தமிழக அரசியலில் பல தசாப்தங்களாக நிலவி வந்த கசப்பான அரசியல் கலாச்சாரத்தை உடைத்தெறியும் விதமாக, முதலமைச்சர் விஜய் இன்று மேற்கொண்டுள்ள நடவடிக்கை ஒரு புதிய சகாப்தத்தின் தொடக்கமாக பார்க்கப்படுகிறது.
கடந்த காலங்களில் எம்.ஜி.ஆர் – கருணாநிதி, ஜெயலலிதா – கருணாநிதி அல்லது எடப்பாடி பழனிசாமி – மு.க.ஸ்டாலின் என பெரும் தலைவர்களுக்கு இடையே அரசியல் ரீதியாக மட்டுமின்றி, தனிப்பட்ட ரீதியிலும் ஒரு பெரிய இடைவெளி நிலவி வந்தது. ஒரு தலைவர் மற்றொரின் இல்லத்திற்கு சென்று சந்திப்பது என்பது தமிழக வரலாற்றில் அரிதான ஒன்றாகவே இருந்து வந்தது. ஆனால், அந்த பழமைவாத சுவர்களை உடைத்து, முன்னாள் முதலமைச்சர் மு.க.ஸ்டாலினின் இல்லத்திற்கே நேரில் சென்ற முதலமைச்சர் விஜயின் செயல், தமிழகத்தில் “நாகரிக அரசியல்” மலர்ந்துள்ளதை உறுதிப்படுத்தியுள்ளது.
தேர்தல் களத்தில் பல்வேறு விமர்சனங்கள் முன்வைக்கப்பட்டாலும், ஆட்சி பொறுப்பேற்றவுடன் அனைத்தையும் கடந்து ஒரு முன்னோடி தலைவருக்கு மரியாதை அளிப்பது தலைசிறந்த பண்பாகும். தவெக மாநாடு மற்றும் தேர்தல் பரப்புரைகளின் போது முந்தைய அரசுக்கும், மு.க.ஸ்டாலினுக்கும் எதிராக கடுமையான அரசியல் விமர்சனங்களை விஜய் முன்வைத்திருந்தார். அதற்கு பதிலடியாக பல்வேறு நெருக்கடிகளும், அரசியல் ரீதியான குடைச்சல்களும் கொடுக்கப்பட்டதாக தவெக தொண்டர்கள் கருதுகின்றனர். இருப்பினும், அந்த பழைய கசப்பான நினைவுகள் எதையும் மனதில் வைத்துக்கொள்ளாமல், மக்கள் வழங்கிய அதிகாரத்தை முதிர்ச்சியுடன் கையாளும் விதமாக இந்த சந்திப்பு அமைந்துள்ளது.
முன்னாள் முதலமைச்சர் மு.க.ஸ்டாலினை சந்தித்து அவர் ஆசி பெற்ற நிகழ்வு, அரசியல் காழ்ப்புணர்ச்சிகளுக்கு அப்பாற்பட்ட ஒரு உயரிய முன்னுதாரணமாகும். “அரசியல் எதிரி வேறு, தனிப்பட்ட மரியாதை வேறு” என்பதை சொல்லால் மட்டும் சொல்லாமல், தனது செயலில் நிரூபித்துக் காட்டியுள்ளார் முதலமைச்சர் விஜய். ஒரு ஜனநாயக நாட்டில் ஆளுங்கட்சியும் எதிர்க்கட்சியும் இணக்கமாக செயல்படுவது மாநிலத்தின் வளர்ச்சிக்கு எவ்வளவு முக்கியம் என்பதை இந்தச் சந்திப்பு உணர்த்துகிறது. தமிழகத்தின் மூத்த அரசியல் தலைவர்கள் இச்சம்பவத்தை தமிழக அரசியலின் ஆரோக்கியமான மாற்றமாகவே பார்க்கின்றனர்.
இந்த சந்திப்பின் மூலம் தவெக தலைவர் விஜய், தான் ஒரு “மாற்று அரசியல்” சக்தியாக உருவெடுத்துள்ளதை மீண்டும் ஒருமுறை பறைசாற்றியுள்ளார். வெறும் மேடை பேச்சுகளோடு நில்லாமல், களத்தில் ஒரு புதிய அரசியல் பண்பாட்டை விதைக்க அவர் எடுத்துள்ள இந்த முயற்சிக்கு சமூக வலைத்தளங்களில் பாராட்டுகள் குவிந்து வருகின்றன. எதிர்தரப்பு தலைவர்களை கிண்டல் செய்தும், இழிவுபடுத்தியும் பேசி வந்த பழைய அரசியல் பாணிக்கு முற்றுப்புள்ளி வைத்துவிட்டு, கண்ணியமான முறையில் அரசியலை முன்னெடுப்பது இளைஞர்களிடையே பெரும் வரவேற்பைப் பெற்றுள்ளது.
இறுதியாக, “நாகரிக அரசியல்” என்பது வெறும் வார்த்தையல்ல, அது ஒரு மாநிலத்தின் அமைதிக்கும் முன்னேற்றத்திற்கும் அடித்தளம் என்பதை இந்த நிகழ்வு மெய்ப்பித்துள்ளது. எவ்வளவோ தடைகளையும், நெருக்கடிகளையும் எதிர்கொண்ட பின்னரும், ஒரு பொறுப்பான முதலமைச்சராகத் தனது கடமையைச் செய்து, முன்னாள் முதல்வரிடம் வாழ்த்துப் பெற்றது விஜயின் அரசியல் முதிர்ச்சியைக் காட்டுகிறது. தமிழகம் இனிவரும் காலங்களில் இதுபோன்ற நாகரிகமான விவாதங்கள் மற்றும் சந்திப்புகளின் மூலம் இந்தியாவிற்கே ஒரு வழிகாட்டியாகத் திகழும் என்பதில் ஐயமில்லை. அண்ணன் முதல்வரின் இந்த அணுகுமுறை தமிழக அரசியலில் ஒரு வசந்த காலத்தின் தொடக்கமாகும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
