தமிழக அரசியல் களத்தில், பாரதிய ஜனதா கட்சியின் முன்னாள் மாநில தலைவர் அண்ணாமலை குறித்த சர்ச்சைகள் மீண்டும் வலுப்பெற்றுள்ளன. அ.தி.மு.க. மற்றும் பா.ஜ.க. கூட்டணியை பலவீனப்படுத்தி, அதன் மூலம் மறைமுகமாக தி.மு.க.வுக்கு உதவ அண்ணாமலை முயற்சிக்கிறாரா என்ற கேள்விகள் அரசியல் நோக்கர்கள் மத்தியில் எழுந்துள்ளன. ஒரு ஐ.பி.எஸ். அதிகாரியாக பணியாற்றியவருக்கு, அரசியல் சூழ்ச்சிகள் தெரியாதா என்ற ஐயத்தையும் இது ஏற்படுத்துகிறது.
சமீபத்தில், தேசிய ஜனநாயக கூட்டணியில் இருந்து விலகுவதாக அறிவித்த அ.ம.மு.க. தலைவர் டி.டி.வி.தினகரனை, அண்ணாமலை சந்தித்து பேசியது பெரும் பரபரப்பை ஏற்படுத்தியது. தி.மு.க. கூட்டணியை வீழ்த்துவது குறித்து தினகரனுடன் விவாதித்ததாக அண்ணாமலை விளக்கம் அளித்தார். ஆனால், எடப்பாடி பழனிசாமி முதல்வர் வேட்பாளராக இருந்தால் தேசிய ஜனநாயக கூட்டணியில் ஒருபோதும் இணைய மாட்டேன் என தினகரன் உறுதியாக இருக்கும் நிலையில், அண்ணாமலையின் இந்த சந்திப்பு, அ.தி.மு.க.வுக்குள் அதிருப்தியை உருவாக்கியுள்ளது.
எடப்பாடிக்கு எதிராக செயல்படும் தினகரனுடன் அண்ணாமலை பேசுவது, அ.தி.மு.க.வின் பலத்தை குறைக்கும் ஒரு மறைமுக முயற்சியாகவே பார்க்கப்படுகிறது. இது கூட்டணி கட்சியினருக்கு இடையே ஒற்றுமையின்மை என்ற பிம்பத்தை ஏற்படுத்தி, தி.மு.க.வுக்கு சாதகமாக மாறும் என அரசியல் விமர்சகர்கள் கூறுகின்றனர்.
டி.டி.வி.தினகரனை தொடர்ந்து, ஓ.பன்னீர்செல்வத்தையும் சந்திக்க உள்ளதாக அண்ணாமலை தெரிவித்துள்ளார். ஓ.பி.எஸ். மற்றும் எடப்பாடி பழனிசாமி ஆகியோரை மீண்டும் இணைக்கும் முயற்சியில் அண்ணாமலை ஈடுபடுகிறாரா அல்லது அ.தி.மு.க.வில் எடப்பாடிக்கு எதிராக ஓ.பி.எஸ்.ஐப் பயன்படுத்த அண்ணாமலை நினைக்கிறாரா என்ற கேள்விகளும் எழ தொடங்கியுள்ளன.
இந்தச் சந்திப்புகள், அ.தி.மு.க.வுக்குள் இருக்கும் உட்கட்சிப் பூசல்களை மேலும் வெளிச்சத்துக்கு கொண்டு வரும். இது ஒற்றை தலைமையின் கீழ் வலுப்பெற நினைக்கும் அ.தி.மு.க.வின் முயற்சிகளுக்கு பின்னடைவை ஏற்படுத்தும். அ.தி.மு.க.-பா.ஜ.க. கூட்டணியை பலவீனப்படுத்துவது தி.மு.க.வுக்கு லாபமாக அமையும் என்பதே உண்மை.
அ.தி.மு.க. மற்றும் பா.ஜ.க. கூட்டணியில் பிளவு ஏற்பட்டால், ஓ.பி.எஸ்., டி.டி.வி.தினகரன் போன்றோர் தனியாக போட்டியிடுவர். இது அ.தி.மு.க.வின் வாக்குகளை பிரித்து, தி.மு.க.வின் வெற்றி வாய்ப்பை அதிகரிக்கும். ஒருவேளை அண்ணாமலை தனிக்கட்சி தொடங்கினால், பா.ஜ.க.வின் ஆதரவாளர்கள் வாக்குகளும் சிதறக்கூடும்.
எதிரணியில் பலவீனமான, குழப்பமான சூழல் நிலவினால், அது தி.மு.க.வின் கூட்டணிக்கு மேலும் பலம் சேர்க்கும். எதிர்க்கட்சிகள் தங்களுக்குள் சண்டையிட்டுக்கொண்டிருக்கும்போது, மக்களின் கவனம் தி.மு.க.வின் மீதே இருக்கும்.
அண்ணாமலை, தி.மு.க. அமைச்சர்கள் மீது சமீபகாலமாக எந்த முக்கிய ஊழல் குற்றச்சாட்டுகளையும் முன்வைக்கவில்லை. அவர் பாஜக தலைவராக இருந்தபோது திமுகவின் கண்ணில் விரலை விட்டு ஆட்டி கொண்டிருந்தார். ஆனால் தற்போது அவரது கவனம் அ.தி.மு.க.வின் உள் விவகாரங்கள் மீதும், அதன் முன்னாள் தலைவர்கள் மீதும் மட்டுமே உள்ளது. இது தி.மு.க. அரசின் மீதுள்ள மக்கள் கோபத்தை குறைத்து, அ.தி.மு.க., பா.ஜ.க. போன்ற எதிர்க்கட்சிகள் மீது மக்களின் பார்வையை திருப்பும்.
ஒரு முன்னாள் ஐ.பி.எஸ். அதிகாரி, இந்த அரசியல் கணக்குகளை புரிந்துகொள்ளாமல் செயல்பட வாய்ப்பில்லை. எனவே, தி.மு.க.வை ஜெயிக்க வைக்க அவர் மறைமுகமாக செயல்படுகிறாரா என்ற சந்தேகம் வலுக்கிறது. இந்த விவகாரங்கள், வரவிருக்கும் தேர்தல் களத்தில் என்ன தாக்கத்தை ஏற்படுத்தும் என்பதை பொறுத்திருந்துதான் பார்க்க வேண்டும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
