தமிழக அரசியல் களம் தற்போது அடுத்தடுத்து அரங்கேறும் திருப்பங்களால் பெரும் பரபரப்பான சூழ்நிலையை நோக்கி நகர்ந்து கொண்டிருக்கிறது. குறிப்பாக, பிரதான எதிர்க்கட்சியான அதிமுகவிலிருந்து விலகும் முக்கியப் பிரமுகர்கள், முன்னாள் அமைச்சர்கள் மற்றும் தற்போதைய சட்டமன்ற உறுப்பினர்கள் பலரும் நடிகர் விஜய் தலைமையிலான தமிழக வெற்றிக் கழகத்தை நோக்கிப் படையெடுத்து வருகின்றனர். ஆனால், இவ்வாறு மாற்றுக்கட்சிகளில் இருந்து தவெகவில் இணையும் அதிமுகவின் முக்கியப் புள்ளிகளைச் சந்திக்க முதல்வர் விஜய் தொடர்ந்து மறுப்பு தெரிவித்து வருவது அரசியல் வட்டாரத்தில் பெரும் விவாதத்தைக் கிளப்பியுள்ளது. கட்சியில் இணையும் விஐபிக்கள் அனைவரும் கட்சியின் மாநில பொதுச்செயலாளர் புஸ்ஸி ஆனந்த் மற்றும் முக்கியப் பொறுப்பாளர் ஆதவ் அர்ஜுனா ஆகியோரின் முன்னிலையில்தான் இணைந்து வருகிறார்களே தவிர, விஜய்யை நேரடியாகச் சந்திக்க அவர்களுக்கு அனுமதி மறுக்கப்பட்டு வருகிறது.
சமீபத்தில் கூட, அதிமுகவின் முக்கிய முகங்களில் ஒருவரான முன்னாள் அமைச்சர் சி.விஜயபாஸ்கர், கிட்டத்தட்ட பத்தாயிரத்திற்கும் மேற்பட்ட தனது ஆதரவாளர்கள் மற்றும் தொண்டர்களுடன் வந்து தவெகவில் இணைந்த நிகழ்வு பெரும் பேசுபொருளானது. இவ்வளவு பெரிய பலத்துடன் வந்தபோதும், அவரை நேரில் சந்தித்து வரவேற்கவோ அல்லது வாழ்த்து தெரிவிக்கவோ முதல்வர் விஜய் முன்வரவில்லை என்பது அனைவரையும் ஆச்சரியத்தில் ஆழ்த்தியுள்ளது. மாற்று கட்சிகளில் இருந்து, குறிப்பாகப் பல்வேறு அரசியல் பின்னணிகள் மற்றும் விவாதங்களுக்கு உள்ளான பின்னணியைக் கொண்டவர்கள் தனது கட்சிக்கு வரும்போது அவர்களைத் தான் நேரடியாகச் சந்தித்தால், அது பொதுவெளியில் தனது தனிப்பட்ட இமேஜுக்குப் பெரும் டேமேஜை (பாதிப்பை) உண்டாக்கும் என்று விஜய் தீவிரமாகக் கருதுவதே இதற்கு முக்கியக் காரணம் என்று சொல்லப்படுகிறது.
அதுமட்டுமன்றி, மாற்றுக்கட்சிகளில் இருந்து தவெகவிற்குள் நுழைந்த உடனே அவர்களுக்குக் கட்சியில் எந்தவொரு முக்கியப் பதவிகளோ அல்லது உயரிய பொறுப்புகளோ வழங்கப்படாது என்பதில் கட்சித் தலைமை மிகவும் கறாராக உள்ளதாகத் தெரிகிறது. தவெகவின் ஆரம்பகாலத் தொண்டர்களுக்கும், தங்களுக்கு விசுவாசமாக உழைப்பவர்களுக்கும் மட்டுமே முக்கியக் கட்சிப் பதவிகள் முன்னுரிமை அடிப்படையில் வழங்கப்படும் என்றும், வெளியில் இருந்து வருபவர்களுக்கு அதிகபட்சமாக அவர்கள் ஏற்கனவே போட்டியிட்ட அல்லது செல்வாக்குடன் இருக்கும் தொகுதிகளில் போட்டியிட மட்டுமே தேர்தல் சமயத்தில் வாய்ப்பு வழங்கப்படும் என்றும் தவெகவின் உள்வட்டாரத் தகவல்கள் கூறுகின்றன. இதன் மூலம் கட்சிக்காக உழைப்பவர்களின் உரிமைகள் எக்காரணம் கொண்டும் பறிபோகாது என்பதை விஜய் உணர்த்த விரும்புகிறார்.
அரசியல் களத்தில் தனக்கு இருக்கும் ‘கிளீன் இமேஜ்’ எனப்படும் தூய்மையான பிம்பத்தை எக்காரணம் கொண்டும் விட்டுக்கொடுக்கக் கூடாது என்பதில் முதல்வர் விஜய் மிகத் தெளிவாகத் திட்டமிட்டு காய்களை நகர்த்தி வருகிறார். தமிழ்நாட்டில் ஒரு தூய்மையான மற்றும் ஊழலற்ற ஆட்சியைத் தொடர்ந்து மக்கள் மத்தியில் நிரூபிக்க வேண்டும் என்றால், பழைய அரசியல் பாணியில் தவறு செய்தவர்கள் அல்லது விமர்சனங்களுக்கு உள்ளானவர்களோடு மேடையைப் பகிர்ந்துகொள்வதைத் தவிர்க்க வேண்டும் என்று அவர் நினைக்கிறார். மக்கள் மத்தியில் கட்சிக்கு இருக்கும் நற்பெயரைக் காப்பாற்றிக்கொள்ளவே இத்தகைய கடுமையான மற்றும் சமரசமற்ற உத்திகளை அவர் கையாண்டு வருவதாக அரசியல் விமர்சகர்கள் சுட்டிக்காட்டுகின்றனர்.
இருப்பினும், தற்போதைய அரசியல் சூழலில் ஆளும் அரசுக்கு ஆதரவு அளிக்கும் சில கூட்டணிக் கட்சிகள் ஏதாவது சேட்டை செய்ய நினைத்தாலோ அல்லது நெருக்கடி கொடுத்தாலோ, தனக்குச் சட்டமன்றத்தில் கூடுதல் ஆதரவு தேவைப்படும் என்ற ஒரே காரணத்திற்காகத்தான் இந்த முன்னாள் எம்எல்ஏக்களையும், அமைச்சர்களையும் அவர் கட்சியில் சேர்க்க அனுமதி அளித்துள்ளார் என்றும் ஒரு பேச்சு நிலவுகிறது. அவசரக் காலங்களில் ஆட்சிக்கு ஆபத்து வராமல் தடுக்க இவர்களின் ஆதரவு தேவைப்படும் என்பதால், இவர்களைக் கட்சிக்குள் வரவழைத்து தவெகவின் பலத்தை அதிகரிக்க புஸ்ஸி ஆனந்த் மற்றும் ஆதவ் அர்ஜுனா ஆகியோர் மூலமாகப் காய் நகர்த்தப்பட்டு வருகிறது.
மொத்தத்தில், அதிமுகவிலிருந்து தவெகவிற்கு வந்த மூத்த தலைவரான கே.ஏ.செங்கோட்டையனுக்கு மட்டுமே முதல்வர் விஜய் தனது தனிப்பட்ட மரியாதையையும், முக்கியத்துவத்தையும் தொடர்ந்து அளித்து வருகிறார் என்பது குறிப்பிடத்தக்கது. அவரின் நீண்டகால அரசியல் அனுபவத்திற்கும் கண்ணியத்திற்கும் மதிப்பளிக்கும் விஜய், அவரைத் தவிர்த்து மாற்றுக்கட்சியிலிருந்து வரும் மற்ற யாரையும் பெரிய அளவில் கண்டுகொள்வதில்லை என்ற தகவல் தற்போது வெளியாகியுள்ளது. இந்த விவகாரம் தவெகவில் இணையக் காத்திருக்கும் மற்ற அதிமுக பிரமுகர்கள் மத்தியில் ஒருவித தயக்கத்தை ஏற்படுத்தியிருந்தாலும், தமிழக அரசியலில் இது ஒரு புதிய அதிரடி உத்தியாகவே பார்க்கப்பட்டு பரபரப்பை ஏற்படுத்தியுள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
