2026 தமிழக சட்டமன்ற தேர்தலை முன்னிட்டு அரசியல் கட்சிகள் இப்போதே தங்களது வியூகங்களை வகுக்க தொடங்கிவிட்ட நிலையில், அதிமுக பிரமுகர் ஒருவர் ரகசியமாக எடுத்த தனிப்பட்ட கருத்துக்கணிப்பு முடிவுகள் தற்போது வெளியாகி அதிமுக தொண்டர்களிடையே மிகப்பெரிய உற்சாகத்தை ஏற்படுத்தியுள்ளது.
இந்த ஆய்வின்படி, அதிமுக தனித்து 105 இடங்களை கைப்பற்றும் என்று கணிக்கப்பட்டுள்ளது. கடந்த 2021 தேர்தலை விட அதிமுகவின் செல்வாக்கு தற்போதைய ஆட்சி எதிர்ப்பு அலையினால் பலமடைந்துள்ளதாகவும், குறிப்பாக கொங்கு மண்டலம் மற்றும் தென் மாவட்டங்களில் அதிமுக மீண்டும் தனது கோட்டையை நிலைநாட்டும் என்றும் இந்த புள்ளிவிவரங்கள் தெரிவிக்கின்றன. 118 என்ற மேஜிக் எண்ணை தொட முடியாவிட்டாலும், தனிப்பெரும் கட்சியாக அதிமுக உருவெடுப்பது உறுதி என்கிறது இந்த ஆய்வு.
இந்த கருத்துக்கணிப்பின் மிக முக்கியமான அம்சம் என்னவென்றால், தமிழகத்தில் பல ஆண்டுகளுக்குப் பிறகு ஒரு “கூட்டணி ஆட்சி” அமைவதற்கான வாய்ப்பு பிரகாசமாக இருப்பதே ஆகும். அதிமுக தலைமையிலான கூட்டணியில் பாமக 5 இடங்களையும், டிடிவி தினகரனின் அமமுக 5 இடங்களையும், பாஜக 12 இடங்களையும் கைப்பற்றும் என்று கணிக்கப்பட்டுள்ளது. இதன் மூலம் ஒட்டுமொத்தமாக இந்தக் கூட்டணி 127 இடங்களை பெற்று பெரும்பான்மைக்கு தேவையான பலத்தை எட்டும் என்று கூறப்படுகிறது. கடந்த தேர்தல்களில் சிதறிப்போன வாக்குகள் இந்த முறை எடப்பாடி பழனிசாமியின் தலைமையின் கீழ் ஒன்றிணைவது இந்தக் கூட்டணிக்கு மிகப்பெரிய பலமாக பார்க்கப்படுகிறது.
பாஜகவிற்கு இந்த ஆய்வில் வழங்கப்பட்டுள்ள 12 இடங்கள் என்பது அக்கட்சியின் வளர்ச்சி தமிழகத்தில் வேரூன்றி இருப்பதை காட்டுகிறது. அதேபோல், பாமக மற்றும் அமமுக ஆகிய கட்சிகள் தலா 5 இடங்களை பெறுவது, குறிப்பிட்ட சமூக வாக்கு வங்கிகள் இன்றும் பலமாக இருப்பதை உறுதிப்படுத்துகின்றது. இந்த கட்சிகளின் ஆதரவுடன் எடப்பாடி பழனிசாமி மீண்டும் தமிழகத்தின் முதலமைச்சராக பதவியேற்பார் என்ற செய்தி அதிமுகவின் ‘ரத்தத்தின் ரத்தங்களான’ தொண்டர்களை மிகுந்த குஷியில் ஆழ்த்தியுள்ளது. கூட்டணி ஆட்சி என்றாலும், அமைச்சரவையில் மற்ற கட்சிகளுக்கு உரிய இடங்களை வழங்கி, ஒரு நிலையான ஆட்சியை எடப்பாடி பழனிசாமி வழங்குவார் என்று அதிமுக நிர்வாகிகள் நம்பிக்கை தெரிவிக்கின்றனர்.
மறுபுறம், ஆளுங்கட்சியான திமுகவிற்கு எதிரான மக்களின் அதிருப்தி, மின் கட்டண உயர்வு, சொத்து வரி உயர்வு மற்றும் சட்டம் ஒழுங்கு பிரச்சனைகள் ஆகியவை அதிமுகவிற்கு சாதகமான காற்றை வீச செய்துள்ளதாக இந்த தனிப்பட்ட கருத்துக்கணிப்பு சுட்டிக்காட்டுகிறது. திமுகவின் கோட்டைகளாக கருதப்படும் பல தொகுதிகளில் கூட இந்த முறை கடும் போட்டி நிலவும் என்றும், நடுநிலை வாக்காளர்களின் ஓட்டுகள் பெருமளவில் அதிமுக கூட்டணிக்கு திரும்பியுள்ளதும் இந்த ஆய்வில் தெரியவந்துள்ளது. குறிப்பாக, இளைஞர்கள் மற்றும் பெண்கள் மத்தியில் எடப்பாடி பழனிசாமியின் எளிமையான அணுகுமுறை மீண்டும் எடுபட தொடங்கியுள்ளதாக தகவல்கள் தெரிவிக்கின்றன.
இருப்பினும், இது ஒரு கட்சியின் பிரமுகர் எடுத்த தனிப்பட்ட கருத்துக்கணிப்பு என்பதால், தேர்தல் களத்தில் இன்னும் பல மாற்றங்கள் ஏற்பட வாய்ப்புள்ளது. ஆனால், இந்த முடிவுகள் வெளியானதிலிருந்து அதிமுக முகாம்கள் மற்றும் சமூக வலைதளங்களில் “மீண்டும் எடப்பாடியார் ஆட்சி” என்ற முழக்கம் ஒலிக்க தொடங்கியுள்ளது. தொண்டர்களை உற்சாகப்படுத்தி தேர்தல் பணிகளில் தீவிரமாக ஈடுபட செய்ய இந்த ஆய்வு ஒரு ஊக்கியாக செயல்பட்டு வருகிறது. கோட்டையை பிடிக்கப்போவது உதயசூரியனா அல்லது இரட்டை இலையா என்ற இறுதி போர் இன்னும் சில நாட்களில் அரங்கேறப்போகும் நிலையில், இந்த கருத்துக்கணிப்பு முடிவுகள் தமிழக அரசியலில் ஒரு புதிய விவாதத்தை கிளப்பியுள்ளன.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
