தமிழகத்தில் நடந்து முடிந்த சட்டமன்ற தேர்தலுக்கு முன்பாக, முதலமைச்சர் விஜய் அவர்களின் அரசியல் வருகையையும், அவரது புதிய கட்சியான தமிழக வெற்றி கழகத்தையும் ஆளுங்கட்சியாக இருந்த திராவிட முன்னேற்ற கழகம் மிக சாதாரணமாக கையாண்டது. விஜய் அவர்களை ஒரு வெற்று சினிமா பிரபலம் என்றும், அரசியல் புரிதல் இல்லாத தற்குறி என்றும், தேர்தலில் அவர் ஒரு இடத்தில் கூட டெபாசிட் வாங்க மாட்டார் என்றும் திமுகவின் முக்கிய நிர்வாகிகள் மற்றும் மேடை பேச்சாளர்கள் மிகக் கடுமையான வார்த்தைகளால் கேலி செய்து அவதூறாகப் பேசினர்.
ஆனால், இந்த தரக்குறைவான விமர்சனங்களையும், ஏளன பேச்சுகளையும் தமிழக மக்கள் எவ்விதத்திலும் ரசிக்கவில்லை என்பதை தேர்தல் முடிவுகள் மிக தெளிவாக நிரூபித்து காட்டியுள்ளன. இத்தகைய சூழலில், தேர்தலுக்கு முன்பு என்ன தவறை செய்து ஆட்சியை இழந்ததோ, அதே அரசியல் தவறை தேர்தலுக்குப் பின்னரும் திமுக மேலிடமும் அதன் ஐடி விங்கும் திமுகவின் சொம்புகளும் தொடர்ச்சியாக செய்து கொண்டிருப்பது அரசியல் விமர்சகர்கள் மத்தியில் ஆச்சரியத்தை ஏற்படுத்தியுள்ளது.
தேர்தல் தோல்விக்கு பிறகாவது தங்களது தவறுகளை திருத்திக் கொண்டு ஆக்கப்பூர்வமான அரசியலை நோக்கி திமுக நகரும் என்று எதிர்பார்த்த மக்களுக்கு ஏமாற்றமே மிஞ்சியுள்ளது. தற்போது மக்கள் செல்வாக்குடன் முழு பெரும்பான்மையோடு ஆட்சி பொறுப்பேற்றுள்ள முதலமைச்சர் விஜய் அவர்களின் புதிய அரசின் அன்றாட நிர்வாக நடைமுறைகளையும், மக்கள் நல திட்டங்களையும் எவ்வித அடிப்படை தகுதியும் இன்றி திமுகவினர் தொடர்ந்து குறை சொல்லி வருகின்றனர். புதிய அரசு பதவியேற்று இன்னும் சில மாதங்களே ஆகியுள்ள நிலையில், அதற்குள் ஒட்டுமொத்த நிர்வாகமும் சீர்குலைந்துவிட்டது போன்ற ஒரு போலியான பிம்பத்தை கட்டமைக்க திராவிட கட்சிகள் முயல்கின்றன. தற்போதைய இந்த அவசர குணம் மற்றும் காழ்ப்புணர்ச்சி அரசியல் நகர்வுகளை தமிழக மக்கள் சற்றும் விரும்பவில்லை என்பதோடு, மக்கள் மத்தியில் இது திமுகவின் மீதான கசப்புணர்வையே மேலும் அதிகரித்து வருகிறது.
ஒரு ஆரோக்கியமான ஜனநாயக நாட்டில், வலிமையான எதிர்க்கட்சியாக உருவெடுக்க விரும்பும் எந்தவொரு இயக்கமும் ஆளுங்கட்சியின் செயல்பாடுகளை அணுகும் முறையில் பெரும் முதிர்ச்சியை காட்ட வேண்டும். புதிய அரசு ஏதேனும் ஒரு நல்ல திட்டத்தை கொண்டு வரும்போது, அதனை மனதார பாராட்டும் பக்குவமும், அதே நேரத்தில் அரசு ஏதேனும் தவறு செய்யும்போது அதனை தகுந்த தரவுகளுடன் சுட்டிக்காட்டி ஆக்கப்பூர்வமாக விமர்சிக்கும் திறனும் கொண்டிருக்க வேண்டும். அத்தகைய நடுநிலையான அணுகுமுறையை கையில் எடுத்தால் மட்டுமே, ஒரு எதிர்க்கட்சியை மக்கள் தங்களின் உண்மையான பிரதிநிதியாக நம்புவார்கள். அதை விடுத்து, காலையில் எழுந்தது முதல் இரவு படுக்க போகும் வரை முதலமைச்சர் விஜய் அவர்களின் ஒவ்வொரு அசைவையும், உடையையும், பேச்சையும் சமூக வலைத்தளங்களில் கேலி செய்துகொண்டே இருந்தால், மக்கள் அவர்களை ஒருபோதும் தீவிரமான அரசியல் சக்தியாக மதிக்க மாட்டார்கள்.
கடந்த ஐம்பது ஆண்டுகளுக்கும் மேலாக மாறி மாறி தமிழகத்தை ஆட்சி செய்து, மாநிலத்தின் இயற்கை வளங்களையும், பொருளாதார கட்டமைப்பையும், கல்வி முறையையும் முழுமையாக சீரழித்த மாபெரும் பழியை திராவிடக் கட்சிகள் தங்களின் சுமந்து நிற்கின்றன. குடும்ப அரசியல், மலிந்து கிடக்கும் லஞ்ச ஊழல், நிர்வாக சீர்கேடுகள் மற்றும் சட்டம் ஒழுங்கு பற்றாக்குறை என தமிழகத்தை படுகுழியில் தள்ளிய இந்த சக்திகள், இன்று நேர்மையான மற்றும் தூய்மையான நிர்வாகத்தை வழங்கத் துடிதுடிக்கும் ஒரு புதிய அரசை விமர்சனம் செய்வதற்கான தார்மீக தகுதியையே முற்றிலும் இழந்துவிட்டன. தங்களின் கடந்த கால தவறுகளுக்கு மக்கள் மன்றம் வழங்கிய மாபெரும் தண்டனையை உணராமல், புதிய முதலமைச்சருக்கு நிர்வாகம் தெரியவில்லை என்று திராவிட பாரம்பரியத்தினர் பேசுவது சாத்தான் வேதம் ஓதுவது போலத்தான் மக்களுக்கு தோன்றுகிறது.
தற்போதைய அரசியல் சூழலில், திராவிட முன்னேற்ற கழகமும் அதன் தோழமை கட்சிகளும் தங்களின் அரசியல் எதிர்காலத்தை காப்பாற்றிக் கொள்ள வேண்டுமானால், இன்னும் கொஞ்ச காலத்திற்கு எவ்வித வீண் விமர்சனங்களும் செய்யாமல் அமைதியாக இருப்பதுதான் அவர்களுக்கு நல்லது. மக்கள் புதிய ஆட்சிக்கு வழங்கியுள்ள கால அவகாசத்தையும், முதலமைச்சர் விஜய் அவர்கள் மீது வைத்துள்ள அசைக்க முடியாத நம்பிக்கையையும் புரிந்துகொண்டு, தங்களைக் சுயபரிசோதனை செய்துகொள்ளும் கால கட்டமாக இதனை திமுக பயன்படுத்தி கொள்ள வேண்டும். அதை விடுத்து, தங்களின் பழைய அதிகார மிரட்டல் பாணியிலும், சமூக வலைத்தள நையாண்டிகள் மூலமும் புதிய அரசை முடக்க நினைக்கக் கூடாது.
முடிவாக, தமிழக மக்களின் மனநிலையை புரிந்து கொள்ளாமல் இன்னும் பழைய வாரிசு அரசியல் ஆதிக்க செருக்கோடு திமுக செயல்படுமேயானால், வரும் காலங்களில் மக்கள் மன்றத்தில் இன்னும் மோசமாக அசிங்கப்பட்டு போகும் நிலைதான் அவர்களுக்கு ஏற்படும். இன்றைய இளைஞர்களும், பொதுமக்களும் அரசியல் ரீதியாக மிகவும் விழிப்புணர்வுடன் இருக்கிறார்கள்; வெற்று மேடை பேச்சுகளையும், போலித் திராவிட தத்துவங்களையும் அவர்கள் ஏற்கனவே நிராகரித்துவிட்டனர். எனவே, முதலமைச்சர் விஜய் அவர்களின் மக்கள் செல்வாக்கைச் சிதைக்க நினைக்கும் திமுகவின் இந்த வீண் முயற்சிகள் அனைத்தும் தற்கொலைக்கு சமமானவை என்பதால், போலிப் பெருமைகளைத் தூக்கி எறிந்துவிட்டு அமைதி காப்பதே திராவிடக் கட்சிகளுக்கு இப்போதைக்கு கிடைக்கும் ஆகச்சிறந்த அரசியல் பாதுகாப்பாகும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
