கர்நாடக அரசு, ஆன்லைனில் தவறான தகவல்கள் மற்றும் வெறுப்பு பேச்சுக்களை கையாளும் நோக்கில் இரண்டு வரைவு சட்டங்களை அறிமுகப்படுத்த தயாராகி வருகிறது. அவை: கர்நாடக தவறான தகவல் மற்றும் போலி செய்தி தடை மசோதா 2025 மற்றும் கர்நாடக வெறுப்பு பேச்சு மற்றும் வெறுப்பு குற்றங்கள் (தடுப்பு மற்றும் கட்டுப்பாடு) மசோதா 2025.
மாநில சட்டமன்றத்தால் இந்த இரண்டு மசோதாக்களும் அங்கீகரிக்கப்பட்டால், விதிகளை மீறுபவர்களுக்கு சிறைத் தண்டனை மற்றும் பெருமளவிலான அபராதங்கள் விதிக்கப்படும். இந்த சட்டங்களைச் செயல்படுத்த சிறப்பு ஒழுங்குமுறை அமைப்புகள் மற்றும் நீதிமன்றங்களை அமைக்கவும் இவை முன்மொழிகின்றன.
இந்த இரண்டு வரைவு மசோதாக்கள் என்ன கூறுகின்றன, அவை ஏன் அறிமுகப்படுத்தப்படுகின்றன, மேலும் டிஜிட்டல் துறையில் செயல்படும் மக்கள் மற்றும் நிறுவனங்களை அவை எவ்வாறு பாதிக்கலாம் என்பதை பார்க்கலாம்.
போலி செய்தித் தடை மசோதா கூறுவது என்ன?
தவறான தகவல் மற்றும் போலி செய்தித் தடை மசோதா, ஆன்லைனில் போலி செய்திகளை உருவாக்குவது மற்றும் பகிர்வதை குற்றமாக்க முயல்கிறது. இந்த மசோதா, புனையப்பட்ட, சிதைக்கப்பட்ட அல்லது திருத்தப்பட்ட வீடியோக்கள், தவறான மேற்கோள்கள் அல்லது வேண்டுமென்றே தவறான அறிக்கைகளை வெளியிடுவது ஆகியவற்றை போலி செய்தியாக வரையறுக்கிறது.
மீறுபவர்களுக்கு ஏழு ஆண்டுகள் வரை சிறைத்தண்டனை, ₹10 லட்சம் வரை அபராதம் அல்லது இரண்டும் விதிக்கப்படலாம்.
வெறுப்புப் பேச்சுத் தடுப்பு மசோதா கூறுவது என்ன?
வெறுப்புப் பேச்சு மற்றும் வெறுப்புக் குற்றங்கள் (தடுப்பு மற்றும் கட்டுப்பாடு) மசோதா, மதம், சாதி, பாலினம் அல்லது மொழி அடிப்படையில் தீங்கு விளைவிக்கும் அல்லது வெறுப்பை தூண்டும் எந்தவொரு தகவல்தொடர்பையும் (ஆன்லைனில் அல்லது ஆஃப்லைனில்) வெறுப்பு பேச்சாக வரையறுக்கிறது.
இது மூன்று ஆண்டுகள் வரை சிறைத் தண்டனையை முன்மொழிகிறது. தனிநபர்கள் மற்றும் சமூக ஊடகத் தளங்கள் போன்ற இடைத்தரகர்கள் இத்தகைய உள்ளடக்கத்திற்கு பொறுப்பாவார்கள். .
கர்நாடக அரசு ஏன் இந்த மசோதாக்களை அறிமுகப்படுத்துகிறது?
கர்நாடகாவில் உள்ள சில மாவட்டங்களில் வளர்ந்து வரும் வகுப்புவாத பதட்டங்கள் காரணமாக கர்நாடக அரசு வெறுப்பு பேச்சுக்கு எதிரான சட்டத்தை கொண்டுவர முடிவு செய்துள்ளது.
இந்த மசோதாக்கள் குடிமக்கள் மீது ஏற்படுத்தக்கூடிய தாக்கம் என்ன?
இந்த மசோதாக்களில் உள்ள சில விதிகள் அரசியலமைப்பால் பாதுகாக்கப்படும் கருத்து சுதந்திரத்தை மீறலாம் என்று நிபுணர்கள் கூறுகிறார்கள். இந்த சட்டம் நியாயமான விமர்சனம், நையாண்டி அல்லது கலை மற்றும் கல்விசார் வெளிப்பாடுகளில் அச்சமூட்டும் விளைவை உருவாக்கலாம்.
மேலும், இரண்டு மசோதாக்களும் குற்றங்களை பிணையற்றவை (non-bailable) என்று வகைப்படுத்துகின்றன, மேலும் உள்ளடக்கத்தை கட்டுப்படுத்த அல்லது அகற்ற “முடக்க வழிகாட்டுதல்களை” (disabling directions) வெளியிட நீதிமன்றங்களுக்கு அதிகாரம் அளிக்கின்றன. இந்த நடவடிக்கை முன்கூட்டிய தணிக்கை அபாயத்தை அதிகரிக்கலாம் என்றும் நிபுணர்கள் வாதிடுகின்றனர்.
