தமிழக அரசியலில் சமீபகாலமாக அரங்கேறி வரும் அதிரடி மாற்றங்களுக்கு பின்னால் ஒரு மிகப்பெரிய நிழல் யுத்தம் நடைபெற்று வருவதாக அரசியல் நோக்கர்கள் கருதுகின்றனர். குறிப்பாக, சூப்பர் ஸ்டார் ரஜினிகாந்த் முதலமைச்சர் மு.க.ஸ்டாலினை நேரில் சந்தித்து பேசிய பிறகுதான், தமிழக வெற்றி கழகத்தின் ஆட்சி அமைக்கும் முயற்சிக்கு முட்டுக்கட்டைகள் போடப்படுவதாக ஒரு கருத்து நிலவுகிறது.
நீண்டகாலமாக அரசியலில் மாற்றத்தை விரும்பிய ரஜினி, தற்போது விஜய் போன்ற ஒரு புதிய சக்தி ஆட்சி அதிகாரத்திற்கு வருவதை தனது பிம்பத்திற்கு ஏற்படும் அச்சுறுத்தலாக கருதுகிறாரோ என்கிற சந்தேகம் மக்களிடையே எழுந்துள்ளது. இந்த சந்திப்பிற்கு பிறகு, பரம எதிரிகளான திமுகவும் அதிமுகவும் கைகோர்த்து செயல்படுவது பல யூகங்களுக்கு வலுசேர்க்கிறது.
திராவிடக் கட்சிகள் ஒன்றிணைந்து ஆட்சி அமைப்பது என்பது தமிழக அரசியல் வரலாற்றிலேயே ஒரு விசித்திரமான நிகழ்வாகும். கொள்கை ரீதியாக மாறுபட்ட இவ்விரு கட்சிகளும், விஜய்யின் வருகையை தடுக்க ஒரே நேர்க்கோட்டில் பயணிப்பதற்கு ரஜினிகாந்த் தான் ஐடியா கொடுத்திருப்பாரோ என்ற கேள்வி எழுவதை தவிர்க்க முடியவில்லை. அரசியலுக்கு வருவதாக கூறி நீண்ட காலம் இழுத்தடித்த ரஜினி, தற்போது உண்மையிலேயே அரசியலுக்கு வந்து மக்கள் ஆதரவை பெற்றுள்ள விஜய்யின் வளர்ச்சியை சகித்துக்கொள்ள முடியாமல் இத்தகைய ஆலோசனைகளை வழங்கியிருக்கலாம் என ஒரு தரப்பினர் வாதிடுகின்றனர். ஒரு நல்லவர், நேர்மையானவர் ஆட்சிக்கு வருவதை தடுக்க இத்தனை பொய் கூட்டங்கள் ஒன்று சேருவது ஜனநாயகத்தின் மீதான நம்பிக்கையை சிதைப்பதாக உள்ளது.
விஜய் முதலமைச்சர் நாற்காலியில் அமர்வது ரஜினிகாந்தின் திரைத்துறை மற்றும் பொது பிம்பத்தை பாதிக்கும் என்று அவர் அஞ்சுவதாக தெரிகிறது. சினிமாவில் தனக்கு பிறகு வந்த ஒருவர், அரசியலில் இவ்வளவு குறுகிய காலத்தில் இமாலய வெற்றியை பெற்று முதல்வராவது, ரஜினியின் இமேஜை மங்க செய்யும் என அவரது நலம் விரும்பிகள் கருதுகின்றனர். இதன் காரணமாகவே, ஆளுநர் மாளிகை மூலமாகவும், திராவிட கட்சிகள் மூலமாகவும் விஜய்க்கு நெருக்கடிகள் கொடுக்கப்படுவதாக புகார்கள் எழுகின்றன. ஒரு மாற்றத்தை நோக்கி துடிக்கும் இளைஞர்களின் எழுச்சியை, பழைய ஜாம்பவான்கள் ஒன்றிணைந்து நசுக்க நினைப்பது தமிழக அரசியலின் சாபக்கேடாகும்.
இப்போது நடக்கும் நாடகங்களை மக்கள் எள்ளளவும் நம்ப தயாராக இல்லை. ஒருபுறம் “ஜனநாயகத்தை காப்போம்” என்று பேசிக்கொண்டே, மறுபுறம் ஒரு புதிய கட்சி ஆட்சி அமைப்பதை தடுக்க திரைக்கு பின்னால் நடக்கும் சதி திட்டங்களை சாமானிய மக்கள் உன்னிப்பாக கவனித்துக் கொண்டிருக்கிறார்கள். பணபலம், அதிகார பலம் மற்றும் செல்வாக்கு மிக்க ஆளுமைகளின் ஆதரவு என அனைத்தும் விஜய்க்கு எதிராக திருப்பப்பட்டாலும், அது இறுதியில் அவருக்கு சாதகமான மக்கள் அலையையே உருவாக்கும். பொய்ப் பிரச்சாரங்களையும், திரைமறைவு கூட்டணிகளையும் கண்டு ஏமாற தமிழக மக்கள் ஒன்றும் அரசியல் அறியாதவர்கள் அல்ல.
இறுதியாக, வன்மத்தை பரப்புபவர்களுக்கும், மாற்றத்தை தடுப்பவர்களுக்கும் மக்கள் தகுந்த நேரத்தில் பதிலடி கொடுப்பார்கள் என்பது உறுதி. ஒரு நேர்மையான மனிதர் ஆட்சிக்கு வருவதைத்தடுக்க எத்தனை பேர் கைகோர்த்தாலும், மக்கள் சக்திக்கு முன்னால் அவை அனைத்தும் தூசியாக பறந்துவிடும். ரஜினி, ஸ்டாலின், எடப்பாடி என யார் தடுத்தாலும், காலம் குறித்திட்ட மாற்றம் நிகழ்ந்தே தீரும். இப்போதைய குழப்பங்கள் அனைத்தும் தற்காலிகமானவை; மக்கள் தங்களின் அதிருப்தியை வரும் தேர்தலில் அல்லது ஒரு மாபெரும் மக்கள் போராட்டத்தின் மூலம் வெளிப்படுத்துவார்கள். அன்று இந்த சதிகாரர்களின் முகத்திரைகள் மொத்தமாக கிழிக்கப்படும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
