தமிழக அரசியல் களத்தில் இப்போதைய டாக் என்னவென்றால், முன்னாள் அதிமுக அமைச்சர் சி. விஜயபாஸ்கர் ஆளும் தமிழக வெற்றிக் கழகத்தில் இணைவதில் ஏற்பட்டுள்ள இழுபறிதான். சமீபத்தில் தனது விராலிமலை எம்எல்ஏ பதவியையும், அதிமுக உறுப்பினர் பொறுப்பையும் ராஜினாமா செய்துவிட்டு, தவெக-வின் கதவுகள் எப்போது திறக்கும் என்று அவர் காத்திருப்பதாக அரசியல் வட்டாரங்கள் தெரிவிக்கின்றன. முதலில் ஜூன் 25ஆம் தேதி அவர் கட்சியில் இணைவார் என்றும், பின்னர் ஜூன் 29ஆம் தேதி நீலாங்கரையில் நடக்கும் பிரம்மாண்ட விழாவில் முதலமைச்சர் விஜய் முன்னிலையில் தவெக-வில் ஐக்கியமாவார் என்றும் செய்திகள் வெளியாகின. தவெக பொதுச்செயலாளர் என். ஆனந்த் உள்ளிட்ட முக்கிய நிர்வாகிகளை நேரில் சந்தித்துப் பேசிய பிறகு இந்தத் தேதி இறுதி செய்யப்பட்டதாகக் கூறப்பட்டது.
ஆனால், தற்போதைய நிலவரப்படி ஜூன் 29ஆம் தேதி திட்டமிட்டபடி அந்த இணைப்பு விழா நடக்குமா என்பதில் பெரிய கேள்விக்குறி எழுந்துள்ளது. விஜயபாஸ்கர் தவெக-வில் இணையும் தேதி அடுத்தடுத்து தள்ளிப்போய்க்கொண்டே இருப்பது அரசியல் வட்டாரங்களில் பல்வேறு யூகங்களை கிளப்பியுள்ளது. இதற்குப் பின்னால் முதலமைச்சர் விஜய் அவர்களின் தீவிரமான தயக்கமும், அரசியல் முன்னெச்சரிக்கையும் இருப்பதாக பனையூர் வட்டாரங்கள் ரகசியமாகப் பேசுகின்றன.
விஜயபாஸ்கர் மீது கடந்த அதிமுக ஆட்சிக் காலத்தில் சுமத்தப்பட்ட குட்கா ஊழல் வழக்கு, வருமானத்திற்கு அதிகமாகச் சொத்து சேர்த்த வழக்கு மற்றும் மத்திய முகமைகளின் சோதனைகள் எனப் பெரிய ஊழல் குற்றச்சாட்டுகளின் பின்னணி உள்ளது. தவெக தனது கொள்கையாக “நேர்மையான மற்றும் தூய்மையான நிர்வாகம்” என்ற முழக்கத்தை முன்வைத்து, மக்கள் வரிப்பணத்தைத் தொட்ட எவரையும் விடமாட்டோம் என்று பேசி வரும் சூழலில், இப்படிப்பட்ட ஒரு கறைபடிந்த பிம்பத்தைக் கொண்ட தலைவரை உடனடியாகக் கட்சியில் சேர்ப்பது தவெக-வின் இமேஜைக் கெடுத்துவிடும் என்று விஜய் யோசிப்பதாகத் தெரிகிறது.
ஒருவேளை விஜயபாஸ்கரை அவசரப்பட்டு கட்சியில் சேர்த்துவிட்டால், “மாற்றத்தை உருவாக்குகிறோம் என்று சொல்லிவிட்டு, பழைய ஊழல்வாதிகளைத் தான் கட்சியில் சேர்க்கிறீர்களா?” என்று எதிர்க்கட்சிகளான திமுக மற்றும் பிற கட்சிகள் கடுமையாக விமர்சனம் செய்ய ஆரம்பித்துவிடும். தவெக அரசுக்கு எதிராகப் பொதுமக்களிடம் தவறான எண்ணம் உருவாகும் அளவுக்கு எதிர்க்கட்சிகளுக்கு எந்தவொரு ஆயுதத்தையும் தட்டையாக எடுத்துக் கொடுத்துவிடக் கூடாது என்பதில் முதலமைச்சர் விஜய் மிக உறுதியாக இருப்பதாகக் கூறப்படுகிறது.
அதேநேரத்தில், தனது தொகுதியான விராலிமலையில் கிட்டத்தட்ட 80,000 குடும்பங்களுக்குத் தவெக சின்னத்தை மனதில் வைத்து பரிசுப் பெட்டகங்களை விநியோகம் செய்து, இடைத்தேர்தலுக்கு இப்போதே தயாராகி வரும் விஜயபாஸ்கருக்கு இந்தத் தாமதம் பெரும் பின்னடைவாகக் கருதப்படுகிறது. தனது எம்எல்ஏ பதவியையும் இழந்து, தவெக-விலும் உடனடியாகப் பச்சைக் கொடி காட்டப்படாத சூழ்நிலையில், அவர் அரசியல் அனாதையாகக் கைவிடப்படுவாரா அல்லது இறுதியில் விஜய் அவருக்கு ஒரு வாய்ப்பு வழங்குவாரா என்பது வரும் நாட்களில் தெரியவரும்.
சுருக்கமாகச் சொன்னால், விளம்பர அரசியலையும் தாண்டி, கட்சியின் தூய்மையான கொள்கையில் சமரசம் செய்துகொள்ளக் கூடாது என்ற முதலமைச்சர் விஜய்யின் இந்த அரசியல் வியூகம், விஜயபாஸ்கரின் தவெக என்ட்ரிக்கு ஒரு பெரிய ஸ்பீடு பிரேக்கராக அமைந்துள்ளது. கட்சியில் சேரத் துடிக்கும் முக்கியப் புள்ளியாக இருந்தாலும், மக்கள் மத்தியில் தவெக அரசுக்கு இருக்கும் நற்பெயரைக் காப்பாற்றிக் கொள்வதே இப்போதைய முக்கிய இலக்கு எனத் தலைமை முடிவெடுத்துள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
