தமிழகத்தில் 2026 சட்டமன்றத் தேர்தலுக்கான அரசியல் களம் இப்போதே சூடுபிடிக்க தொடங்கிவிட்டது. குறிப்பாக, திமுக தலைமையிலான கூட்டணியில் இடப்பகிர்வு குறித்த மோதல்கள் தற்போதே வெளிச்சத்திற்கு வர ஆரம்பித்துள்ளன. “ஆட்சியில் பங்கு” என்ற முழக்கத்தை சிறு கட்சிகள் முன்வைத்தாலும், பிரதான எதிர்க்கட்சியான காங்கிரஸ் இந்த விவகாரத்தில் திமுகவின் நிலைப்பாட்டை உன்னிப்பாக கவனித்து வருகிறது.
ஆனால், திமுக தலைவரும் முதலமைச்சருமான மு.க. ஸ்டாலின் இந்த முறை கூட்டணி கட்சிகளிடம் மிகவும் கறாரான போக்கை கடைப்பிடிப்பதாக அறிவாலய வட்டாரங்கள் தெரிவிக்கின்றன. “ஆட்சியில் பங்கு என்ற பேச்சுக்கே இடமில்லை; நாங்கள் ஒதுக்கும் தொகுதிகளை ஏற்றுக்கொண்டு கூட்டணியில் நீடிக்க விருப்பம் இருந்தால் இருக்கலாம்” என்ற அதிரடி செய்தியை ஸ்டாலின் கூட்டணி கட்சிகளுக்கு திட்டவட்டமாக உணர்த்திவிட்டதாக கூறப்படுகிறது.
திமுகவின் இந்தத் திடீர் ‘கறார்’ அணுகுமுறை காங்கிரஸ் கட்சிக்குள் பெரும் அதிர்வலைகளை ஏற்படுத்தியுள்ளது. கடந்த தேர்தல்களை போல அல்லாமல், இந்த முறை திமுகவின் பிடி மிகவும் இறுக்கமாக இருப்பதை காங்கிரஸ் தலைமை உணர்கிறது. ஆட்சி அதிகாரத்தில் பங்கு என்பது கட்சியின் நீண்ட காலக் கனவாக இருந்தாலும், தற்போதைய சூழலில் திமுகவை மீறி எதையும் சாதிக்க முடியாது என்ற யதார்த்தத்தை அவர்கள் எதிர்கொள்ள வேண்டியுள்ளது. குறிப்பாக, திமுகவின் வாக்கு வங்கி வலுவாக இருக்கும் நிலையில், கூட்டணியை விட்டு வெளியேறினால் தவெக என்ற ஒரே ஒரு ஆப்ஷம் மட்டும் உள்ளது. அதுவும் தங்களுக்கு பாதகமாகவே முடியும் என்று ஒரு தரப்பினர் எச்சரிக்கின்றனர்.
இருப்பினும், காங்கிரஸ் கட்சியின் ஒரு பிரிவினர் திமுகவின் இந்த ‘இஷ்டம் இருந்தால் இருங்கள்’ என்ற போக்கை சுயகௌரவ பிரச்சினையாக பார்க்கின்றனர். டெல்லி தலைமையிடம் இது குறித்து பேசியுள்ள தமிழக காங்கிரஸ் நிர்வாகிகள், “ஒவ்வொரு முறையும் திமுக கொடுக்கும் எண்ணிக்கையை மட்டுமே பெற்றுக்கொண்டு நாம் ஒதுங்கி செல்வது கட்சியின் வளர்ச்சியை பாதிக்கும்” என்று ஆதங்கப்படுகின்றனர். இதனால், கூட்டணியை விட்டு வெளியேறுவது குறித்து தீவிரமாக ஆலோசிக்கப்பட்டாலும், அதற்கு பின்னால் இருக்கும் அரசியல் வெற்றிடம் மற்றும் நிதி நெருக்கடிகளை நினைத்துக் காங்கிரஸ் தலைமை தயக்கம் காட்டுகிறது.
இந்த இழுபறிக்கு நடுவே, “கடைசியில் திமுக கொடுக்கும் தொகுதிகளை பெற்றுக்கொண்டு சமரசம் செய்துகொள்வதை தவிர காங்கிரஸிற்கு வேறு வழி இல்லை” என்பதே அரசியல் விமர்சகர்களின் கணிப்பாக உள்ளது. ஏனெனில், பாஜகவை வீழ்த்த வேண்டும் என்ற தேசிய அளவிலான இலக்கை முன்னிறுத்தி, திமுகவுடன் இணக்கமாக செல்லவே டெல்லி மேலிடம் விரும்புகிறது. தமிழகத்தில் ஒருவேளை கூட்டணி உடைந்தால், அது அகில இந்திய அளவில் இந்தியா கூட்டணிக்கு பலவீனத்தை ஏற்படுத்தும் என்று ராகுல் காந்தி மற்றும் மல்லிகார்ஜுன கார்கே போன்ற தலைவர்கள் கருதுகின்றனர். இதனால், தமிழக காங்கிரஸின் உணர்வுகளை விட தேசிய அரசியலே இங்கு முக்கியத்துவம் பெறுகிறது.
முடிவெடுக்க முடியாமல் திணறும் காங்கிரஸ் தலைமைக்கு, திமுகவின் இந்த நேரடியான எச்சரிக்கை பெரும் நெருக்கடியை கொடுத்துள்ளது. ஒருபுறம் தொண்டர்களின் அழுத்தம், மறுபுறம் தேர்தல் வெற்றி என்ற இரட்டை சவால்களை சமாளிக்க வேண்டிய நிலையில் அவர்கள் உள்ளனர். “சரி, கொடுக்கிறத கொடுங்க” என்று வாங்கி தலையாட்டிவிட்டுச் செல்வதா அல்லது ஒரு கை பார்த்துவிடுவது என வெளியேறுவதா என்ற குழப்பம் இன்னும் நீடிக்கிறது. ஆனால், திமுகவோ மற்ற கட்சிகளை விட தனித்து நின்றாலும் வெற்றி பெற முடியும் என்ற நம்பிக்கையில் இருப்பதால், எந்த ஒரு விட்டுக்கொடுத்தலுக்கும் தயாராக இல்லை என்பது மட்டும் தெளிவாகத் தெரிகிறது.
திமுகவின் இந்தத் துணிச்சலான முடிவுக்கு பின்னால், மக்கள் மத்தியில் தங்களுக்கு இருக்கும் செல்வாக்கு மற்றும் எதிர்க்கட்சிகளின் பலவீனம் ஆகிய இரு காரணங்கள் உள்ளன. காங்கிரஸ் வெளியேறினால் அது தங்களுக்கு பெரிய இழப்பு அல்ல என்றும், மாறாக அதிக தொகுதிகளில் திமுகவே நேரடியாக போட்டியிட வாய்ப்பு கிடைக்கும் என்றும் அறிவாலயத்தினர் கணக்கு போடுகின்றனர். இந்த அரசியல் சதுரங்க ஆட்டத்தில் காங்கிரஸ் ஒரு பகடையாக மட்டுமே பயன்படுத்தப்படுகிறதோ என்ற சந்தேகம் அரசியல் நோக்கர்களிடையே எழுந்துள்ளது.
இறுதியாக, 2026 தேர்தல் களம் திமுக மற்றும் காங்கிரஸ் இடையே ஒரு புதிய உறவை உருவாக்குமா அல்லது நீண்ட கால பகையை ஏற்படுத்துமா என்பது இன்னும் சில வாரங்களில் தெரிந்துவிடும். தொகுதிகளின் எண்ணிக்கை மற்றும் ஆட்சி அதிகாரம் குறித்த பேச்சுவார்த்தைகள் ஒரு முடிவுக்கு வராத வரை, இரு கட்சிகளுக்கும் இடையே இந்த ‘திக் திக்’ நிமிடங்கள் தொடரப்போவது உறுதி. காங்கிரஸ் தலைமை தனது இறுதியான முடிவை அறிவிக்கும் வரை, தமிழக அரசியல் களம் இந்த இழுபறி நிலையிலேயே நீடிக்கும் என்று எதிர்பார்க்கப்படுகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
