தமிழ்நாட்டு அரசியல் களம் தற்பொழுது ஒரு புதிய பரிமாணத்தை எட்டியுள்ள நிலையில், ஆளுங்கட்சியான திமுக எடுத்து வரும் பல அரசியல் முடிவுகள் வியூக ரீதியாக பலவீனமாகவே அமைந்து வருகின்றன. குறிப்பாக, தவெக அரசு தற்பொழுது நடத்தி வரும் ஆட்சி நிர்வாகத்தில் ஏதேனும் தவறுகளோ அல்லது குறைபாடுகளோ ஏற்படும் போது, திமுக அதனை அணுகும் முறை அடிப்படையிலேயே தவறானதாக இருக்கிறது என்று அரசியல் விமர்சகர்கள் சுட்டிக்காட்டுகின்றனர். நேரடியாக தவெக-வை மட்டும் குறிவைத்து விமர்சிப்பதை விடுத்து, அதற்கு பின்னால் இருக்கும் ஒரு மாபெரும் அரசியல் கூட்டணியை நோக்கி தங்களது கேள்விகளை திருப்பினால்தான் அது இன்னும் பவர்புஃல்லான அரசியல் நகர்வாக இருக்கும் என்பதை திமுக உணர தவறிவிட்டது.
ஆட்சியில் நடக்கும் நிர்வாக குளறுபடிகளுக்கு தவெக-வை மட்டும் தனித்து பொறுப்பாக்குவதை விட, அந்த ஆட்சி அதிகாரத்தில் அமர்வதற்கு காரணமாக இருந்த விசிக, காங்கிரஸ் மற்றும் இடதுசாரி தோழமை கட்சிகளை நோக்கி பொதுவெளியில் கேள்விகளை எழுப்ப வேண்டும். “மக்களுக்கு புதிய விடியலை தருவோம் என்று சொல்லிவிட்டு, இப்படிப்பட்ட ஒரு நிர்வாக திறமையற்ற ஆட்சிக்கு தான் நீங்கள் அனைவரும் நிபந்தனையற்ற ஆதரவை கொடுத்தீர்களா?” என்று பழைய கூட்டணி கட்சிகளை பார்த்துக் கேள்வி கேட்டால், அந்த தலைவர்கள் மக்கள் மத்தியில் பதில் சொல்ல முடியாமல் நிச்சயம் திணறி போவார்கள். இந்த உத்திதான் அந்த மாற்று அணியின் பலத்தை குறைப்பதற்கான சரியான வழியாக இருந்திருக்க முடியும்.
ஆனால், இந்த எளிய அரசியல் சாணக்கியத்தனத்தை புரிந்து கொள்ளாத திமுக தலைமை, தற்பொழுது நேரடியாக முதலமைச்சர் விஜய் மற்றும் தவெக அரசுடன் நேருக்கு நேர் மோதுவதையே தனது வழக்கமான பாணியாக கொண்டுள்ளது. புதிய அரசிற்கு மக்கள் மத்தியில் இருக்கும் தற்போதைய அமோக ஆதரவையும் எழுச்சியையும் கணக்கில் கொள்ளாமல், திமுக நேரடியாக வம்புக்கு செல்லும் போது அது அவர்களுக்கு பின்னடைவாகவே முடிகிறது. திமுகவின் இந்த நேரடி தாக்குதல்களை பார்க்கும் சாமானிய மக்களே, சமூக வலைத்தளங்களிலும் பொதுவெளியிலும் திமுகவிற்கு அதிரடியாக பதிலடி கொடுத்து, அவர்களின் விமர்சனங்களை அடியோடு ஆஃப் செய்துவிடுகிறார்கள். அதுமட்டுமின்றி நீ மட்டும் என்ன யோக்கியமா? உன் ஆட்சியில் இதைவிட மோசமாக நடந்ததே என்று பதிலடி கொடுக்கின்றனர்.
ஒரு புதிய அரசு பொறுப்பேற்று செயல்படும் போது, ஆரம்ப கட்டத்தில் மக்கள் மத்தியில் அதற்கு ஒரு நன்மதிப்பு இருக்கவே செய்யும்; அந்த நேரத்தில் நேரடியாக மோதாமல், அவர்களின் கூட்டணி கட்டமைப்பில் இருக்கும் பலவீனங்களை தாக்குவதுதான் ஒரு முதிர்ச்சியடைந்த அரசியல் கட்சிக்கு அழகாகும். ஆனால், திமுகவின் தற்போதைய மேடை பேச்சுகளும், உடன்பிறப்புகளின் சமூக ஊடக பதிவுகளும் தவெக-வின் மீதான தனிப்பட்ட வெறுப்பை உமிழ்வது போல மட்டுமே காட்சியளிக்கின்றன. இதனால், நடுநிலையான வாக்காளர்களின் பார்வையில் திமுக ஒரு சகிப்புத்தன்மையற்ற கட்சியாக தெரிகிறதே தவிர, அவர்களின் விமர்சனத்தில் இருக்கும் நியாயங்கள் மக்களைச் சென்றடைவதில்லை.
இத்தகைய தவறான அணுகுமுறையினால், திமுக தவெகவின் செல்வாக்கை மேலும் உயர்த்துகிறதே தவிர, தங்களது இழந்த செல்வாக்கை மீட்பதற்கு இது எவ்விதத்திலும் உதவ போவதில்லை. பழைய கூட்டணி கட்சிகளான விசிகவோ அல்லது காங்கிரஸோ தவெக ஆட்சியில் நடக்கும் தவறுகளை நியாயப்படுத்த முடியாமல் தவிக்கும் போது, அவர்களை கேள்வி கேட்டுத் தனிமைப்படுத்துவதுதான் திமுகவிற்கு சாதகமான சூழலை உருவாக்கியிருக்கும். இந்த நுணுக்கமான அரசியல் கணக்கு ஏன் திமுகவின் மூத்த தலைவர்களுக்கோ அல்லது அவர்களின் வியூக வகுப்பாளர்களுக்கோ புரியாமல் போனது என்பதுதான் தற்போதைய அரசியல் புதிராக நீடிக்கிறது.
முடிவாக பார்க்கும்போது, மாறிவரும் காலத்திற்கும் தலைமுறைக்கும் ஏற்ப தங்களது அரசியல் பாணியை மாற்றி கொள்ளாததுதான் திமுகவின் தற்போதைய சரிவிற்கு முக்கிய காரணமாக அமைகிறது. எதிரணியின் பலத்தை உடைக்க வேண்டிய இடத்தில், தவெகவிடம் நேரடியாக மோதி தொடர்ந்து மக்களிடம் இருந்தே வாங்கி கட்டி கொள்ளும் இந்த எதார்த்தம் இன்னமும் திமுகவிற்கு புரியவில்லை என்றுதான் சொல்ல வேண்டும். கடந்த கால தோல்விகளில் இருந்தும், தற்போதைய மக்கள் மனநிலையில் இருந்தும் பாடம் கற்று கொள்ளத் தவறிய திமுகவிற்கு, இனிமேலும் இந்த அரசியல் நுணுக்கம் புரிவதற்கோ அல்லது அவர்கள் தங்களை திருத்திக் கொள்வதற்கோ வாய்ப்புகள் இருப்பதாக தெரியவில்லை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
