தமிழ்நாட்டு அரசியல் வரலாற்றில் ஒரு முதலமைச்சரின் ஆளுமைத்திறன், நிர்வாக வேகம் மற்றும் அவரது ஆட்சியின் திசைவழி ஆகியவற்றை தீர்மானிக்கும் மிக முக்கிய காரணியாக விளங்குவது காவல்துறை மற்றும் உள்துறை அமைச்சகம் ஆகும். ஒரு முதலமைச்சர் எவ்வளவு தீவிரமாக இருக்கிறார், சட்டம் ஒழுங்கு பராமரிப்பில் எந்த அளவிற்கு கண்டிப்பு காட்டுகிறார் என்பதை அவர் இந்த துறையை எப்படி கையாள்கிறார் என்பதை வைத்தே மக்கள் எடை போடுகிறார்கள். தமிழகத்தை ஆண்ட முக்கிய தலைவர்கள் பலரும் இந்த துறையைத் தங்கள் வசம் வைத்திருந்ததற்கு பின்னால் மிகப்பெரிய அரசியல் மற்றும் நிர்வாக காரணங்கள் உள்ளன.
காவல்துறை என்பது வெறும் குற்றங்களை தடுக்கும் அமைப்பு மட்டுமல்ல, அது ஒரு அரசின் பலத்தையும், மக்களின் பாதுகாப்பு உணர்வையும் பிரதிபலிக்கும் கண்ணாடியாகும். அதனால்தான், ஆட்சி கட்டிலில் அமரும் முதல்வர்கள் இந்தத் அதிகார மையத்தை தங்கள் நேரடி கட்டுப்பாட்டில் வைத்திருக்க எப்போதும் விரும்புவார்கள்.
முன்னாள் முதலமைச்சர் செல்வி ஜெ. ஜெயலலிதா அவர்களின் ஆட்சிக்காலத்தை இதற்கு ஒரு சிறந்த உதாரணமாக கூறலாம். அவர் முதலமைச்சராக இருந்தபோதெல்லாம் உள்துறை மற்றும் காவல்துறையை எப்போதும் தனது சொந்த கட்டுப்பாட்டிலேயே வைத்திருந்தார். சட்டம் ஒழுங்கு விஷயத்தில் அவர் காட்டிய கடுமையான போக்கின் காரணமாகவே, “அம்மா ஆட்சியில் ரவுடிகள் இவ்வளவு தைரியமாக நடமாட முடியாது” என்ற பேச்சு இன்றும் பொதுமக்கள் மத்தியில் பரவலாக நிலவுகிறது. குற்றப்பின்னணி கொண்டவர்களையும், சட்டம் ஒழுங்குக்கு குந்தகம் விளைவிப்பவர்களையும் இரும்புக்கரம் கொண்டு ஒடுக்கியதால், அவரது நிர்வாகம் மிகவும் வலிமையானதாக பார்க்கப்பட்டது. ஒரு முதலமைச்சரின் நேரடி கண்காணிப்பில் காவல்துறை இருக்கும்போது, அதன் செயல்பாடுகளில் வேகம் கூடும் என்பதையும், தவறு செய்பவர்களுக்கு அரசு மீதான பயம் அதிகரிக்கும் என்பதையும் அவரது காலத்து நிர்வாக நடைமுறைகள் உணர்த்தின.
முந்தைய முதலமைச்சர் மு.க. ஸ்டாலின் அவர்களும் அதே பாணியை பின்பற்றி உள்துறையை தன் வசம் தான் வைத்துள்ளார். இருப்பினும், அவரது ஆட்சிக்காலத்தில் சட்டம் ஒழுங்கு, போதைப்பொருள் புழக்கம் மற்றும் பெண்களுக்கு எதிரான குற்றங்கள் போன்ற மூன்று முக்கிய விவகாரங்களில் அரசு இன்னும் தீவிரமாக செயல்பட்டிருக்க வேண்டும் என்ற விமர்சனங்கள் மக்கள் மத்தியில் எழுந்தன. இந்த குறிப்பிட்ட துறைகளில் அரசு போதிய வலிமையை காட்டவில்லை என்றும், அதனால் குற்றங்களின் எண்ணிக்கை அதிகரிப்பதாகவும் எதிர்க்கட்சிகளும் பொதுமக்களும் பல நேரங்களில் ஆதங்கப்பட்டனர். முதலமைச்சர் துறையை தன் வசம் வைத்திருந்தாலும், கள நிலவரத்தில் மக்கள் எதிர்பார்த்த அளவிற்கான முழுமையான பாதுகாப்பும், கண்டிப்பும் பிரதிபலிக்கவில்லை என்ற அதிருப்தி பரவலாக விவாதிக்கப்படும் ஒரு பொருளாக மாறியது.
இந்த அரசியல் பின்னணிகளையும், முந்தைய அரசுகளின் மீதான விமர்சனங்களையும் மிக ஆழமாக கவனித்தே தமிழக முதல்வர் விஜய் தனது எதிர்கால நிர்வாக திட்டங்களை வகுத்திருப்பது போல் தெரிகிறது. அவர் காவல்துறை மற்றும் உள்துறையை தன் வசம் வைத்திருப்பது மட்டுமன்றி, அதோடு சேர்த்து பெண்கள் நலன், இளைஞர்கள் நலன், குழந்தைகள் நலன் போன்ற மிக முக்கியமான சமூக நலத்துறைகளையும் தனது நேரடி கட்டுப்பாட்டிலேயே வைத்திருக்க முடிவெடுத்திருக்கிறார். முந்தைய ஆட்சிகள் மக்கள் மத்தியில் எங்கே பலவீனமாக தெரிந்தன, எதனால் விமர்சனங்களுக்கு உள்ளாயின என்பதை அவர் தெளிவாக புரிந்து வைத்துள்ளார் என்பதையே இந்த துறை ஒதுக்கீட்டு முடிவு காட்டுகிறது. தன் ஆட்சியில் இந்தத் தவறுகள் எக்காரணம் கொண்டும் நடந்துவிடக் கூடாது என்பதில் அவர் உறுதியாக இருப்பதை இது வெளிப்படுத்துகிறது.
காவல்துறை சரியாக செயல்பட்டால் ரவுடிகள் ஒடுக்கப்படுவார்கள், பெண்கள் பாதுகாப்பாக உணர்வார்கள், போதைப்பொருள் நடமாட்டம் முற்றிலும் கட்டுப்படுத்தப்படும் என்பது நிதர்சனம். ஆனால், அதே துறையின் கீழ் தவறு நடக்கும்போது மக்கள் நேராக முதலமைச்சரை நோக்கியே கேள்வி கணைகளை தொடுப்பார்கள். இந்த இக்கட்டான சூழலையும், வரவிருக்கும் சவால்களையும் தீர்க்கமாக தெரிந்திருந்தும் விஜய் இந்த முக்கிய துறைகளைத் தன் கைகளில் எடுத்திருப்பது சாதாரண விஷயமல்ல. இது அவரது பொறுப்புணர்ச்சியையும், மக்களுக்கு பாதுகாப்பான ஒரு சூழலைத் தர வேண்டும் என்ற அவரது தீவிரமான எண்ணத்தையும் காட்டுகிறது. இந்தத் துணிச்சலான நிர்வாக அணுகுமுறை, தமிழக அரசியலில் ஒரு புதிய பொறுப்புக்கூறல் கலாச்சாரத்தை உருவாக்கும் என்பதில் ஐயமில்லை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
