தமிழகச் சட்டமன்ற தேர்தல் முடிவுகள் வெளியான சில நாட்களிலேயே, தமிழ்நாடு காங்கிரஸ் கமிட்டியின் தலைமை பொறுப்பில் ஒரு மிகப்பெரிய மாற்றம் நிகழப்போவதாக டெல்லி வட்டாரங்கள் தெரிவிக்கின்றன. தற்போது தலைவராக இருக்கும் செல்வப்பெருந்தகை, தேர்தல் முடிவுகள் வந்த அடுத்த வாரமே பதவியிலிருந்து மாற்றப்படலாம் என்ற பேச்சு பலமாக எழுந்துள்ளது.
கட்சியின் தற்போதைய செயல்பாடுகள் மற்றும் தேர்தல் கால உத்திகள் குறித்த சில அதிருப்திகள் மேலிடத்திற்கு சென்றிருப்பதே இந்த அதிரடி மாற்றத்திற்கு முதன்மையான காரணமாக சொல்லப்படுகிறது. செல்வப்பெருந்தகையின் இடத்தை பிடிக்க இப்போதே கட்சியின் மூத்த மற்றும் இளம் தலைவர்களிடையே ஒரு மௌனமான ‘போட்டோ போட்டி’ தொடங்கியுள்ளது.
அடுத்த காங்கிரஸ் தலைவர் யார் என்ற ரேஸில் கரூர் நாடாளுமன்ற உறுப்பினர் ஜோதிமணி, விருதுநகர் நாடாளுமன்ற உறுப்பினர் மாணிக்கம் தாகூர் மற்றும் சிவகங்கை நாடாளுமன்ற உறுப்பினர் கார்த்தி சிதம்பரம் ஆகிய மூன்று பெயர்கள் முன்னிலையில் உள்ளன.
ராகுல் காந்திக்கு மிகவும் நெருக்கமானவர் என்ற அடிப்படையில் ஜோதிமணிக்கும், அகில இந்திய காங்கிரஸ் கமிட்டியின் நம்பிக்கையை பெற்றவர் என்பதால் மாணிக்கம் தாகூருக்கும் சமமான வாய்ப்புகள் இருப்பதாக கருதப்படுகிறது. அதே சமயம், நவீன அரசியல் வியூகங்கள் மற்றும் கட்சிக்கு ஒரு புதிய தோற்றத்தை கொடுக்கும் நோக்கில் கார்த்தி சிதம்பரத்தின் பெயரும் தீவிரமாக பரிசீலிக்கப்பட்டு வருவதாக தெரிகிறது.
இந்த முறை காங்கிரஸ் மேலிடம், குறிப்பாக ராகுல் காந்தி ஒரு மிக முக்கியமான நிபந்தனையை விதித்துள்ளதாக கட்சி வட்டாரங்களில் பேசப்படுகிறது. “தமிழகத்தில் காங்கிரஸ் கட்சி தனது தனித்துவத்தை மீட்டெடுக்க வேண்டும்; திமுகவிற்கு வெறும் ‘ஜால்ரா’ அடிக்கும் கட்சியாக மட்டும் இருக்கக்கூடாது” என்பதே அந்த நிபந்தனை.
கடந்த காலங்களில் கூட்டணி தர்மம் என்ற பெயரில் திமுகவின் நிழலிலேயே காங்கிரஸ் தங்கிவிட்டதாகவும், இதனால் கட்சியின் அடிமட்ட கட்டமைப்பு பலவீனமடைந்துவிட்டதாகவும் ராகுல் காந்தி கருதுகிறார். எனவே, அடுத்த வரும் தலைவர் திமுகவை எதிர்க்க துணியாவிட்டாலும், குறைந்தபட்சம் ஆட்சியில் தவறு நடக்கும்போது தட்டி கேட்க வேண்டும் என்று ராகுல் காந்தி கருதுகிறாராம்.
பல ஆண்டுகளாக திராவிட கட்சிகளுடன் கூட்டணி வைத்து பழகிப்போன தமிழக காங்கிரசுக்கு, இப்போது ஒருவிதமான ‘ரோஷம்’ வந்துள்ளதாக அரசியல் விமர்சகர்கள் நகைச்சுவையாக குறிப்பிடுகின்றனர். தொகுதி பங்கீட்டில் ஆரம்பித்து உள்ளாட்சி பிரதிநிதித்துவம் வரை திமுகவிடம் கையேந்தும் நிலையை மாற்ற வேண்டும் என்ற எண்ணம் கட்சியின் இரண்டாம் கட்ட தலைவர்களிடையே மேலோங்கியுள்ளது.
தாங்கள் ஒரு தேசிய கட்சி என்பதை மறந்துவிட்டு, மாநில கட்சியின் கிளை கழகம் போல செயல்படுவதை இனியும் அனுமதிக்க முடியாது என்ற மனநிலை டெல்லி தலைவர்களிடம் ஏற்பட்டுள்ளது. இதுவே தமிழக காங்கிரஸில் ஒரு தலைமை மாற்றத்திற்கான முக்கிய காரணியாக அமைந்துள்ளது.
முடிவாக, தமிழகத்தின் அடுத்த காங்கிரஸ் தலைவர் என்பவர் திமுக உடனான உறவை பேணுபவராக மட்டுமல்லாமல், 2029 நாடாளுமன்ற தேர்தலை முன்னிறுத்தி கட்சியை தனித்து இயங்க வைக்கும் ஆற்றல் கொண்டவராக இருக்க வேண்டும் என்பதே தற்போதைய எதிர்பார்ப்பு.
செல்வப்பெருந்தகை மாற்றப்படுவது உறுதி என நம்பப்படும் சூழலில், புதிய தலைவராக வரப்போகும் அந்த நபர் ராகுல் காந்தியின் ‘தன்மான அரசியல்’ கொள்கையை எப்படி கையில் எடுக்கப்போகிறார் என்பதை பொறுத்தே தமிழக காங்கிரஸின் எதிர்காலம் அமையும். மே 4-ஆம் தேதிக்கு பிறகு தமிழக அரசியலில் பல அதிரடி திருப்பங்கள் காத்திருப்பது மட்டும் நிச்சயம்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
