ஆப்கானிஸ்தான் எல்லையில் பதற்றம் நாளுக்கு நாள் அதிகரித்து வரும் நிலையில், பாகிஸ்தான் பாதுகாப்பு படைகள் சமீபத்தில் மேற்கொண்ட இரண்டு அதிரடி தாக்குதல்களில் 23 தீவிரவாதிகளை கொன்றதாக அறிவித்துள்ளன. கைபர் பக்துன்குவா மாகாணத்தில் உள்ள குரம் மாவட்டத்தில் இந்த சம்பவங்கள் நடந்துள்ளன.
முதல் கட்ட தாக்குதலில் கடும் துப்பாக்கி சண்டை வெடித்தது. இதில் 12 தீவிரவாதிகள் கொல்லப்பட்டனர். பாகிஸ்தான் தரப்பில் எந்தவொரு உயிரிழப்பும் ஏற்படவில்லை என தெரிவிக்கப்பட்டுள்ளது.
முதல் தாக்குதலுக்கு சில மணி நேரங்களுக்கு பிறகு, அதே பகுதியில் மேற்கொள்ளப்பட்ட இரண்டாவது தாக்குதலில் மேலும் 11 தீவிரவாதிகள் கொல்லப்பட்டனர்.
தடை செய்யப்பட்ட குழுக்களுக்கு எதிராக இராணுவம் தொடர்ந்து மேற்கொண்டு வரும் இலக்கு வைக்கப்பட்ட ஒடுக்குமுறையின் ஒரு பகுதியாகவே இந்த தாக்குதல்கள் நடத்தப்பட்டதாக பாகிஸ்தான் அதிகாரிகள் தெரிவித்துள்ளனர். இதில், முக்கியமாக குறிவைக்கப்பட்ட குழுக்களில், தெஹ்ரீக்-இ-தாலிபான் பாகிஸ்தான் (TTP) எனப்படும் பாகிஸ்தான் தாலிபான்களும் அடங்குவர்.
இந்த அதிரடி நடவடிக்கைகள், நவம்பர் 11 அன்று இஸ்லாமாபாத்தில் நடந்த தற்கொலை தாக்குதலுக்கு பதிலடியாக நடத்தப்பட்ட தாக்குதலாக பார்க்கப்படுகிறது. இந்த சம்பவம் அரசியல் ரீதியான பழி சுமத்தும் நடவடிக்கைகளையும் தூண்டியுள்ளது.
பாகிஸ்தான் பிரதமர் ஷெபாஸ் ஷெரீப் இஸ்லாமாபாத் தாக்குதலுக்கு இந்தியாவை குற்றம் சாட்டியுள்ளார். பாதுகாப்பு அமைச்சர் குவாஜா ஆசிஃப் ஆப்கானிஸ்தான் மீது பழி சுமத்தியுள்ளார். இந்த இரண்டு குற்றச்சாட்டுகளை இந்தியாவும் ஆப்கானிஸ்தானும் மறுத்துள்ளன. ஆப்கானிஸ்தான் தனது இறையாண்மையை மீறுவதற்கு எதிராக பாகிஸ்தானுக்கு எச்சரிக்கையும் விடுத்துள்ளது.
பதற்றத்தைத் தணிக்க நடந்த முயற்சிகள் இதுவரை எவ்விதப் பலனையும் தரவில்லை. சமீபத்தில் துருக்கியின் இஸ்தான்புல் நகரில் ஆப்கானிஸ்தானுக்கும் பாகிஸ்தானுக்கும் இடையில் நடந்த சமாதான பேச்சுவார்த்தைகள் எந்த தீர்மானமும் இன்றி முடிவடைந்தன. இருப்பினும், இரு தரப்பினரும் ஒரு நிலையற்ற போர்நிறுத்தம் தொடர்வதாக கூறியுள்ளனர்.
2021-ல் ஆப்கானிஸ்தானில் தாலிபான்கள் ஆட்சியை கைப்பற்றியதில் இருந்து, பாகிஸ்தான் தாலிபான்கள் அதிக தைரியம் அடைந்து, பாகிஸ்தான் முழுவதும் தாக்குதல்களை தீவிரப்படுத்தி வருகின்றனர். இஸ்லாமாபாத்தில் உள்ள அரசாங்கத்தை கவிழ்ப்பதே இவர்களின் இலக்காக உள்ளது.
பாகிஸ்தான் படைகள் எல்லையில் தொடர்ந்து நடவடிக்கைகளை மேற்கொண்டு வரும் நிலையில், இந்த பகுதிகளில் வசிக்கும் மக்கள் ஒருவித அச்சத்துடன் போராடி வருகின்றனர். இந்த தாக்குதலுக்கு பாகிஸ்தான் பழிவாங்கப்படுமா? அல்லது இரு தரப்புக்கும் இடையே பேச்சுவார்த்தை நடந்து ஒரு சுமூக உடன்பாடு ஏற்படுமா? என்பதை பொறுத்திருந்து பார்ப்போம்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
