தமிழக அரசியலில் ஆட்சி அமைப்பதில் நீடித்து வரும் இழுபறிக்கு மத்தியில், விடுதலை சிறுத்தைகள் கட்சியின் தலைவர் தொல். திருமாவளவனின் அரசியல் நகர்வுகள் பெரும் விவாதங்களை கிளப்பியுள்ளன. வெறும் இரண்டு சட்டமன்ற உறுப்பினர்களை மட்டுமே வைத்துக் கொண்டு, ஒட்டுமொத்த அரசாங்கத்தின் தலையெழுத்தையே தீர்மானிக்க பார்ப்பது எந்த விதத்தில் நியாயம் என்கிற கேள்வி நடுநிலையாளர்கள் மத்தியில் எழுந்துள்ளது.
தவெக ஆட்சி அமைக்க இன்னும் ஒரு சில இடங்களே தேவைப்படும் நிலையில், தனது கட்சியின் ஆதரவை வழங்குவதற்கு கைமாறாக ‘துணை முதல்வர்’ பதவியை திருமாவளவன் கேட்பதாக வெளியாகும் தகவல்கள் அரசியல் விமர்சகர்களை முகம் சுளிக்க வைத்துள்ளது.
ஆச்சரியமான விஷயம் என்னவென்றால், திருமாவளவன், ஒரு சட்டமன்ற உறுப்பினர் கூட கிடையாது. அவர் தற்போது நாடாளுமன்ற உறுப்பினராக மட்டுமே இருந்து வருகிறார். சட்டமன்ற உறுப்பினராகவே இல்லாத ஒருவருக்கு துணை முதல்வர் பதவி வழங்கப்பட வேண்டும் என்பது சட்டப்படி சாத்தியமென்றாலும், தார்மீக ரீதியாக அது எவ்வளவு பெரிய அநீதி என்பதை அவர் உணரவில்லை போலிருக்கிறது. மக்களால் நேரடியாக சட்டமன்றத்திற்கு தேர்ந்தெடுக்கப்படாத ஒருவர், மாநிலத்தின் மிக உயரிய பதவியைக் கோருவது ஜனநாயகத்தின் மீதான ஒரு கேலிக்கூத்தாகவே பார்க்கப்படுகிறது.
ஒருவேளை, அரசியல் நெருக்கடி காரணமாக அவருக்கு துணை முதல்வர் பதவி வழங்கப்பட்டாலும், அவர் அடுத்த ஆறு மாதங்களுக்குள் ஏதேனும் ஒரு தொகுதியில் போட்டியிட்டு வெற்றி பெற வேண்டும் என்பது விதி. ஏற்கனவே மக்களிடையே ஆட்சி மாற்றத்திற்கான அலை வீசிக் கொண்டிருக்கும் நிலையில், திருமாவளவன் ஒரு தொகுதியில் நின்று வெற்றி பெறுவது அவ்வளவு எளிதான காரியம் அல்ல. ஒரு துணை முதல்வராக நின்று அவர் தோற்றுப் போனால், அது அவரது அரசியல் வாழ்க்கைக்கும், அவரது கட்சிக்கும் மிகப்பெரிய கரும்புள்ளியாக அமைந்துவிடும். இந்த அபாயத்தை உணராமல், பதவியின் மீதுள்ள மோகத்தால் அவர் இப்படி ஒரு நிபந்தனையை முன்வைப்பதாகப் பேசப்படுகிறது.
‘பேராசை பெருநஷ்டம்’ என்ற பழமொழிக்கு ஏற்ப, இரண்டு இடங்களை வைத்து கொண்டு முதலமைச்சர் அல்லது துணை முதலமைச்சர் பதவிகளை தனது கட்சிக்கு கேட்பது, மற்ற கட்சிகளை மிரட்டுவது போன்ற செயலாக தோன்றுகிறது. அதிகார பகிர்வு என்ற போர்வையில், மக்கள் தங்களுக்கு வழங்கிய குறைந்தபட்ச ஆதரவைத் தவறாகப் பயன்படுத்தி, மிகப்பெரிய பதவிகளை அடையத் துடிப்பது ஆரோக்கியமான அரசியலுக்கு அழகல்ல. ஆட்சியின் ஸ்திரத்தன்மையை விடத் தனது கட்சியின் நலனுக்கும், பதவிக்குமே முக்கியத்துவம் அளிக்கும் இத்தகைய போக்கு, நீண்ட கால அடிப்படையில் விசிக-விற்கே பின்னடைவாக முடியும்.
முடிவாக, தமிழக மக்கள் ஒரு மாற்றத்தை விரும்பி வாக்களித்திருக்கிறார்கள். ஆனால், அந்த மாற்றத்தை முன்னெடுத்துச் செல்லும் வழியில் இத்தகைய முட்டுக்கட்டைகள் விழுவது வேதனைக்குரியது. இரண்டு எம்.எல்.ஏ-க்களை வைத்துக் கொண்டு அதிகாரத்தின் உச்சத்தைத் தொட நினைக்கும் திருமாவளவனின் பிடிவாதம், ஒருவேளை ஆட்சி அமையாமல் போகவோ அல்லது மீண்டும் ஒரு தேர்தலைச் சந்திக்கவோ வழிவகுத்தால், அதற்கு வரலாறு அவரை மன்னிக்காது. அதிகாரத்திற்காக எதையும் செய்யலாம் என்ற நிலையை விடுத்து, மக்கள் தீர்ப்பை மதித்துச் செயல்படுவதே ஒரு பழுத்த அரசியல் தலைவருக்குச் சோபனை தரும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
