தேனிலவில் ராஜா ரகுவன்ஷியை அவரது மனைவி சோனம் கொலை செய்த சம்பவம் நாடு முழுவதும் பெரும் அதிர்ச்சியை ஏற்படுத்தியது. இந்த நிலையில் இந்த வழக்கில் தொடர்புடைய 4 குற்றவாளிகளில் ஒருவரை, ஷில்லாங் போலீசார் மற்றும் இந்தூர் குற்றப்பிரிவு போலீசார் ஷில்லாங்கிற்கு விமானத்தில் அழைத்துச் செல்லும்போது, ஒரு பயணி குற்றவாளியின் கன்னத்தில் அறைந்த வீடியோ தற்போது இணையத்தில் வைரலாகி வருகிறது.
இந்த சம்பவம் நேற்று இரவு இந்தூரில் உள்ள தேவி அஹில்யாபாய் ஹோல்கர் விமான நிலையத்தில் நடந்தது. விமான நிலையத்திற்கு வெளியே தனது லக்கேஜுடன் காத்திருந்த ஒரு பயணி, விசாரணை குழுவினர் குற்றவாளியை விமான நிலைய நுழைவு வாயில் நோக்கி அழைத்துச் செல்லும்போது, அவரை அறைவது தெளிவாக பதிவாகியுள்ளது.
இந்த தேனிலவு கொலை வழக்கு நாடு முழுவதும் பெரும் அதிர்ச்சியை ஏற்படுத்தி, பொதுமக்களிடையே பரவலான கோபத்தைத் தூண்டியுள்ளது என்பது இந்த சம்பவத்தில் இருந்து தெரிய வருகிறது. கேமராவில் பதிவான இந்த பயணியின் செயல், 29 வயதான ராஜா ரகுவன்ஷியின் கொடூரமான கொலை குறித்து நிலவும் பொதுமக்களின் உணர்வைப் பிரதிபலிக்கிறது. குற்றவாளிகள் அனைவரும் முகமூடி அணிந்திருந்ததால், யார் அறையப்பட்டார் என்பது தெளிவாக தெரியவில்லை. இருப்பினும் அவர் அறைந்தது சோனமை தான் என்று தகவல் அறிந்த வட்டாரங்கள் கூறுகின்றன.
ராஜா ரகுவன்ஷி கொலை வழக்கில் குற்றம் சாட்டப்பட்ட நான்கு பேரும், மேலும் விசாரணைக்காக ஏழு நாட்கள் காவலில் எடுத்துக்கொள்ளப்பட்ட பிறகு, ஷில்லாங்கிற்கு கொண்டுவரப்பட்டனர். அவர்கள் ஷில்லாங்கில் உள்ள சதர் காவல் நிலையத்திற்கு அழைத்துச் செல்லப்பட்டனர். குற்றவாளி சோனம் ரகுவன்ஷி பின்னர் மருத்துவ பரிசோதனைக்காக மருத்துவமனைக்கு அழைத்துச் செல்லப்பட்டார். மேகாலயா போலீசார் தற்போது சோனமை மூன்று நாட்கள் காவலில் வைத்துள்ளனர். சோனமும் மற்ற நான்கு குற்றவாளிகளும் இன்று நீதிமன்றத்தில் ஆஜர்படுத்தப்படுவார்கள்.
போலீஸ் வட்டாரங்களின்படி, சோனம் தனது குற்றத்தை ஒப்புக்கொள்ளவில்லை என்றும், தன்னை ஒரு பாதிக்கப்பட்டவராக சித்தரிக்க, போதை மருந்து கொடுக்கப்பட்டு, கொள்ளையடிக்கப்பட்டு, கடத்தப்பட்டதாக கூறி போலியான கதைகளை சொல்லி விசாரணையை திசைதிருப்ப முயன்றதாகவும் கூறப்படுகிறது.
முன்னதாக, ராஜா ரகுவன்ஷியின் உடல் மேகாலயாவில் ஒரு பள்ளத்தாக்கில் கண்டுபிடிக்கப்பட்டது. பின்னர், காணாமல் போன அவரது மனைவி சோனமை கண்டுபிடிக்க தீவிர தேடுதல் வேட்டை தொடங்கப்பட்டது. விசாரணை முன்னேறும்போது, அவர் மீதான சந்தேகங்கள் ஆழமாகின. தனது காதலனுடன் சதி செய்து, ராஜாவை படுகொலை செய்ய மூன்று பேரை வாடகைக்கு அமர்த்தியதே அவர்தான் என்று போலீசார் பின்னர் வெளிப்படுத்தினர்.
இந்த சம்பவம் குறித்து நெட்டிசன்கள், ‘எவன்டி உன்னை பெத்தான், காதலனோடு செல்ல வேண்டுமென்றால் போய் தொலைந்திருக்க வேண்டியது தானே, எதற்காக ஒரு அப்பாவியை கொலை செய்தாய்? என்ற கேள்வியை எழுப்பி வருகின்றனர்.
