தேர்தல் முடிவுகளுக்கு முன்னதாக வெளியாகும் எக்சிட் போல் கணிப்புகள் ஜனநாயகத்தின் உண்மையான குரலா அல்லது திட்டமிடப்பட்ட ஒரு பிம்பமா என்ற கேள்வி தற்போது அரசியல் விமர்சகர்கள் மத்தியில் பலமாக எழுந்துள்ளது. பொதுவாக, ஊடகங்கள் நேரடியாக இந்த ஆய்வுகளை நடத்துவதில்லை; மாறாக, இதற்கென செயல்படும் கார்ப்பரேட் நிறுவனங்களிடமிருந்தே தரவுகளை பெறுகின்றன. இந்த கார்ப்பரேட் நிறுவனங்கள் பெரும்பாலும் தங்களின் வணிக நலன்களையும், தங்களுக்கு நிதி அளிக்கும் தரப்பினரின் விருப்பங்களையும் கருத்தில் கொண்டே செயல்பட வாய்ப்புள்ளது. இதனால், சேகரிக்கப்படும் தரவுகள் நேர்மையானதாக இருந்தாலும், அவை தொகுக்கப்படும் விதத்திலும் வெளியிடப்படும் விதத்திலும் ஒரு குறிப்பிட்ட அரசியல் உள்நோக்கம் மறைந்திருக்கக்கூடும் என்பது விமர்சகர்களின் பிரதான வாதமாக உள்ளது.
எக்சிட் போல் என்பது வாக்குச்சாவடிக்கு வெளியே சில ஆயிரம் பேரிடம் எடுக்கப்படும் ஒரு மேலோட்டமான ஆய்வு மட்டுமே. ஆனால், தேர்தலுக்கு முந்தைய Opinion Poll என்பது நீண்ட கால அவகாசத்தில், மக்களின் வாழ்வாதார பிரச்சினைகள் மற்றும் மனமாற்றங்களை ஆராய்ந்து எடுக்கப்படுவதாகும். அந்த வகையில் பார்த்தால், அவசர கதியில் எடுக்கப்படும் எக்சிட் போல்களை விட ஓரளவிற்காவது அறிவியல் பூர்வமான ஆய்வுக்கு உட்படுத்தப்படும் ஒப்பீனியன் போல்களே சற்று நம்பகமானவை. எக்சிட் போலில் வாக்காளர்கள் தாங்கள் யாருக்கு வாக்களித்தோம் என்பதை பொய் சொல்லவும் வாய்ப்புகள் அதிகம். குறிப்பாக, ஆளுங்கட்சிக்கு எதிராக வாக்களித்தவர்கள் அல்லது ஒரு புதிய மாற்றத்தை விரும்புபவர்கள், தேவையற்ற சிக்கல்களை தவிர்க்கத் தங்களின் உண்மையான தேர்வை வெளியில் சொல்ல தயங்குவார்கள்.
கார்ப்பரேட் நிறுவனங்கள் வெளியிடும் இந்த எண்கள் பல நேரங்களில் பங்குச்சந்தை மற்றும் அரசியல் முதலீடுகளை கட்டுப்படுத்தும் நோக்கம் கொண்டவை. ஒரு குறிப்பிட்ட கட்சி வெற்றி பெறும் என்ற பிம்பத்தை உருவாக்குவதன் மூலம், அந்த தரப்புக்கு ஆதரவான ஒரு மனநிலையை சமூகத்தில் உருவாக்க முடியும். இது வாக்கு எண்ணிக்கைக்கு முந்தைய சில நாட்களில் நிர்வாக ரீதியாகவும், உளவியல் ரீதியாகவும் பெரும் தாக்கத்தை ஏற்படுத்தும். இத்தகைய கணிப்புகள் பெரும்பாலும் பெருநகரங்களை மையப்படுத்தியே எடுக்கப்படுகின்றன; கிராமப்புறங்களில் நிலவும் மௌனமான அலைகளையும், அடித்தட்டு மக்களின் உண்மையான தேவைகளையும் இந்த ஏசி அறையில் அமர்ந்து கணக்கு போடும் நிறுவனங்களால் ஒருபோதும் துல்லியமாகக் கண்டறிய முடியாது.
கடந்த காலங்களில் தமிழகம் மற்றும் இதர இந்திய மாநிலங்களில் இத்தகைய எக்சிட் போல்கள் படுதோல்வி அடைந்ததற்கு காரணம், அவை மக்களின் உணர்வுகளை விடவும் புள்ளிவிவரங்களுக்கே முக்கியத்துவம் கொடுத்ததுதான். ஒரு தொகுதியில் இருக்கும் லட்சக்கணக்கான வாக்காளர்களில் வெறும் ஐநூறு அல்லது ஆயிரம் பேரிடம் மட்டும் பேசிவிட்டு, அந்த தொகுதியின் ஒட்டுமொத்த தீர்ப்பையும் தீர்மானிப்பது என்பது தர்க்க ரீதியாக பிழையானது. மேலும், இந்த நிறுவனங்கள் தங்களின் தரவு சேகரிப்பு முறையிலோ அல்லது மாதிரி தேர்விலோ முழுமையான வெளிப்படைத்தன்மையை கடைப்பிடிப்பதில்லை. எந்த அடிப்படையில் இந்த எண்கள் வந்தன என்று கேள்வி கேட்டால், வணிக ரகசியம் என்று கூறித் தப்பித்துக் கொள்ளும் போக்கே நிலவுகிறது.
ஆகவே, ஊடகங்கள் காட்டும் வண்ணமயமான வரைபடங்களையும் எண்களையும் பார்த்து மக்கள் ஒரு முடிவுக்கு வந்துவிட வேண்டிய அவசியம் இல்லை. கார்ப்பரேட் நிறுவனங்களின் உள்நோக்கங்கள் எக்சிட் போல்களில் எதிரொலிக்கும் என்பதை உணர்ந்து, அவற்றை ஒரு பொழுதுபோக்கு தகவலாக மட்டுமே அணுக வேண்டும். உண்மையான மக்கள் தீர்ப்பு என்பது வாக்கு எந்திரங்களுக்குள் பாதுகாப்பாக இருக்கிறது. அதை தீர்மானிப்பது கார்ப்பரேட் நிறுவனங்களின் கணிப்புகள் அல்ல, சாமானிய மக்களின் விரல் நுனிப் புரட்சிதான். மே 4-ஆம் தேதி அதிகாரப்பூர்வ முடிவுகள் வெளியாகும் போது, இந்த ஏர்-கண்டிஷன்ட் கணிப்புகள் அனைத்தும் தவிடுபொடியாவதை கடந்த காலங்களை போலவே இப்போதும் நாம் காணக்கூடும் என்பதே அரசியல் விமர்சகர்களின் ஒருமித்த கருத்தாக உள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
