தமிழக அரசியல் களத்தில் கடந்த சில நாட்களாகவே “அண்ணாமலை ஏன் பாரதிய ஜனதா கட்சியை விட்டு விலகினார்?” என்ற கேள்விதான் பிரதானமாக விவாதிக்கப்பட்டு வருகிறது. ஆனால், அதைவிட மிக முக்கியமான, ஆழமான கேள்வி ஒன்று இருக்கிறது; அது “அண்ணாமலை ஏன் இவ்வளவு காலமாகப் பாஜகவிலேயே நீடித்தார்?” என்பதுதான். திமுகவின் முக்கியப் புள்ளிகளின் சொத்து விவரங்களை அடுக்கடுக்கான ஆதாரங்களுடன் வெளியிட்ட ‘டிஎம்கே ஃபைல்ஸ்’, முன்னாள் அமைச்சர் செந்தில் பாலாஜி விவகாரம், டாஸ்மாக் முறைகேடுகள் எனத் தமிழக அரசை உலுக்கிய எத்தனையோ விவகாரங்களை அண்ணாமலைதான் முன்னெடுத்து பேசினார். இவ்வளவு விஷயங்களை பேசிய ஒரு தலைவருக்கு தமிழ்நாட்டில் தனிப்பட்ட முறையில் மிகப்பெரிய அரசியல் அங்கீகாரம் கிடைக்காமல் போனதற்கு ஆளும்கட்சியான திமுகவோ அல்லது பிரதான எதிர்க்கட்சியான அதிமுகவோ காரணம் அல்ல, மாறாக அவர் இருந்த பாஜகதான் காரணம் என்று அரசியல் விமர்சகர்கள் கருதுகின்றனர்.
இதற்கு மிக முக்கியக் காரணம், தமிழ்நாட்டின் தற்போதைய அரசியல் சூழலில் அண்ணாமலை எவ்வளவுதான் ஆக்ரோஷமாக பேசினாலும், ஊழல்களுக்கு எதிராக சவுக்கடி கொடுத்தாலும், சாமானிய மக்கள் அவரை தனிப்பட்ட ‘அண்ணாமலையாக’ பார்க்கத் தவறிவிட்டனர். அவர் மேடைகளில் பேச தொடங்குவதற்கு முன்பாகவே, அவர் மீது பூசப்பட்டிருந்த காவி பிம்பத்தை கண்டு “இவன் பாஜககாரன் தானே” என்ற ஒரு முன்தீர்மானத்திற்கு மக்கள் வந்துவிட்டனர். திராவிட பாரம்பரியம் கொண்ட தமிழக மண்ணில், ஒரு தேசிய கட்சியின் அடையாளம் அண்ணாமலையின் தனிப்பட்ட உழைப்பையும் அவரது தீவிரமான அரசியல் பாய்ச்சலையும் முழுமையாக மக்களிடம் கொண்டு சேர்க்கும் பாதையில் ஒரு முட்டுக்கட்டையாகவே இருந்தது என்பதுதான் எவராலும் மறுக்க முடியாத கசப்பான உண்மையாகும்.
ஆனாலும், தமிழக அரசியல் வரலாற்றிலேயே இதுவரை இல்லாத ஒரு விசித்திரமான மற்றும் சுவாரசியமான போக்கையும் அண்ணாமலை விஷயத்தில் நாம் பரவலாக காண முடிந்தது. தமிழ்நாட்டின் பல பகுதிகளில் “எனக்கு பாஜகவை சுத்தமாக பிடிக்காது, ஆனால் அண்ணாமலையை மிகவும் பிடிக்கும்” என்ற முழக்கத்தை நடுநிலை வாக்காளர்களிடம் கேட்க முடிந்தது; ஏனெனில், பொதுவாக ஒரு கட்சி பிடிக்கவில்லை என்றால், அந்த கட்சியில் இருக்கும் தலைவர்களையும் மக்கள் வெறுப்பதுதான் வழக்கம். ஆனால், அண்ணாமலை ஒரு வழக்கமான அரசியல்வாதியை போல நடந்து கொள்ளாமல், எப்போதும் ஒரு நேர்மையான ஐபிஎஸ் அதிகாரியை போன்றே மக்கள் மத்தியில் வலம் வந்தார். எந்தவொரு மேடைக்கும் வெறும் வெற்று பேச்சுகளுடன் வராமல், பெரிய ஃபைல்கள், அரசு ஆவணங்கள் மற்றும் தகுந்த எவிடன்ஸ்களுடன் வந்து அவர் பேசிய விதம், படித்த இளைஞர்களையும் நடுத்தர வர்க்கத்தினரையும் அவர் பால் பெரிதும் ஈர்த்தது.
அண்ணாமலையின் இந்த அதிரடியான மற்றும் ஆவண அரசியல் பாணியை பார்த்து எதிர்க் கட்சியான திமுக மட்டுமல்ல, சொந்த கட்சியான பாஜகவிற்குள்ளேயே இருந்த சில மூத்த தலைவர்களும் கூட திரைமறைவில் பயந்தார்கள் என்பதுதான் நிதர்சனம். இந்த தனித்துவமான ஆளுமையால் அவருக்கு பின்னால் ஒரு மிகப்பெரிய ரசிகர் பட்டாளமும், தீவிரமான தொண்டர் கூட்டமும் உருவாகியது என்பதில் ஐயமில்லை. ஆனால், தனக்கு பின்னால் திரண்ட அந்த பெருங்கூட்டத்தை, தேர்தல் களத்தில் வெற்றியை தீர்மானிக்கும் செல்லுபடியாகும் வாக்குகளாக மாற்றுவதில் அண்ணாமலையால் முழுமையான வெற்றியை பெற முடியவில்லை; அதற்கு அவர் மீது பூசப்பட்டிருந்த தேசிய கட்சியின் காவி அடையாளமே பிரதான காரணியாக அமைந்தது. தற்போது அந்த அடையாளத்தை துறந்து, முற்றிலும் ஒரு புதிய பிராந்திய சக்தியாக அவர் தமிழ்நாட்டிற்குள் மறுபிரவேசம் செய்யவிருக்கும் சூழலில், அவரது அரசியல் எதிர்காலத்தை தீர்மானிக்க போகும் மூன்று முக்கிய கேள்விகள் அரசியல் விமர்சகர்களின் மண்டைக்குள் ஓடி கொண்டிருக்கின்றன.
அதில் முதல் கேள்வி என்னவென்றால், இவ்வளவு காலமாக தமிழ்நாட்டில் பாரதிய ஜனதா கட்சியின் முதன்மை முகமாகவும், தீவிரமான பிரசாரகராகவும் அறியப்பட்ட அண்ணாமலை, இனிவரும் காலங்களில் தான் ஒரு பாஜககாரன் இல்லை என்பதை பொதுமக்களிடம் எவ்வாறு நிரூபிக்க போகிறார் என்பதுதான். இரண்டாவது கேள்வி, அண்ணாமலை என்னதான் தனிக்கட்சி தொடங்கினாலும், அவருக்குப் பின்னால் மறைமுகமாக பாஜகதான் இருக்கும் என்று நம்பும் வாக்காளர்களின் சந்தேகத்தை தீர்க்கும் விதமாக, “எதிர்காலத்தில் நான் ஒருபோதும் பாஜகவுடன் கூட்டணி வைக்க மாட்டேன்” என்று அண்ணாமலையால் பகிரங்கமாக அறிவிக்க முடியுமா என்பதாகும். இறுதியாக, தமிழ்நாட்டின் 59 ஆண்டுகாலத் திராவிட அரசியல் விளையாட்டை உடைத்தெறிந்து, நடிகர் விஜய் ஏற்கனவே தனது தவெக கட்சியின் மூலம் முதலமைச்சர் நாற்காலியில் அமர்ந்துவிட்ட நிலையில், எதிர்காலத்தில் விஜய்க்கு எதிராக தனித்து நின்று அண்ணாமலையால் தமிழ்நாட்டின் முதலமைச்சராகப் பொறுப்பேற்க முடியுமா என்ற கேள்வியும் எழுகிறது.
இறுதியாக, இந்த மூன்று மிக முக்கியமான கேள்விகளுக்கான விடைகளில்தான் அண்ணாமலையின் அடுத்த பத்து ஆண்டுகால அரசியல் வாழ்வும், அவரது புதிய இயக்கத்தின் எதிர்காலமும் முழுமையாக அடங்கியுள்ளது. சினிமா கவர்ச்சியைத் தாண்டி, மக்கள் செல்வாக்கைப் பெற்று ஆட்சிக்கட்டிலில் அமர்ந்துள்ள தவெகவின் புதிய அரசை எதிர்கொள்வது அண்ணாமலைக்கு அத்தனை எளிதான காரியமாக இருக்காது. எனினும், தேசியக் கட்சியின் தளைகளிலிருந்து விடுபட்டு, முழுமையான பிராந்தியத் தலைவராகக் களம் காணப் போகும் அண்ணாமலை, இந்தச் சவால்களைத் தனது நிர்வாகத் திறமையாலும், தரவுகள் சார்ந்த அரசியலாலும் எவ்வாறு முறியடிக்கப் போகிறார் என்பதைப் பொறுத்திருந்துதான் பார்க்க வேண்டும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
