2026 ஆம் ஆண்டு தமிழ்நாடு சட்டமன்ற தேர்தலை முன்னிட்டு வெளியாகியுள்ள சில கருத்துக்கணிப்புகளை கடுமையாக அரசியல் விமர்சகர், மூத்த பத்திரிகையாளர் மணி விமர்சனம் செய்துள்ளார்.
ஒரு முன்னணி வார இதழின் கருத்துக்கணிப்பில் தமிழக வெற்றிக் கழக தலைவர் விஜய் அவர்கள் 44 சதவீத மக்கள் ஆதரவுடன் ‘மிகவும் விரும்பப்படும் முதல்வர் வேட்பாளராக’ முதலிடத்தில் இருப்பதாக கூறும் அதே கருத்துக்கணிப்பு, அவரது கட்சிக்கு வெறும் 2 முதல் 4 இடங்கள் மட்டுமே கிடைக்கும் என கூறுவதை சுட்டி காட்டுகிறார். இத்தகைய முரணான தகவல்கள் மக்களை குழப்பும் நோக்கில் திட்டமிடப்பட்டவை என்றும், இது ஆளும் திமுக அரசிற்கு ஆதரவாக செயல்படும் ஒரு ‘சொம்பு தூக்கும்’ நடவடிக்கை என்றும் கூறியுள்ளார்.
கருத்துக்கணிப்புகளை வெளியிடுபவர்கள் குறைந்தபட்ச அறிவு நேர்மை மற்றும் மனசாட்சி இல்லாமல் செயல்படுவதாக குற்றம் சாட்டிய மணி, 42 முதல் 44 சதவீத மக்கள் ஒருவரை முதலமைச்சராக விரும்புகிறார்கள் என்றால், அந்தப் பெரும் ஆதரவு ஏன் சட்டமன்ற இடங்களாக மாறவில்லை என்கிற தர்க்கரீதியான கேள்வியை எழுப்பியுள்ளார். வாக்கு விகிதத்திற்கும் இடங்களுக்கும் இடையிலான இந்த மிகப்பெரிய முரண்பாடு, கருத்துக்கணிப்பு நிறுவனங்களின் நம்பகத்தன்மையை கேள்விக்குள்ளாக்குகிறது என்றும், இத்தகைய ஆய்வுகள் வெறும் புள்ளிவிவர மோசடிகள் எனவும் கூறியுள்ளார்.
முந்தைய காலங்களில் தேர்தல் கருத்துக்கணிப்புகள் அறிவியல் பூர்வமாக நடத்தப்பட்டன. ஆனால் தற்போதைய கருத்துக்கணிப்புகள் யாரிடமோ பணம் பெற்றுக்கொண்டு, அவர்களுக்கு சாதகமான முடிவுகளை திணிக்கும் ஒரு வணிகமாக மாறிவிட்டதாக மணி வருத்தம் தெரிவித்தார். மக்களின் உண்மையான மனநிலையை மறைத்து, ஒரு மாயையான பிம்பத்தை உருவாக்குவதே இவர்களின் நோக்கம் எனவும் அவர் சாடினார்.
விஜய்க்கு கிடைத்துள்ள 44 சதவீத ஆதரவு என்பது தற்போதைய முதலமைச்சர் ஸ்டாலின் (28%) மற்றும் எதிர்க்கட்சித் தலைவர் எடப்பாடி பழனிசாமி (22%) ஆகியோரை விட மிக அதிகம் என்பதை சுட்டிக்காட்டும் மணி, இவ்வளவு பெரிய மக்கள் ஆதரவு கொண்ட ஒரு கட்சிக்கு மிக குறைந்த இடங்களை ஒதுக்குவது உள்நோக்கம் கொண்டது என்றும், 20 சதவீதத்திற்கு மேல் வாக்குகள் பெற்றாலே அது பெரும் எண்ணிக்கையிலான இடங்களாக மாற வேண்டும் என்கிற தேர்தல் விதியை இக்கருத்துக்கணிப்புகள் திட்டமிட்டுப் புறக்கணிக்கின்றன என்றும் அவர் கூறினார்.
முடிவாக, இத்தகைய போலி கருத்துக்கணிப்புகளை மக்கள் குப்பையில் எறிய வேண்டும் என கூறிய மணி, உண்மையான தரவுகளை மறைத்து மக்களை ஏமாற்றும் இத்தகைய நிறுவனங்களின் முகத்திரை கிழிக்கப்பட வேண்டும் என்றும், வாக்காளர்கள் இத்தகைய திணிக்கப்பட்ட கருத்துக்கணிப்புகளுக்கு இரையாகாமல் விழிப்புணர்வுடன் இருக்க வேண்டும் என்றும் வலியுறுத்தினார்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
