர்கள் ஐக்கிய அரபு அமீரகத்தின் மீதும் குற்றச்சாட்டுகளை முன்வைக்கின்றனர். குவாடர் துறைமுகம் வளர்ந்தால் அமீரகத்தின் துறைமுக வணிகம் பாதிக்கப்படும் என்பதால், அமீரகம் பலூசிஸ்தான் போராட்ட குழுக்களுக்கு ஆதரவு அளிப்பதாக பாகிஸ்தானின் ஆதரவு யூடியூபர்கள் மற்றும் சில ஊடகங்கள் பிரசாரம் செய்கின்றன. இந்தியாவின் நட்பு நாடாக அமீரகம் உருவெடுத்து வருவதும், பாகிஸ்தானுக்கு கடன் வழங்குவதில் அமீரகம் காட்டும் கெடுபிடிகளும் பாகிஸ்தான் அதிகார வர்க்கத்தை இத்தகைய அபத்தமான குற்றச்சாட்டுகளை கூற தூண்டியுள்ளது. உண்மையில், தனது சொந்த உளவுத்துறையின் தோல்வியை மறைக்கவே பாகிஸ்தான் இத்தகைய சர்வதேச சதித் திட்ட கதைகளை உருவாக்கி வருகிறது.
பலூசிஸ்தான் போராட்ட குழுவினரின் இந்த Operation Her-of என்ற நடவடிக்கை, ஆப்கானிஸ்தானில் தலிபான்கள் கடைப்பிடித்த உத்தியை போலவே உள்ளதாக கருதப்படுகிறது. அரசு நிர்வாக கட்டமைப்புகளை ஒவ்வொன்றாக சிதைப்பதன் மூலம், அரசின் அதிகாரத்தை முடக்குவதே இவர்களின் நோக்கமாக உள்ளது. இரவு நேரங்களில் பலூசிஸ்தானின் முக்கிய சாலைகளில் பாகிஸ்தான் ராணுவத்தால் நடமாட முடியாத சூழல் நிலவுகிறது. பல இடங்களில் சாலைகள் மறிக்கப்பட்டு, மாவட்ட தலைநகரங்கள் துண்டிக்கப்பட்டுள்ளன. போராட்ட குழுவினரிடம் உள்ள நவீன ஆயுதங்கள் மற்றும் உள்ளூர் மக்களின் ஆதரவு ஆகியவை பாகிஸ்தான் ராணுவத்திற்குப் பெரும் சவாலாக உருவெடுத்துள்ளன. பலூசிஸ்தான் விவகாரத்தை ஒரு சர்வதேசப் பிரச்சினையாக மாற்றுவதில் இந்த முறை போராட்டக் குழுவினர் ஓரளவு வெற்றியும் பெற்றுள்ளனர்.
இறுதியாக, பாகிஸ்தானின் இந்த ஒட்டுமொத்த பாதுகாப்பு சீர்குலைவு அந்த நாட்டின் ராணுவ பலம் குறித்த பிம்பத்தை உடைத்துள்ளது. சீனாவின் அழுத்தம் ஒருபுறம், உள்நாட்டு விடுதலை போராட்டங்கள் மறுபுறம் என பாகிஸ்தான் இக்கட்டான நிலையில் சிக்கியுள்ளது. இந்த தாக்குதல்களின்போது குவாடர் துறைமுகத்தில் இருந்த சீன பணியாளர்கள் அவசர அவசரமாக ஹெலிகாப்டர்கள் மற்றும் கப்பல்கள் மூலம் வெளியேறியதாக வரும் செய்திகள், பாகிஸ்தான் ராணுவத்தின் பாதுகாப்பின் மீது சீனாவுக்கே நம்பிக்கை இல்லை என்பதை காட்டுகிறது. இந்தியாவை சாடுவதன் மூலம் இந்த பிரச்சினையை தீர்க்க முடியாது என்பதை பாகிஸ்தான் உணர வேண்டும். பலூசிஸ்தான் மக்களின் நியாயமான கோரிக்கைகளும், அங்கு நிலவும் மனித உரிமை மீறல்களுமே இந்த வன்முறைக்கு அடிப்படை என்பதை உலகம் தற்போது கவனிக்க தொடங்கியுள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
