தமிழக அரசியல் வரலாற்றில் தலைவர்களுக்கிடையேயான மோதல்களும், அதற்குப் பின்னால் இருக்கும் காரணங்களும் எப்போதும் கூர்ந்து கவனிக்கப்படுபவை. அந்த வகையில் மறைந்த முன்னாள் முதலமைச்சர் ஜெயலலிதாவுக்கும் திமுகவுக்கும் இடையேயான அரசியல் பகை என்பது வெறும் கொள்கை ரீதியானது மட்டுமல்ல, அது தனிப்பட்ட ஒரு பெரும் காயத்தினால் உருவானது. கடந்த 1989-ஆம் ஆண்டு தமிழக சட்டமன்றத்தில் ஜெயலலிதாவுக்கு நேர்ந்த அவமதிப்பும், அவரது சேலை இழுக்கப்பட்ட சம்பவமும் ஒட்டுமொத்த தமிழகத்தையும் உலுக்கியது.
தன்னை அவமதித்த ஒரு கட்சியை, தன்னை அசிங்கப்படுத்திய தலைவர்களைப் பழிவாங்காமல் விடக்கூடாது என்ற அசாத்திய சபதத்தோடு அவர் அரசியல் களம் கண்டார். அதன் காரணமாகவே, பின்னர் அவர் ஆட்சிப் பொறுப்புக்கு வந்தபோது திமுக மீது கடுமையான சட்டப்படியான பழிவாங்கும் நடவடிக்கைகளை எடுத்தார். முன்னாள் முதலமைச்சர் கருணாநிதியை நள்ளிரவில் அதிரடியாகக் கைது செய்த சம்பவத்திற்குப் பின்னால் கூட, சட்டமன்றத்தில் தனக்கு இழைக்கப்பட்ட அந்த அவமதிப்புக்குத் தீர்வு காண வேண்டும் என்ற தனிப்பட்ட கோபமும் வைராக்கியமும் முக்கியக் காரணமாக இருந்தது.
ஆனால், தற்போதைய அரசியல் சூழலில் புதிய சக்தியாக உருவெடுத்துள்ள தமிழக வெற்றிக் கழகத்தின் தலைவர் விஜய்க்கும் திமுகவுக்கும் இடையே அப்படிப்பட்ட எந்தவொரு தனிப்பட்ட விரோதமோ அல்லது குடும்பப் பகையோ கிடையாது. விஜய் அரசியலுக்கு வந்ததற்குப் பின்னால் எந்தவொரு பழிவாங்கும் நோக்கமும் இல்லை என்பதுதான் யதார்த்தமான உண்மை. அவருக்கு இருக்கும் ஒரே ஒரு கொள்கை மற்றும் குறிக்கோள் என்னவென்றால், மக்கள் பணத்தை ஆட்டையப் போட்டவர்களை எக்காரணம் கொண்டும் சும்மா விடக்கூடாது என்பது மட்டும்தான். மக்கள் வரிப்பணத்தைச் சுரண்டி, தங்களின் சுயநலத்திற்காக ஊழல் செய்தவர்களைக் கண்டிப்பதும், அவர்கள் மீது சட்டப்படியான வழக்குகளைப் போட்டு சிறையில் தள்ளுவதும்தான் தங்களின் முதன்மையான அரசியல் வேலை என்பதை அவர் தெளிவுபடுத்தியுள்ளார். மற்றபடி, திமுக என்ற இயக்கத்தின் மீதோ அல்லது அதன் தலைவர்கள் மீதோ அவருக்குத் தனிப்பட்ட முறையில் எவ்விதக் காழ்ப்புணர்ச்சியும் இல்லை என்பதை அவரது அரசியல் நகர்வுகள் காட்டுகின்றன.
தனிப்பட்ட முறையில் எங்களுக்கும் திமுகவுக்கும் எந்தவிதமான பகையும் இல்லை என்பதை ஒட்டுமொத்த தமிழகத்திற்கும் நிரூபித்துக் காட்டுவதற்காகத்தான், விஜய் தேர்தல் முடிந்து முதல்வர் பொறுப்பை ஏற்றவுடன் முதல்முதலாக மு.க.ஸ்டாலினை நேரில் போய் சந்தித்தார். அந்தச் சந்திப்பு ஒரு நாகரிகமான அரசியல் பண்பாட்டின் அடையாளமாகப் பார்க்கப்பட்டது. அரசியல் களத்தில் கொள்கை ரீதியாக மாறுபட்டிருந்தாலும், தனிப்பட்ட முறையில் ஒருவருக்கொருவர் மரியாதையையும் சுமுகமான உறவையும் பேண முடியும் என்ற புதிய அரசியலை அவர் அந்தச் சந்திப்பின் மூலம் விதைத்தார். அரசியல் எதிரிகளைத் தனிப்பட்ட எதிரிகளாகப் பார்க்க வேண்டிய அவசியம் இல்லை என்ற தார்மீகப் புரிதலை அந்த நிகழ்வு வெளிப்படுத்தியது.
ஆனால், ஸ்டாலினை நேரில் சந்தித்து வாழ்த்துப் பெற்றார் அல்லது சுமுகமாகப் பேசினார் என்பதற்காக, ஊழல் செய்தவர்கள் மீது நடவடிக்கை எடுக்காமல் விஜய் சமரசம் செய்துகொள்வார் என்று எவராவது நினைத்தால் அதைவிட ஒரு முட்டாள்தனம் வேறு எதுவும் இருக்க முடியாது. அதிகாரத்தில் இருந்தவர்களோடு இணக்கமாக இருப்பது போல் காட்டிக்கொண்டாலும், கொள்கை என்று வந்துவிட்டால் அவர் ஒருபோதும் பின்வாங்க மாட்டார் என்பதை அவர் தற்போது தனது அதிரடியான செயல்கள் மூலம் நிரூபித்துக் கொண்டிருக்கிறார். தவறு செய்தவர்கள் யாராக இருந்தாலும், அவர்கள் ஆளும்கட்சியைச் சேர்ந்த செல்வாக்குமிக்க நபர்களாகவே இருந்தாலும் தவெகவின் ஆட்சியில் தப்பிக்க முடியாது என்ற செய்தியைத் தனது அண்மைக்கால அரசியல் அறிக்கைகள் மற்றும் களப்பணிகள் மூலம் அவர் மிகத் தெளிவாக உணர்த்தி வருகிறார்.
இந்தச் சூழலை உத்துப் பார்க்கும்போது, கடந்த காலத்தில் ஜெயலலிதா திமுக மீது எடுத்த நடவடிக்கைகளை விடப் பத்து மடங்கு கடுமையான நடவடிக்கைகளை விஜய் தன் கைகளில் எடுப்பார் என்று அரசியல் வித்தகர்கள் கணிக்கிறார்கள். ஜெயலலிதாவின் காலத்தில் இருந்ததை விட இப்போதைய காலக்கட்டத்தில் ஊழலின் வடிவங்களும், மக்கள் பணத்தைக் கையாடல் செய்யும் முறைகளும் பல மடங்கு அதிகரித்துள்ளதால், அதற்கான தண்டனையும் மிகக் கடுமையானதாக இருக்க வேண்டும் என்பதில் விஜய் உறுதியாக இருக்கிறார். எனவே, சட்டத்தின் துணையோடு அவர் எடுக்கப்போகும் அதிரடி முடிவுகள் திமுகவினரி நிலைகுலையச் செய்யும் என்பதில் எவ்வித சந்தேகமும் இல்லை.
இருப்பினும், ஜெயலலிதா எடுத்த நடவடிக்கைகளுக்கும் விஜய் எடுக்கப்போகும் நடவடிக்கைகளுக்கும் இடையே ஒரு மிக முக்கியமான, குறிப்பிடத்தக்க வித்தியாசம் இருக்கிறது. ஜெயலலிதாவின் வேட்டையில் தனிப்பட்ட பழிவாங்கும் உணர்ச்சியும், சட்டமன்ற அவமதிப்புக்கான கோபமும் கலந்திருந்தது; ஆனால் முதல்வர் விஜய் எடுக்கப்போகும் கடுமையான நடவடிக்கைகளில் ஒன்று கூட தனிப்பட்ட விரோதத்தினால் எடுக்கப்படுபவை அல்ல. அது முழுக்க முழுக்க மக்கள் பணத்தைக் காப்பாற்றுவதற்காகவும், நேர்மையான நிர்வாகத்தை அமைப்பதற்காகவும் மட்டுமே எடுக்கப்படும் தூய்மையான சட்ட நடவடிக்கை ஆகும். தனிப்பட்ட பகையின்றி, நீதியின் பக்கமாக நின்று அவர் நடத்தப்போகும் இந்த அரசியல் யுத்தம் தமிழக வரலாற்றில் ஒரு புதிய அத்தியாயத்தை எழுதும் என்பதில் மாற்றுக் கருத்து இல்லை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
