தமிழக அரசியல் வரலாற்றில் 2026 சட்டமன்ற தேர்தல் முடிவுகள் ஒரு புதிய சகாப்தத்தின் தொடக்கமாகவும், பல தசாப்த கால வரலாற்றை தகர்த்தெறிந்த ஒரு நிகழ்வாகவும் பதிவாகியுள்ளன. கடந்த 50 ஆண்டுகால தமிழக அரசியலை உற்றுநோக்கினால், ஆளுங்கட்சியாக இருக்கும்போது திமுக மீண்டும் ஆட்சியை பிடித்த சரித்திரமே இல்லை என்கிற கசப்பான உண்மை இம்முறையும் மு.க. ஸ்டாலின் தலைமையிலான அரசுக்கு தொடர்கதையாகியுள்ளது. திமுக பலமுறை ஆட்சியில் இருந்திருந்தாலும், தொடர்ச்சியாக இரண்டாவது முறை வெற்றி பெற்று ஆட்சியை தக்கவைக்க முடியாமல் போன அதே வரலாறு இப்போதும் எதிரொலித்துள்ளது.
அதிமுக முன்னாள் பொதுச்செயலாளர் ஜெயலலிதாவுக்கு பிறகு, தமிழகத்தில் ஒரு முதலமைச்சர் பதவியில் இருக்கும்போதே சட்டமன்ற தேர்தலில் தோல்வியை தழுவுவது இதுவே முதன்முறை. மக்கள் மாற்றத்தை விரும்பினால் அது ஆளுங்கட்சிக்கு எதிராக எவ்வளவு வலிமையாக இருக்கும் என்பதற்கு முதலமைச்சர் ஸ்டாலினின் இந்த தோல்வி ஒரு சான்றாக மாறியுள்ளது.
திரையுலகிலிருந்து அரசியலுக்கு வந்து, கட்சி ஆரம்பித்த குறுகிய காலத்திலேயே ஆட்சி கட்டிலை பிடித்த பெருமை எம்.ஜி.ஆருக்கு பிறகு நடிகர் விஜய்க்கு மட்டுமே கிடைத்துள்ளது. பல நடிகர்கள் கட்சி ஆரம்பித்து அரசியலில் தடம் பதிக்க முயன்றாலும், எம்.ஜி.ஆர் 1977-ல் நிகழ்த்திய அதே மாயாஜாலத்தை 2026-ல் விஜய் நிகழ்த்தி காட்டியுள்ளார். சுமார் 50 ஆண்டுகளுக்கு பிறகு ஒரு சினிமா நட்சத்திரம் தமிழகத்தின் அதிகார மையத்தை கைப்பற்றியிருப்பது, விஜய்யின் அரசியல் ஆளுமை மக்கள் மத்தியில் எந்தளவுக்கு வேரூன்றியுள்ளது என்பதை காட்டுகிறது.
எம்.ஜி.ஆருக்கும் விஜய்க்கும் இடையிலான இந்த வெற்றியை ஒப்பிடும்போது, விஜய்யின் போராட்டம் மிகவும் சவாலானது என்பதை அரசியல் நோக்கர்கள் சுட்டிக்காட்டுகின்றனர். 1972-ல் எம்.ஜி.ஆர் கட்சி ஆரம்பித்தபோது அவருக்கு திமுக மட்டுமே பிரதான எதிரியாக இருந்தது. ஆனால், விஜய்யை பொறுத்தவரை தாராள நிதி பலம் கொண்ட திமுக, வலுவான வாக்கு வங்கியை கொண்ட அதிமுக மற்றும் மத்தியில் ஆளுங்கட்சியாக இருக்கும் பாஜக என மூன்று பெரும் சக்திகளை ஒரே நேரத்தில் எதிர்கொள்ள வேண்டியிருந்தது. இந்த மும்முனை தாக்குதலையும் முறியடித்து விஜய் வெற்றி பெற்றிருப்பது அவரது அரசியல் வியூகத்தின் வெற்றியாகும்.
முடிவாக, 2026 தேர்தல் என்பது வெறும் ஆட்சி மாற்றம் மட்டுமல்ல, அது தமிழகத்தின் அரசியல் கட்டமைப்பையே மாற்றியமைத்த ஒரு புரட்சியாகும். “ஒரே கல்லில் மூன்று மாங்காய்” என்பதை போல, திமுகவின் ஆட்சிக்கு முற்றுப்புள்ளி வைத்து, அதிமுகவை பின்னுக்கு தள்ளி, பாஜகவின் காலூன்றும் முயற்சியையும் முறியடித்துள்ளார் விஜய். அரை நூற்றாண்டுகால தமிழக அரசியலில் நிலவி வந்த பல பிம்பங்களை உடைத்தெறிந்துள்ள இந்த வெற்றி, விஜய்யை எம்.ஜி.ஆருக்கு இணையான ஒரு மக்கள் தலைவராக வரலாற்றில் நிலைநிறுத்தியுள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
