கடந்த ஜூன் 25 அன்று கொல்கத்தாவில் உள்ள ஒரு சட்டக் கல்லூரிக்குள் வைத்து, 24 வயது மாணவிக்கு பாலியல் வன்கொடுமை நடந்ததாக கூறப்படும் வழக்கில், மருத்துவ பரிசோதனை முடிவுகள் வெளியாகியுள்ளன. இந்த அறிக்கையின்படி, பாதிக்கப்பட்ட மாணவியின் கழுத்து மற்றும் மார்பு பகுதிகளில் காயங்கள் இருப்பது உறுதி செய்யப்பட்டுள்ளது. வெளிப்படையான பிறப்புறுப்பில் காயம் எதுவும் இல்லை என்றாலும், தடயவியல் அறிக்கை வரும்வரை பாலியல் தாக்குதலை மருத்துவர்கள் நிராகரிக்கவில்லை என்று கூறப்படுகிறது.
ஜூன் 26 அன்று இரவு 10 மணிக்கு கொல்கத்தா தேசிய மருத்துவ கல்லூரியில் பாதிக்கப்பட்ட மாணவிக்கு மருத்துவப் பரிசோதனை மேற்கொள்ளப்பட்டது. தடயவியல் சோதனைக்காக மூன்று மாதிரிகள் சேகரிக்கப்பட்டுள்ளன. கர்ப்ப பரிசோதனையின் முடிவு எதிர்மறையாக வந்துள்ளது. இந்த வழக்கை விசாரிக்க, உதவி ஆணையர் தலைமையிலான ஐந்து பேர் கொண்ட கொல்கத்தா காவல்துறை சிறப்புப் புலனாய்வுக் குழு அமைக்கப்பட்டுள்ளது.
பாதிக்கப்பட்ட மாணவியரின் மார்பு மற்றும் கழுத்து பகுதியில் காயம் இருப்பதை பார்க்கும்போது மூன்று காம கொடூரர்களும் அந்த மாணவியை எந்த அளவுக்கு துன்புறுத்தி இருப்பார்கள் என்பதை அறிய முடிவதாக இந்த செய்திக்கு சமூக வலைதள பயனர்கள் அதிர்ச்சியுடன் கருத்துக்களை தெரிவித்து வருகின்றார்கள். குற்றவாளிகளை கடுமையாக தண்டிக்க வேண்டும் என்றும் இவர்கள் எல்லாம் உயிர் வாழ தகுதி இல்லாதவர்கள் என்றும் கூறப்பட்டு வருவது பெரும் பரபரப்பை ஏற்படுத்தி உள்ளது
இந்த நிலையில் இந்த வழக்கில் இன்று நான்காவது குற்றவாளியாக, சட்டக் கல்லூரியில் பணிபுரிந்த ஒரு பாதுகாப்பு காவலாளி கைது செய்யப்பட்டுள்ளார். காவல்துறையின் கூற்றுப்படி, விசாரணையின்போது காவலாளியின் வாக்குமூலங்கள் முரண்பட்டதால் சந்தேகம் வலுத்துள்ளது. சம்பவம் நடந்த நேரத்தில் அவர் வளாகத்தில் இருந்ததைக் கண்காணிப்பு கேமரா காட்சிகளும் உறுதிப்படுத்தியுள்ளன.
இந்தக் கைதுடன் சேர்த்து, மொத்தமாக நான்கு பேர் கைதாகியுள்ளனர். இவர்களில், திரிணாமுல் காங்கிரஸ் கட்சியுடன் தொடர்புடைய கல்லூரியின் முன்னாள் மாணவர் மனோஜித் மிஸ்ரா, இரண்டு தற்போதைய மாணவர்கள் மற்றும் தற்போது கைது செய்யப்பட்டுள்ள காவலாளி ஆகியோர் அடங்குவர். பாலியல் குற்றத்தில் நேரடியாக பங்கேற்றதாகக் கூறப்படும் மூன்று ஆண்களும் இப்போது காவல்துறையின் விசாரணை பிடியில் உள்ளனர்.
