சிலர் சொந்தத்துக்குள்ள திருமணம் செய்யக்கூடாதுன்னு சொல்வாங்க. நாமளும் கேள்விப்பட்டு இருப்போம். ஆனால் அதற்கான விளக்கம் என்னன்னு சொல்ல அவங்களுக்கேத் தெரியாது. அப்படின்னா என்ன? வாங்க பார்க்கலாம்.
நமது முன்னோர்கள் வகுத்த குடும்பப் பாரம்பரிய முறைகளில் ‘கோத்திரம்’ என்பது மிக முக்கியமானது. பலருக்கும் தங்களது கோத்திரம் எது, அதன் பின்னணி என்ன என்ற கேள்விகள் இருக்கும். அதற்கான தெளிவான விளக்கம்:
‘கோ’ என்றால் பசு அல்லது பூமி, ‘திரம்’ என்றால் காப்பவர் அல்லது தளம் என்று பொருள். ஆன்மீக ரீதியாக, ஒரு குறிப்பிட்ட முனிவரின் வம்சாவளியில் வந்தவர்கள் என்பதை அடையாளப்படுத்துவதே கோத்திரம். அதாவது, நீங்கள் எந்த மகரிஷியின் வழித்தோன்றல் என்பதைக் குறிக்கும் ‘குடும்பப் பெயர்’ இது.
தொடக்கத்தில் சப்தரிஷிகள் மற்றும் எட்டாவதாக அகத்தியர் ஆகியோரை அடிப்படையாகக் கொண்டு 8 முக்கிய கோத்திரங்களே உருவாயின. ஜமதக்னி, அத்திரி, பரத்வாஜர், கௌதமர், காஸ்யபர், வசிஷ்டர், விசுவாமித்திரர், அகத்தியர்.
இந்த 8 ரிஷிகளிடமிருந்தே பிற்காலத்தில் பல்லாயிரக்கணக்கான உப கோத்திரங்கள் கிளைகளாகப் பிரிந்து வளர்ந்தன.
உதாரணமாக, வத்ச, ஸ்ரீவத்ச, கௌண்டின்ய, ஆங்கீரச போன்றவை. ஒரே கோத்திரத்தைச் சேர்ந்தவர்கள் ஒருவருக்கொருவர் சகோதர, சகோதரி முறையாகக் கருதப்படுவார்கள். எனவே, மரபணு ரீதியான ஆரோக்கியத்தைப் பேணவும், பாரம்பரியத்தைக் காக்கவும் ஒரே கோத்திரத்தில் திருமணம் செய்வதைத் தவிர்த்தனர்.
தர்ப்பணம் செய்யும் போதும், கோவில்களில் அர்ச்சனை செய்யும் போதும் நமது கோத்திரத்தைக் குறிப்பிடுவது, நமது முன்னோர்களின் ஆசியைப் பெற உதவும். ஆயிரக்கணக்கான ஆண்டுகளாக நமது வம்சாவளி மாறாமல் இருப்பதைக் காட்டும் ஒரு வரலாற்றுச் சான்று இது.
உங்கள் குடும்பத்தின் ‘கோத்திரம்’ எது என்று உங்களுக்குத் தெரியாவிட்டால், உங்கள் குலதெய்வக் கோவிலில் உள்ள பெரியவர்களிடமோ அல்லது குடும்பப் பெரியவர்களிடமோ கேட்டுத் தெரிந்துகொள்வது சிறந்தது.
பிரிண்ட் மீடியாவில் 7 ஆண்டுகளும் டிஜிட்டல் மீடியாவில் 8 ஆண்டுகளும் பணிபுரிந்து உள்ளேன். செய்திகள், பொழுதுபோக்கு, ஆன்மிகம், சிறப்புக்கட்டுரை கள், வாழ்க்கை முறை ஆகிய தலைப்புகளில் கட்டுரை எழுதுவேன். பொழுதுபோக்கு, ஆன்மிகம் கட்டுரைகள் அதிகமாக எழுதியுள்ளேன். புதுக்கவிதைகளும் எழுதி உள்ளேன்.
