அமெரிக்க ஜனாதிபதி டொனால்ட் டிரம்ப் நேற்று தனது வர்த்தக கொள்கையில் அதிரடி தீர்மானம் ஒன்றை அறிவித்தார். இதன்படி, இறக்குமதி செய்யப்படும் எஃகு மற்றும் அலுமினியத்திற்கு விதிக்கப்பட்டுள்ள வரிகளை 25% இலிருந்து 50% ஆக உயர்த்தப் போவதாக தெரிவித்தார்.
நேற்று நடைபெற்ற ஒரு கூட்டத்தில் அவர் இந்த அறிவிப்பை வெளியிட்டார். இது உள்நாட்டு உற்பத்தித் துறையை வலுப்படுத்தவும், அமெரிக்க வேலை வாய்ப்புகளை பாதுகாக்கவும் மேற்கொள்ளப்படுவதாக டிரம்ப் கூறினார்.
“நாம் 25% கூடுதலாக வரி விதிக்கப் போகிறோம். அதாவது 25% இலிருந்து 50% ஆக உயர்த்தப் போகிறோம். அமெரிக்காவுக்கு கொண்டு வரப்படும் எஃகுக்கு இது பொருந்தும். இது எஃகு துறையை மேலும் பாதுகாப்பதாக இருக்கும்,” என அவர் கூறினார். இந்த வரி உயர்வு வரும் புதன்கிழமை முதல் அமலுக்கு வரும். இதன் பொருள், எஃகு மற்றும் அலுமினியம் மட்டும் அல்லாமல், எரிவாயு அடுப்புகள், குளிர்சாதனக் குழாய்கள், சமையலறைக் கருவிகள் போன்ற உட்பொருட்களுக்கும் இது பொருந்தும்.
மேலும் “அமெரிக்க எஃகு தொழிலாளர்களுக்கான வெற்றி” என டிரம்ப் கூறினார். அமெரிக்காவின் தொழில்துறை அடித்தளத்தை மீட்டெடுக்கவும், குறிப்பாக 2024 தேர்தலில் முக்கியமான பென்சில்வேனியா போன்ற மாநிலங்களில் ஆதரவை பெற்று கொள்ளவும் எடுத்த முயற்சியாக அவர் எடுத்துரைத்தார்.
இந்த அறிவிப்புக்கு பின்னர் பங்குச்சந்தைகள் உடனடியாக தாக்கம் ஏற்படுத்தின. அமெரிக்காவின் முன்னணி எஃகு உற்பத்தியாளரான கிளீவ்லேண்ட்-கிளிஃப்ஸ் இங்க் (CLF.N) நிறுவனத்தின் பங்குகள், வெளிநாட்டு போட்டி குறைந்து உள்நாட்டு விலை உயரும் எதிர்பார்ப்பில், மார்க்கெட் நேரத்துக்குப் பிறகு 26% உயர்ந்தன.
இந்நடவடிக்கைக்கு முக்கிய வர்த்தக நிபுணர்கள் கடும் எதிர்ப்பு தெரிவித்தனர். கனடா வர்த்தக சபை, இந்த வரிகள் “வட அமெரிக்க பொருளாதார பாதுகாப்புக்கு விரோதமானவை” எனக் கூறி, எல்லைக்கடந்த சப்ளை சுழற்சிகளில் குழப்பத்தை ஏற்படுத்தும் என எச்சரித்தது. ஆஸ்திரேலிய வர்த்தக அமைச்சர் டான் பெரல் இந்த முடிவு நியாயமற்றது, எந்த நாடும் எடுத்திராத செயல் என விமர்சித்தார். இது நுகர்வோர் மற்றும் உலக வர்த்தக உறவுகளுக்கு சேதம் ஏற்படுத்தும் என்றும் கூறினார்.
ஐரோப்பிய ஒன்றியம் தவிர்த்து, உலகின் மிகப்பெரிய எஃகு இறக்குமதியாளராக அமெரிக்கா உள்ளது. 2024ஆம் ஆண்டில், அமெரிக்கா 26.2 மில்லியன் டன் எஃகை, 147.3 பில்லியன் டாலர் பெறுமதியில், 289 வகை தயாரிப்புகளாக இறக்குமதி செய்தது. இதில் இருபத்திமூன்றில் இரண்டு பங்குகள் அலுமினியம் ஆகும். தேசிய பாதுகாப்பு சட்டத்தின் பிரிவு 232-ன் கீழ் இவ்வரி உயர்வு அமல்படுத்தப்படுகிறது. இது, டிரம்ப் தனது முதல் பதவிக்காலத்தில் சீன தொழிற்துறை பொருட்களுக்கு விதித்த அதே அளவிலான தாக்கத்தை ஏற்படுத்தும்.
இந்த அறிவிப்பு உலகளாவிய வர்த்தகப் போரில் மேலும் நெருக்கடிகளை உருவாக்கும் என எதிர்பார்க்கப்படுகிறது.
