தமிழக அரசியல் களம் தற்பொழுது மிகத் தீவிரமான விவாதங்களை நோக்கி நகர்ந்து கொண்டிருக்கும் வேளையில், பொறுப்பான பதவியில் இருக்கும் அரசியல் தலைவர்களே உண்மைக்கு புறம்பான வதந்திகளை பரப்புவது அதிர்ச்சியை ஏற்படுத்தியுள்ளது. மூன்று முன்னணி ஊடகங்கள் தமிழ்நாடு அரசு கேபிள் டிவி நிறுவனத்தின் ஒளிபரப்பிலிருந்து நீக்கப்பட்டுள்ளதாக பாஜகவில் இருந்து பிரிந்து வந்து தனி இயக்கம் ஆரம்பித்துள்ள அண்ணாமலை அவர்கள் தனது எக்ஸ் தளத்தில் ஒரு பதிவை வெளியிட்டிருந்தார். தவெக அரசின் நிர்வாக திறனின்மை மற்றும் மின்வெட்டு பிரச்சினைகளை இந்த ஊடகங்கள் வெளிச்சம் போட்டு காட்டுவதால், ஆளுங்கட்சி பழிவாங்கும் நோக்கில் இந்த தடையை ஏற்படுத்தியுள்ளதாக அவர் குற்றம் சாட்டியிருந்தார்.
ஆனால், அண்ணாமலை அவர்கள் முன்வைத்த இந்த குற்றச்சாட்டுகள் முற்றிலும் உண்மைக்கு மாறானவை மற்றும் அடிப்படையற்றவை என்பது தற்பொழுது ஆதாரப்பூர்வமாக அம்பலமாகியுள்ளது. “அண்ணாமலை நீங்களுமா இப்படி?” என்று கேட்கும் அளவுக்கு, எந்தவொரு அடிப்படை உண்மைகளையும் தீர விசாரித்து அறிந்துகொள்ளாமல், அவசரகதியில் அரசுக்கு எதிராக பொய்ச்செய்தியைப் பரப்பியது அரசியல் முதிர்ச்சியின்மையையே காட்டுகிறது. உண்மைக்கு புறம்பான தகவல்களை பரப்பி, அதன் மூலம் அரசியல் ரீதியான விளம்பரம் தேடலாம் என்று அவர் நினைத்திருந்தால், அதற்கு பதிலடி கொடுக்க தற்பொழுது தமிழகத்தில் விழிப்புணர்வுமிக்க ‘ஜென் ஸி’ தலைமுறையினர் சமூக வலைத்தளங்களில் தயாராக இருக்கிறார்கள் என்பதை அவர் மறந்துவிட்டார்.
இந்த விவகாரத்தின் உண்மை தன்மையை தமிழ்நாடு அரசின் TN Fact Check அதிகாரப்பூர்வமாக வெளியிட்டு அண்ணாமலையின் பொய் பிரச்சாரத்திற்கு முற்றுப்புள்ளி வைத்துள்ளது. அரசு கேபிள் டிவி நிறுவனத்தின் ஒளிபரப்பில் மூன்று சேனல்களும் நீக்கப்பட்டுள்ளன என்ற செய்தி முற்றிலும் தவறானது என்று தமிழ்நாடு அரசு திட்டவட்டமாக மறுத்துள்ளது.
அரசு வெளியிட்டுள்ள விளக்கத்தின்படி, குறிப்பிட்ட அந்த மூன்று செய்தி சேனல்களையும் சில தொழில்நுட்பப் பிரச்சினைகள் காரணமாக மட்டுமே தற்காலிகமாக சில செட் ஆஃப் பாக்ஸ்களில் ஒளிபரப்பு செய்ய இயலவில்லை என்பது தெளிவாகிறது. இது ஒரு தற்காலிகமான தொழில்நுட்ப கோளாறே தவிர, அரசியல் பழிவாங்கும் நடவடிக்கை எதுவுமில்லை. மேலும், இந்த தொழில்நுட்ப கோளாறு தொடர்பாக சம்பந்தப்பட்ட தொலைக்காட்சி சேனல்களுக்கும் முறையான தகவல் முன்கூட்டியே தெரிவிக்கப்பட்டுள்ளது. இந்த தொழில்நுட்ப பிரச்சினையை உடனடியாக சரிசெய்வதற்காக, ஒப்பந்தம் செய்யப்பட்டுள்ள நிறுவனம் மூலமாக முழுவீச்சில் பணிகள் தற்பொழுது மேற்கொள்ளப்பட்டு வருகின்றன.
அரசு கேபிள் நிறுவனம் செட் ஆஃப் பாக்ஸ் நிறுவனத்திற்கு வைத்திருக்கக்கூடிய நிலுவைத் தொகை காரணமாகத்தான் இந்த ஒளிபரப்புத் தடை ஏற்பட்டுள்ளது என்று அண்ணாமலை அவர்கள் குறிப்பிட்டிருந்த காரணமும் முற்றிலும் தவறானது என்று அரசு ஆதாரங்களுடன் விளக்கியுள்ளது. பண பற்றாக்குறை அல்லது நிலுவை தொகை போன்ற எந்தவொரு நிதி பிரச்சினையும் இங்கு இல்லை என்பதையும் தமிழ்நாடு அரசின் தகவல் சரிபார்ப்பகம் திட்டவட்டமாக நிரூபித்துள்ளது. இத்தகைய எதார்த்தமான தொழில்நுட்ப சிக்கலை தங்களுக்கு சாதகமாகப் பயன்படுத்தி கொண்டு, தவெக அரசுக்கு கெட்ட பெயர் ஏற்படுத்த எதிர்க்கட்சிகள் முயல்வது அம்பலமாகியுள்ளது.
தமிழக மக்கள் மத்தியில் இன்னமும் அண்ணாமலை அவர்கள் மீது ஒரு குறிப்பிட்ட அளவிலான மதிப்பும் மரியாதையும், அவர் ஒரு படித்த அதிகாரி என்ற நம்பிக்கையும் நீடித்து வருகிறது. ஆனால், அதை சீர்குலைக்கும் விதமாக, ‘கொத்தூஸ்கள்’ என்று அழைக்கப்படும் வதந்திக் கும்பலின் பாணியில் அவரும் பொய்ச்செய்திகளை பரப்ப தொடங்கியிருப்பது அவரது அரசியல் நாகரிகத்தை கேள்விக்குள்ளாக்கியுள்ளது. அரசை விமர்சிப்பதில் தவறில்லை, ஆனால் அது தரவுகளின் அடிப்படையிலும் நேர்மையான முறையிலும் இருக்க வேண்டும். எனவே, மலிவான விளம்பர அரசியலை தவிர்த்துவிட்டு, தமிழ்நாட்டு மக்கள் உங்களிடம் எதிர்பார்க்கும் கண்ணியமான மற்றும் ‘டீசண்ட்’ அரசியலை முன்வைக்க வேண்டும் என்பதே நடுநிலையாளர்களின் எதிர்பார்ப்பாக உள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
