தமிழக அரசியல் களத்தில் 2026 சட்டமன்ற தேர்தலுக்கான காய் நகர்த்தல்கள் சூடுபிடித்துள்ள நிலையில், அனைவரின் கவனமும் அ.தி.மு.க.வின் பொதுச்செயலாளர் எடப்பாடி பழனிசாமியின் தலைமையின் மீது திரும்பியுள்ளது. முன்னாள் அமைச்சர் கே.ஏ. செங்கோட்டையன் போன்ற முக்கிய பிரமுகரை வெளியேற்றியது, ஓ.பி.எஸ். மற்றும் டி.டி.வி. தினகரன் ஆகியோரை இணக்கமற்ற நிலையில் வைத்திருப்பது, கூட்டணி பேச்சுவார்த்தைகளில் மெதுவாக செயல்படுவது போன்ற அவருடைய முடிவுகள், அ.தி.மு.க.வின் வெற்றி வாய்ப்பை இந்த முறையும் கேள்விக்குறியாக்கிவிட்டதா என்ற சந்தேகம் வலுத்துள்ளது. இளைஞர் சக்தி கொண்ட தமிழக வெற்றிக் கழகம் மற்றும் வலுவான தி.மு.க. கூட்டணியை எதிர்கொள்ள ஈபிஎஸ் அவர்களுடைய தற்போதைய வியூகம் போதுமானதா என்ற கேள்வியும் எழுகிறது.
அ.தி.மு.க.வின் மூத்த நிர்வாகிகளில் ஒருவரும், கொங்கு மண்டலத்தின் செல்வாக்கு மிக்க தலைவருமான கே.ஏ. செங்கோட்டையன் கட்சியில் இருந்து நீக்கப்பட்டதும், அதனை தொடர்ந்து அவர் எம்.எல்.ஏ. பதவியை ராஜினாமா செய்ததும் ஈபிஎஸ் எடுத்த ஒரு முக்கியமான ஆனால் தவறான முடிவாக பார்க்கப்படுகிறது. அ.தி.மு.க.வின் மிக முக்கியமான பலமான கொங்கு மண்டல வாக்குகளை கட்டுக்குள் வைத்திருந்த ஒரு தலைவரை வெளியேற்றியது, அந்த பகுதியில் அதிமுகவின் செல்வாக்கை பலவீனப்படுத்தும். மேலும், செங்கோட்டையன் போன்ற மூத்த தலைவர்களின் அனுபவத்தையும், அவர்களின் சமூக ரீதியான தொடர்புகளையும் த.வெ.க. பயன்படுத்தி கொண்டால், அ.தி.மு.க.வின் பாரம்பரிய வாக்கு வங்கி எளிதில் சிதைக்கப்பட்டு, அது விஜய் அணிக்கு மிகப்பெரிய பலமாக அமையும்.
அ.தி.மு.க.வின் பாரம்பரிய வாக்கு வங்கியை முழுமையாக தக்க வைத்துக் கொள்ள வேண்டுமானால், ஓ.பன்னீர்செல்வம் மற்றும் டி.டி.வி. தினகரன் ஆகியோரை கூட்டணியில் அல்லது கட்சியினுள் இணைப்பது காலத்தின் கட்டாயம் என்று அரசியல் நோக்கர்கள் தொடர்ந்து வலியுறுத்தி வந்தனர். ஆனால், ஈபிஎஸ் தன் தனிப்பட்ட அதிகாரத்தை காக்க இந்த தலைவர்களை தவிர்த்துவிட்டார். தென் மாவட்டங்களிலும், முக்குலத்தோர் சமூகத்திலும் ஓ.பி.எஸ். மற்றும் டி.டி.வி. தினகரனுக்கு இருக்கும் வாக்கு வங்கி அ.தி.மு.க.வுக்குக் கிடைக்காமல் போவது தி.மு.க. மற்றும் த.வெ.க.வுக்கு சாதகமாக மாறும். ஈபிஎஸ் அவர்களால் ஒதுக்கப்பட்ட தலைவர்கள் அனைவரும் தற்போது த.வெ.க.வை நோக்கியோ அல்லது அதன் தலைமையில் உருவாகும் கூட்டணியை நோக்கியோ திரள தொடங்கியுள்ளனர். இது எடப்பாடியாரின் தவறான முடிவால் விஜய்க்கு கிடைத்த இலவச பலமாக மாறியுள்ளது.
வலுவான தி.மு.க. கூட்டணியை எதிர்கொள்ள, அ.தி.மு.க.வும் ஒரு பலமான கூட்டணி கட்சிகளின் சங்கிலியை கட்டமைத்திருக்க வேண்டும். ஆனால், இதுவரை ஈபிஎஸ் அணி பா.ஜ.க.வை மட்டும் நம்பி நிற்கிறது. வட தமிழகத்தில் கணிசமான செல்வாக்குடைய பா.ம.க.வையும் மக்கள் மத்தியில் இன்னும் ஈர்ப்பு வைத்திருக்கும் தே.மு.தி.க.வையும் ஈபிஎஸ் இந்நேரம் தன்னுடைய கூட்டணிக்குள் கொண்டு வந்திருக்க வேண்டும். இந்த கட்சிகள் வேறு வழியில்லாமல் தி.மு.க. அல்லது த.வெ.க. கூட்டணியின் பக்கம் சென்றால், அது அ.தி.மு.க.வுக்கு ஈடு செய்ய முடியாத இழப்பாக மாறும். பா.ஜ.க.வின் ஆதரவை மட்டுமே வைத்துக்கொண்டு, அனைத்து சமூக பிரிவினரையும் உள்ளடக்கிய தி.மு.க.வின் வலுவான கூட்டணியை ஈபிஎஸ் எப்படி வெல்ல முடியும் என்ற கேள்வி எழுகிறது.
விஜய் தலைமையில் உருவாகியுள்ள த.வெ.க.வின் மிகப்பெரிய பலம், இளைஞர்கள் மற்றும் புதிய வாக்காளர்கள் மத்தியில் அவருக்கு உள்ள கவர்ச்சி தான். ஈபிஎஸ்-ன் அரசியல் நகர்வுகள் பாரம்பரிய அரசியலை சார்ந்துள்ள நிலையில், த.வெ.க.வின் இந்த இளைஞர் சக்தியை ஈபிஎஸ் எப்படி சமாளிக்கப் போகிறார் என்பதே தலையாய சவால்.
தி.மு.க.வின் மீதுள்ள அதிருப்தி வாக்குகளை, அ.தி.மு.க.வை போல பல ஆண்டுகளாக அரசியலில் இருக்கும் ஒரு கட்சிக்கு அளிப்பதற்கு பதிலாக, ‘மாற்றம் வேண்டும்’ என்ற மனநிலையில் உள்ள வாக்காளர்கள், புதிய முகமான விஜய்க்கு வாக்களிக்க அதிக வாய்ப்புள்ளது. இளைஞர்களை ஈர்க்கும் வகையில் எந்தவொரு கவர்ச்சிகரமான மாற்றுத் தலைமையை ஈபிஎஸ் முன்னிறுத்த முடியவில்லை என்பதும் த.வெ.க.வுக்கு மேலும் சாதகமாக அமைகிறது.
ஜெயலலிதா மறைவுக்கு பிறகு, உட்கட்சி போட்டிகளை சமாளித்துத் தலைமை பொறுப்புக்கு வந்த ஈபிஎஸ் கட்சியை ஒருங்கிணைத்து, பலமான கூட்டணியை அமைத்து, தி.மு.க.வை எதிர்க்க வேண்டிய ஒரு பொன்னான வாய்ப்பை இப்போது இழந்துவிட்டார் என்றே தோன்றுகிறது. செங்கோட்டையன் போன்ற தலைவர்களை நீக்கியதும், ஓ.பி.எஸ். மற்றும் டி.டி.வி. தினகரனை புறக்கணித்ததும் ‘நான் ஒருவன் மட்டுமே’ என்ற பிடிவாதத்தின் விளைவாக ஈபிஎஸ் இடம் பார்க்கப்படுகிறது. இந்த நகர்வுகள் அ.தி.மு.க.வை உடைத்து, சிதறிய வாக்குகளை த.வெ.க. தலைமையிலான அணிக்கு பரிசாக அளிக்கும் சூழ்நிலையை உருவாக்கியுள்ளன.
இறுதியாக, வலுவான கூட்டணி, ஒருங்கிணைந்த தலைமை மற்றும் ஆட்சி மீதான அதிருப்தி ஆகிய மூன்று காரணங்கள் வெற்றியை தீர்மானிக்கக் கூடிய நிலையில், ஈபிஎஸ் அணி மேற்கண்ட எந்தவொரு காரணத்தையும் சாதகமாக்கவில்லை என்பது துரதிஷ்டமே என்று அரசியல் விமர்சகர்கள் கருத்து தெரிவித்து வருகின்றனர்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
