தமிழக மின்சார வாரியத்தில் கடந்த திராவிட மாடல் ஆட்சி காலத்தில் அரங்கேறியுள்ள இமாலய டெண்டர் முறைகேடுகள் மற்றும் ஊழல் புகார்கள் தற்போது ஆதாரங்களுடன் வெளிவந்து ஒட்டுமொத்த மாநிலத்தையும் உலுக்கியுள்ளன. சந்தை விலையில் வெறும் 8 லட்சம் ரூபாய் மட்டுமே மதிப்புள்ள ஒரு 500 கேவி மின்மாற்றியை 13 லட்சம் ரூபாய்க்கு போலி டெண்டர் போட்டு மின்வாரியம் வாங்கியுள்ளது என்ற அதிர்ச்சியூட்டும் தகவல் அம்பலமாகியுள்ளது. ஒரு டிரான்ஸ்ஃபார்மருக்கு மட்டுமே சுமார் 5 லட்சம் ரூபாய் வரை மக்கள் வரிப்பணம் சூறையாடப்பட்டுள்ள நிலையில், பல ஆயிரக்கணக்கான டிரான்ஸ்ஃபார்மர்கள் கொள்முதல் செய்யப்பட்டதில் எவ்வளவு பெரிய முறைகேடு நடந்திருக்கும் என்ற கேள்வியே, மின்வாரியம் ஏன் பல பல்லாயிரக்கணக்கான கோடி ரூபாய் நஷ்டத்தில் இயங்குகிறது என்ற மர்மத்திற்கு விடையாக அமைந்துள்ளது.
தோண்ட தோண்ட பூதாகரமாக வெடித்து வரும் இந்த மின்வாரிய ஊழல், கடந்த திமுக ஆட்சியில் மின்சாரத் துறை அமைச்சராக இருந்த செந்தில் பாலாஜியின் கழுத்தை இறுக்கும் மாபெரும் இரும்பு வளையமாக மாறியுள்ளது. அவரது பதவிக்காலத்தில், சுமார் 45,000 மின்மாற்றிகள் கொள்முதல் செய்ததில் மட்டும் 397 கோடி ரூபாய் அளவிற்கு பொதுப் பணத்திற்கு இழப்பு ஏற்படுத்தப்பட்டுள்ளது என அறப்போர் இயக்கம் ஆதாரங்களை வெளியிட்டிருந்தது. இந்த வழக்கில் அண்மையில் சென்னை உயர் நீதிமன்றம் உத்தரவிட்ட சிபிஐ விசாரணைக்கு உச்ச நீதிமன்றமும் தடைய விதிக்க மறுத்துவிட்டதால், செந்தில் பாலாஜியை சட்டத்தின் பிடியில் இருந்து அவ்வளவு சீக்கிரம் தப்பவிட மாட்டார்கள் என்பது உறுதியாகியுள்ளது.
இந்த இமாலய ஊழல் சாம்ராஜ்யத்தை வேரறுக்க, தற்போதைய தவெக அரசின் மின்சாரம் மற்றும் ஆற்றல் மூலங்கள் துறை அமைச்சராக பொறுப்பேற்றுள்ள சி.டி.ஆர். நிர்மல்குமார் களத்தில் இறங்கி அதிரடியாக ஆடித்தீர்த்து வருகிறார். “கடந்த 25 ஆண்டுகால தவறான நிர்வாகத்தாலும், கடந்த அதிமுக, திமுக ஆட்சியின் இமாலய கொள்ளையாலும் மின்வாரியம் முற்றிலும் சீரழிக்கப்பட்டு, ஒரு லட்சம் கோடி ரூபாய் அளவிற்கு பெருங்கடனில் மூழ்கடிக்கப்பட்டுள்ளது” என்று ஆதாரங்களுடன் குற்றம் சாட்டியுள்ள அமைச்சர் நிர்மல்குமார், ஊழல் அதிகாரிகள் மற்றும் அரசியல்வாதிகளின் நெஞ்சில் இடியை இறக்கியுள்ளார்.
முதலமைச்சர் சி. ஜோசப் விஜய் தமக்கு வழங்கிய மாபெரும் பொறுப்பை உணர்ந்து, அமைச்சர் நிர்மல்குமார் மின்வாரியத்தில் நிலவும் ஒட்டுமொத்த குறைபாடுகளையும், முறைகேடுகளையும் துடைத்தெறியும் அசுர வேக பணிகளில் ஈடுபட்டுள்ளார். தமிழகம் முழுவதும் உள்ள மின்வாரிய அலுவலகங்களில் திடீர் ஆய்வுகளை மேற்கொண்டு வரும் அவர், அலட்சியமாக இருக்கும் அதிகாரிகள் மீதும், டெண்டர் முறைகேடுகளுக்கு துணையாக இருந்தவர்கள் மீதும் அடுத்தடுத்து சஸ்பெண்ட் நடவடிக்கைகளை எடுத்து வருகிறார். வெளிமாநிலங்களில் இருந்து அதிக விலைக்கு மின்சாரம் வாங்கும் கார்ப்பரேட் கொள்ளைக்கு முற்றுப்புள்ளி வைத்து, தமிழகத்தை மின் உற்பத்தியில் சுயசார்புடைய மாநிலமாக மாற்றுவதே தனது முதல் இலக்கு என்று அவர் பிரகடனப்படுத்தியுள்ளார்.
முந்தைய ஆட்சியாளர்கள் கமிஷன் வாங்குவதற்காகவே திட்டமிட்டு போலியான டெண்டர்களை உருவாக்கி, தங்களுக்குச் சாதகமான நிறுவனங்களுக்கு Cartelization முறையில் ஒப்பந்தங்களை வாரி கொடுத்துள்ளனர். இதனால் தரமற்ற உபகரணங்கள் வாங்கப்பட்டு, மாநிலம் முழுவதும் அடிக்கடி மின்தடை ஏற்படுவதோடு, மின்சார வாரியத்தின் கஜானாவும் முற்றிலும் காலியானது. இத்தகைய முறைகேடுகளால் ஏழை எளிய சாமானிய மக்கள் மீது மின்கட்டண உயர்வு என்ற சுமை ஏற்றப்பட்ட கொடூரத்தை, தற்போதைய புதிய தவெக அரசு தனது கடுமையான சட்டரீதியான நடவடிக்கைகள் மற்றும் சீர்திருத்தங்கள் மூலம் மாற்றி அமைத்து வருகிறது.
முடிவாக பார்க்கும்போது, மின்சார துறையில் ஊழல் செய்துவிட்டு தப்பித்துவிடலாம் என்று நினைத்த முந்தைய ஆட்சியாளர்களின் பகற்கனவு தவெக அரசின் நேர்மையான நிர்வாகத்தால் கலைக்கப்பட்டுள்ளது. அமைச்சர் நிர்மல்குமாரின் இந்த அதிரடி ஆட்டமும், சிபிஐ-யின் தீவிர விசாரணையும் தமிழக மின்சார வாரியத்தை ஊழல் கறைகளில் இருந்து மீட்டெடுப்பது உறுதி. “மக்களின் வரிப்பணத்தில் ஒரு பைசா கூட கொள்ளையடிக்க அனுமதிக்க மாட்டோம்” என்ற முதலமைச்சர் விஜய்யின் கொள்கை முழக்கத்திற்கு வடிவம் கொடுக்கும் வகையில், மின்சார துறையில் நடக்கும் இந்தத் தூய்மை பணி தமிழக அரசியலில் ஒரு புதிய சகாப்தத்தை தொடங்கியுள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
