வங்கதேசத்தில் அண்மையில் நடந்து முடிந்த நாடாளுமன்றத் தேர்தல் அந்த நாட்டின் அரசியல் வரலாற்றில் ஒரு புதிய அத்தியாயத்தை தொடங்கியுள்ளது. 17 ஆண்டுகால நாடுகடத்தப்பட்ட வாழ்க்கைக்கு பிறகு நாடு திரும்பிய தாரிக் ரஹ்மான் தலைமையிலான பங்களாதேஷ் தேசிய கட்சி 300 இடங்களில் 212-க்கும் அதிகமான இடங்களை கைப்பற்றி அமோக வெற்றி பெற்றுள்ளது. இந்த வெற்றியை தொடர்ந்து தாரிக் ரஹ்மான் வங்கதேசத்தின் அடுத்த பிரதமராக பொறுப்பேற்க உள்ளார். “மக்களால் தேர்ந்தெடுக்கப்பட்ட ஒரு தலைவர்” என்ற அங்கீகாரத்தை தாரிக் ரஹ்மான் பெற்றுள்ள நிலையில், இந்தியா இதனை வரவேற்றுள்ளது. ஜனநாயக ரீதியாக தேர்ந்தெடுக்கப்பட்ட ஒரு அரசுடன் இணைந்து செயல்படுவதே இந்தியாவின் முதன்மையான நோக்கம் என்பதால், பிரதமர் நரேந்திர மோடி அவர்கள் தாரிக் ரஹ்மானுக்கு தனது வாழ்த்துகளைத் தெரிவித்துள்ளார்.
இந்தத் தேர்தலின் முடிவுகள் கடந்த 2024-ம் ஆண்டு நடந்த மாணவர் புரட்சியை ஒரு புதிய கோணத்தில் பார்க்க வைக்கின்றன. ஷேக் ஹசீனாவின் ஆட்சியை வீழ்த்தி மிகப்பெரிய மாற்றத்தை கொண்டு வருவோம் என்று வீதியில் இறங்கி போராடிய மாணவர் அமைப்பான ‘நேஷனல் சிட்டிசன் பார்ட்டி’ வெறும் ஆறு இடங்களில் மட்டுமே வெற்றி பெற்றுள்ளது. இது அந்த மாணவர்களின் எழுச்சி ஒரு அரசியல் கருவியாக பயன்படுத்தப்பட்டு, இறுதியில் பாரம்பரிய அரசியல் கட்சிகளே அதிகாரத்தை கைப்பற்றியுள்ளதை காட்டுகிறது. “புரட்சி செய்தவர்கள் வீதியில் நிற்க, திட்டமிட்டவர்கள் கோட்டையில் அமர்கிறார்கள்” என்ற விமர்சனம் எழுந்துள்ள நிலையில், இந்த மாணவர் அமைப்பு விரைவில் கலைந்து பிரதான கட்சிகளுடன் இணையக்கூடும் என்று அரசியல் நோக்கர்கள் கணிக்கின்றனர்.
முகமது யூனுஸ் தலைமையிலான இடைக்கால அரசுக்கும், புதியதாக அமையப்போகும் தாரிக் ரஹ்மான் அரசுக்கும் இடையே பொறுப்புக்கூறல் என்பதில் மிகப்பெரிய வித்தியாசம் உள்ளது. முகமது யூனுஸின் ஆட்சியில் முழு அதிகாரம் இருந்தது, ஆனால் மக்களுக்கான பொறுப்புக்கூறல் இல்லை. அவர் அமெரிக்காவுடன் அவசர அவசரமாக மேற்கொண்ட வர்த்தக ஒப்பந்தங்கள் வங்கதேசத்திற்குஎந்த அளவுக்கு சாதகமாக இருக்கும் என்பது கேள்விக்குறியாக உள்ளது. ஆனால், தாரிக் ரஹ்மான் மக்களால் தேர்ந்தெடுக்கப்பட்டவர் என்பதால், அவர் எடுக்கும் ஒவ்வொரு முடிவுக்கும் பதில் சொல்ல வேண்டிய கட்டாயத்தில் இருக்கிறார். குறிப்பாக, யூனுஸ் ஆட்சியில் போடப்பட்ட ‘மர்மமான’ வர்த்தக ஒப்பந்தங்களை ஆய்வு செய்து சரிசெய்வதே தாரிக் ரஹ்மானின் முதல் சவாலாக இருக்கும்.
இந்தியாவை பொறுத்தவரை, இந்த தேர்தலில் ஒரு முக்கியமான ராஜதந்திர நகர்வை மேற்கொண்டது. வங்கதேச தேர்தல் ஆணையம் இந்தியாவை தேர்தல் பார்வையாளர்களை அனுப்புமாறு அழைத்திருந்தும், இந்தியா அதை நாசூக்காக மறுத்துவிட்டது. வங்கதேச உள்நாட்டு விவகாரங்களில் இந்தியா தலையிடுகிறது என்ற தேவையற்ற விமர்சனங்களை தவிர்க்கவே இந்த முடிவு எடுக்கப்பட்டது. இந்தியா ஒதுங்கி நின்றதால், இந்த தேர்தலின் முடிவுகளை எவராலும் கேள்வி கேட்க முடியவில்லை. இந்தியா, அமெரிக்கா மற்றும் சீனா ஆகிய மூன்று வல்லரசு நாடுகளும் தாரிக் ரஹ்மானின் வெற்றியை ஏற்றுக்கொண்டு வாழ்த்து தெரிவித்துள்ளன. இது புதிய அரசுக்கு சர்வதேச அளவில் ஒரு பலமான அங்கீகாரத்தைக் கொடுத்துள்ளது.
வங்கதேசத்தில் ஏற்பட்டுள்ள இந்த மாற்றம் பாகிஸ்தானிற்கு ஒரு மிகப்பெரிய பின்னடைவாக கருதப்படுகிறது. முகமது யூனுஸ் ஆட்சியில் இருந்தபோது, பாகிஸ்தானின் தூண்டுதலின் பேரில் இந்தியாவுக்கு எதிரான வெறுப்பு பிரச்சாரங்கள் முன்னெடுக்கப்பட்டன. ஆனால், தாரிக் ரஹ்மான் வங்கதேசத்தின் நலன் என்ற கொள்கையை முன்வைப்பதால், அவர் இந்தியாவுடன் இணக்கமான உறவை பேண விரும்புவதாகத் தெரிகிறது. ஏற்கனவே இந்தியா மற்றும் வங்கதேசம் இடையே மறைமுகப் பேச்சுவார்த்தைகள் மூலம் உறவை இயல்பு நிலைக்கு கொண்டு வரும் முயற்சிகள் தொடங்கிவிட்டன. வர்த்தகம் மற்றும் மக்கள் தொடர்புகளை மீண்டும் பலப்படுத்துவதே இரு நாடுகளின் தற்போதைய இலக்காக உள்ளது.
முடிவாக, ஷேக் ஹசீனா இத்தேர்தலை சட்டவிரோதமானது என்று விமர்சித்தாலும், சர்வதேச அங்கீகாரம் தாரிக் ரஹ்மானின் பக்கமே உள்ளது. வங்கதேசத்தில் ஒரு நிலையான ஜனநாயகம் அமைவதையே இந்தியா விரும்புகிறது. தாரிக் ரஹ்மான் தனது தேர்தல் அறிக்கையில் குறிப்பிட்டது போல, அண்டை நாடுகளுடன் நல்லுறவை பேணுவதன் மூலம் அந்த நாட்டின் பொருளாதாரத்தை சீரமைக்க முடியும். அடிப்படைவாத கட்சியான ஜமாத்-இ-இஸ்லாமி எதிர்க்கட்சியாக உருவெடுத்துள்ள சூழலில், தாரிக் ரஹ்மான் அந்த தீவிரவாத போக்குகளை எப்படி கையாள போகிறார் என்பதுதான் வரப்போகும் நாட்களில் இந்தியாவின் கவலையாக இருக்கும். இருப்பினும், ஒரு ஜனநாயக அரசுடன் பேச்சுவார்த்தை நடத்துவது இந்தியாவுக்கு எப்போதும் எளிதான காரியமே.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
