2026 தமிழக சட்டமன்ற தேர்தல் முடிவுகள் வெளியாகி, தமிழக வெற்றிக் கழகம் 108 இடங்களை கைப்பற்றி ஆட்சி அமைத்தபோது, பலரும் இதனை ஒரு சாதாரண வெற்றியாகவே பார்த்தனர். ஆனால், நாளாக நாளாக இந்த 108 என்ற எண்ணிக்கைக்கு பின்னால் தமிழக மக்கள் எவ்வளவு பெரிய அரசியல் ராஜதந்திரத்தோடு வாக்களித்திருக்கிறார்கள் என்ற உண்மை தற்போது மெல்ல வெளிவர தொடங்கியுள்ளது. தவெகவிற்கு மக்கள் முழுமையான பெரும்பான்மையான 118 இடங்களை வழங்காமல், 108 இடங்களை மட்டும் கொடுத்ததற்கு பின்னால் ஒரு மிக ஆழமான, தீர்க்கதரிசனம் மிக்க அரசியல் காரணம் மறைந்திருக்கிறது என்பதை தற்போதைய அரசியல் நகர்வுகள் நமக்கு தெளிவுபடுத்துகின்றன.
ஒருவேளை தமிழக மக்கள் தவெகவிற்கு தனிப் பெரும்பான்மை பலமான 118 இடங்களை அள்ளி தந்திருந்தால், தமிழக அரசியலில் இந்த அளவுக்கு அதிரடியான மாற்றங்கள் சாத்தியமாகி இருக்காது. தவெகவிற்கு தனித்து ஆட்சி அமைக்க இன்னும் சில இடங்கள் தேவை என்ற இக்கட்டான நிலை உருவானதால் தான், தமிழகத்தின் பாரம்பரிய கூட்டணிகளின் அஸ்திவாரம் ஆட தொடங்கியது. இந்த மெஜாரிட்டி இல்லாத சூழலை பயன்படுத்தித்தான், திமுக கூட்டணியில் நீண்டகாலமாக நீடித்து வந்த முரண்பாடுகள் வெடித்து, விசிக, காங்கிரஸ், ஐயூஎம்எல் மற்றும் இடதுசாரிகள் போன்ற கட்சிகள் திமுகவை விட்டு வெளியேறி தவெக அரசிற்கு ஆதரவளிக்கும் நிலை உருவானது. இதன் விளைவாக, பல ஆண்டுகளாக தமிழகத்தை ஆட்டிப்படைத்த திமுக கூட்டணி முற்றிலும் உடைந்து, இன்று திமுக தனித்து விடப்படும் நிலை ஏற்பட்டுள்ளது.
இதேபோல், தவெகவிற்கு ஏற்பட்ட இந்த எண்சார்ந்த நெருக்கடியை பயன்படுத்தி பிரதான எதிர்க்கட்சியான அதிமுகவிலும் மிகப்பெரிய பிளவு அரங்கேறியது. தவெகவிற்கு ஆட்சி அமைக்க தேவையான ஆதரவை வழங்க அதிமுகவில் இருந்து ஒரு பிரிவு உடைந்து வெளியேறி, சுமார் 25 சட்டமன்ற உறுப்பினர்கள் முதலமைச்சர் விஜய்யின் தலைமைக்கு தங்களது நிபந்தனையற்ற ஆதரவை வழங்கினர். மக்கள் 108 இடங்களை மட்டுமே கொடுத்ததால் தான், அதிமுகவிற்குள் இருந்த உட்கட்சிப் பூசல்களும், அதிருப்திகளும் வெளிச்சத்திற்கு வந்து, அந்த பாரம்பரிய கட்சியிலும் ஒரு மிகப்பெரிய அரசியல் மாற்றம் சாத்தியமானது.
ஒருவேளை மக்கள் உணர்ச்சிவசப்பட்டு விஜய்க்கு நேரடியாகவே 118 அல்லது அதற்கு மேற்பட்ட இடங்களை கொடுத்து தனி பெரும்பான்மையுடன் ஆட்சியில் அமர வைத்திருந்தால், இந்த இரு பெரும் பாரம்பரிய கூட்டணிகளும் தங்களது பழைய பலத்துடனேயே அப்படியே நீடித்திருக்கும். திமுகவும் அதிமுகவும் தங்களது கூட்டணி கோட்டைகளை தக்கவைத்து கொண்டு, புதிய அரசிற்கு தொடர்ந்து முட்டுக்கட்டைகளை போட்டுக் கொண்டே இருந்திருப்பார்கள். ஆனால், மக்கள் தவெகவிற்கு பலத்தை கொடுத்து, அதே நேரத்தில் ஒரு சிறிய முடக்கத்தையும் ஏற்படுத்தியதால் தான், தமிழகத்தின் ஒட்டுமொத்த அரசியல் சதுரங்க ஆட்டமும் தலைகீழாக மாறியது.
இதன் மூலம் தமிழக மக்கள் தேர்தல் களத்தில் ‘ஒரே கல்லில் மூன்று மாங்காய்’ அடித்து தங்களது அசாத்தியமான அரசியல் முதிர்ச்சியை நிரூபித்து காட்டியுள்ளனர். முதல் மாங்காயாக, தாங்கள் விரும்பியபடி ஒரு நேர்மையான, தூய்மையான புதிய ஆட்சியை முதலமைச்சர் விஜய் கையில் கொடுத்து அழகு பார்த்துள்ளனர். இரண்டாவது மாங்காயாக, தங்களது வாக்கு வங்கியை தந்திரமாகப் பயன்படுத்தி வந்த திமுகவின் மெகா கூட்டணியை முற்றிலும் ‘பணால்’ ஆக்கி, அக்கட்சியை தனிமைப்படுத்தியுள்ளனர். மூன்றாவது மாங்காயாக, உட்கட்சி பூசல்களால் தவித்த அதிமுகவின் கூட்டணியையும் அதன் பலத்தையும் சிதறடித்து அதையும் ‘பணால்’ ஆக்கியுள்ளனர்.
இத்தகையதொரு நுணுக்கமான அரசியல் மாற்றத்தை வெறும் பண பலத்தாலோ அல்லது அதிகார பலத்தாலோ எந்தவொரு கட்சியும் திட்டமிட்டு செய்திருக்க முடியாது; இதனை தமிழக மக்கள் தங்களது ஒற்றை விரல் புரட்சியின் மூலம் மிக சத்தமில்லாமல் செய்து காட்டியுள்ளனர். புதிய ஆட்சிக்கு வழிகாட்டி, அதே நேரத்தில் ஐம்பதாண்டு கால திராவிட கட்சிகளின் ஏகபோக கூட்டணி ஆதிக்கத்திற்கும் முற்றுப்புள்ளி வைத்த இந்த தேர்தல் முடிவுகள், “இதுதாண்டா தமிழக மக்கள்” என்று ஒட்டுமொத்த இந்திய அரசியலையும் வியந்து பார்க்க வைக்கும் ஒரு மாபெரும் வரலாற்று சான்றாக மாறியுள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
