தமிழ்நாட்டு அரசியல் அரங்கில் டெல்லி பாஜக தலைமையின் நகர்வுகளும், குறிப்பாக அமித்ஷாவின் தேர்தல் வியூகங்களும் எப்போதும் விவாத பொருளாகவே இருந்து வருகின்றன. தற்போதைய அரசியல் சூழலை கவனிப்பவர்கள் பலர், தமிழ்நாட்டில் அமித்ஷாவின் சாணக்கியத்தனம் தோற்றுவிட்டது என்று அவசரப்பட்டு விமர்சித்து வருகின்றனர். ஆனால், ஆழமான அரசியல் நோக்குடன் பார்ப்பவர்களுக்குத்தான் உண்மை புரியும்; தமிழ்நாட்டில் பாஜகவின் அசல் நோக்கங்கள் என்னென்ன என்பதும், அவை தற்பொழுது எப்படி திரைமறைவில் நிறைவேறியுள்ளன என்பதும் தற்போதைய கள எதார்த்தத்தை உற்றுநோக்கினால் மட்டுமே தெளிவாக தெரியவரும்.
அமித்ஷா தமிழ்நாட்டில் பிரதானமாக மூன்று இலக்குகளை தன் மனதில் கொண்டிருந்தார்; முதலாவதாக மாநிலத்தில் ஒரு தனிப்பெரும் கட்சி ஆட்சியை முடிவுக்கு கொண்டுவந்து கூட்டணி ஆட்சியை உருவாக்குவது, இரண்டாவதாக பலவீனமான அதிமுகவின் கட்டமைப்பை முழுமையாக சிதைப்பது, மூன்றாவதாக திமுகவின் அசுர பலமிக்க கூட்டணி கோட்டையை உடைத்தெறிவது. இந்த மூன்றையும் பாஜக தனது சொந்த பலத்தை கொண்டு நேரடியாக செய்து முடிக்கவில்லை என்றாலும், நேற்று வந்த புதிய சக்தியான தவெக அதனை மிக கச்சிதமாக செய்து முடித்துவிட்டதல்லவா? பாஜக எதனை செய்ய நினைத்ததோ, அதனைத் தவெக தற்பொழுது களத்தில் அரங்கேற்றியுள்ளது.
இந்த அதிரடி மாற்றங்களின் விளைவாக, தமிழ்நாட்டின் பிரதான எதிர்க்கட்சியான அதிமுக தற்பொழுது கிட்டத்தட்ட முழுமையாக உடைக்கப்பட்டு, அதன் அரசியல் எதிர்காலமே கேள்விக்குறியாக்கப்பட்டுள்ளது. மறுபுறம், எவராலும் அசைக்க முடியாது என்று மார்தட்டி கொண்டிருக்க திமுகவின் கூட்டணியும் தவெக-வின் வரவால் சுக்குநூறாக உடைந்து சிதறிவிட்டது. தற்போதைய நிலவரப்படி, ஆளும் திமுக கூட்டணியில் தேமுதிகவை தவிர வேறு எந்தவொரு பலமான அரசியல் கட்சியும் எஞ்சி நிற்கவில்லை என்பதுதான் தற்போதைய எதார்த்தமான உண்மை. ஆக மொத்தம், அமித்ஷா தனது திரைமறைவு கணக்குகளின் மூலம் என்னவெல்லாம் நடக்க வேண்டும் என்று திட்டமிட்டாரோ, அவை அனைத்தும் தற்பொழுது தமிழ்நாட்டில் தடையின்றி நடந்து முடிந்துவிட்டன.
பாஜகவின் நேரடி பங்களிப்பு இல்லாமலேயே தவெக மூலம் தங்களது முதல் கட்ட இலக்குகள் அனைத்தும் நிறைவேறிவிட்டதை டெல்லி தலைமை தற்பொழுது வேடிக்கை பார்த்து கொண்டிருக்கிறது. ஆனால், இதோடு அமித்ஷாவின் வியூகங்கள் முடிந்துவிட்டதாக பழைய அரசியல்வாதிகள் நினைத்தால் அது அவர்களின் முதிர்ச்சியற்ற தன்மையையே காட்டும். எதிராளிகளை ஒருவருக்குள் ஒருவர் மோதவிட்டு, இருவரையும் பலவீனப்படுத்துவதுதான் சாணக்கியத்தனம். அந்த வகையில், திமுக மற்றும் அதிமுக ஆகிய இரு திராவிட கட்சிகளையும் தவெக மூலமாக வீழ்த்திய பிறகு, அமித்ஷாவின் அடுத்த கட்ட ஆட்டம் என்பது நிச்சயம் தவெக-வின் பக்கம்தான் திரும்ப போகிறது என்பதில் எவ்வித சந்தேகமும் இல்லை.
இதற்கு மிகச்சிறந்த உதாரணம்தான், அண்மையில் டெல்லி சென்ற தமிழக முதலமைச்சர் விஜய் அவர்களை அமித்ஷா சந்திக்க மறுத்த அந்த அதிரடி நிகழ்வு. தவெக-வின் வளர்ச்சியை தங்களுக்கு சாதகமாக பயன்படுத்தி கொண்டாலும், அடுத்த கட்டமாக அந்த புதிய சக்தியையும் தங்களது கட்டுப்பாட்டிற்குள் கொண்டு வருவதற்கான முதல் பந்து தான் இந்த சந்திப்பு மறுப்பு என்று அரசியல் நோக்கர்கள் கருதுகின்றனர். இது வெறும் ஆரம்பம் மட்டுமே; தன்னை தேடி வரும் தலைவர்களை தட்டிக்கழிப்பதன் மூலம், டெல்லி தனது அடுத்த கட்ட அரசியல் நகர்வுகளுக்கான மிரட்டலான சமிக்ஞையை விடுத்துள்ளது.
இனிவரும் காலங்களில், தமிழ்நாட்டு அரசியல் களம் இன்னும் பல அதிரடி திருப்பங்களை சந்திக்க காத்திருக்கிறது; அமித்ஷாவின் அடுத்தடுத்த வியூகங்களும், நிர்வாக ரீதியிலான அழுத்தங்களும் ஒன்னொன்னாக அரங்கேற தொடங்கும் போது தவெக அரசும் பல சவால்களை எதிர்கொள்ள வேண்டியிருக்கும். திராவிட கட்சிகளை ஒழித்துக்கட்டியாகிவிட்டது என்ற மிதப்பில் இருக்கும் புதிய தலைமைகளுக்கு, டெல்லியின் அடுத்த கட்ட ஆட்டங்கள் நிச்சயம் ஒரு மிகப்பெரிய அரசியல் பாடமாக அமையும். தற்போதைக்குத் தாங்கள் நினைத்ததை சாதித்துக் கொண்ட பாஜக, வருங்கால தமிழ்நாட்டைத் தனது தாளத்திற்கு ஏற்ப ஆட வைக்கத் தேவையான அனைத்துப் பகடைகளையும் கச்சிதமாக நகர்த்தத் தொடங்கிவிட்டது என்பது மட்டும் அப்பட்டமாக தெரிகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
