அமெரிக்க அதிபர் டொனால்ட் ட்ரம்பின் சீனாவுடனான வர்த்தக போர், உலகளாவிய வர்த்தகத்தின் போக்கை யாரும் எதிர்பாராத வகையில் மாற்றி வருகிறது. மலிவான சீன இறக்குமதிகள் மீது வாஷிங்டன் கடும் கட்டுப்பாடுகளை விதித்துள்ள நிலையில், ஐரோப்பா இப்போது குறைந்த மதிப்புடைய சீன பார்சல்களின் புதிய புகலிடமாக மாறியுள்ளது.
ஒரு காலத்தில் அமெரிக்க வீடுகளுக்கு சென்ற சீன பொருட்கள், இப்போது ஐரோப்பாவெங்கும் உள்ள கொல்லைப்புறங்கள், உதிரி அறைகள் மற்றும் சிறிய கிடங்குகளில் வந்து குவிகின்றன. இந்த திடீர் மாற்றம் உலகளாவிய வணிக சங்கிலி எவ்வாறு மாற்றியமைக்கப்பட்டு வருகிறது என்பதற்கான மிக தெளிவான அறிகுறியாகும்.
வால் ஸ்ட்ரீட் ஜர்னல் அறிக்கையின்படி, இங்கிலாந்தில் வசிக்கும் முன்னாள் ஷாங்காய் பெண்மணி ஒருவர், தனது வீட்டின் பின்னால் உள்ள கொட்டகையில் சீன விற்பனையாளர்களின் உடைகள், பைகள் மற்றும் தளபாடங்களை சேமித்து வைத்து உள்ளூர் விநியோகம் செய்கிறார். ஆர்டர்கள் வரும்போது அங்கிருந்து நேரடியாக அனுப்பப்படுவதால் விநியோக நேரம் வெகுவாக குறைகிறது. இதன் மூலம் ஒரு மாதத்தில் அவர் சுமார் 5,000 பவுண்டுகள் வரை சம்பாதிக்கிறார்.
அமெரிக்காவிற்கான சீன ஏற்றுமதி கடுமையாக வீழ்ச்சியடைந்தாலும், ஐரோப்பா மற்றும் தென்கிழக்கு ஆசியாவிற்கான ஏற்றுமதி பல மடங்கு அதிகரித்துள்ளது. இந்த மாற்றத்திற்கு முக்கியக் காரணம், வாஷிங்டன் அரசு ‘டி-மினிமிஸ்’ (de minimis) எனப்படும் வரிவிலக்கு ஓட்டையை அடைத்ததே ஆகும்.
கடந்த மே மாதம் முதல், 800 டாலருக்கும் குறைவான மதிப்புள்ள சீன பார்சல்களுக்கு அமெரிக்கா வரி விதிக்க தொடங்கியது. இதன் விளைவாக, அமெரிக்காவிற்கு செல்லும் இதுபோன்ற பார்சல்களின் எண்ணிக்கை 40 சதவீதத்திற்கும் மேலாக சரிந்துள்ளது. ஆனால், ஐரோப்பா இன்னும் இந்த பார்சல்களுக்கு கதவைத் திறந்து வைத்துள்ளது. ஐரோப்பிய ஒன்றியத்தில் 150 யூரோக்களுக்குக் கீழும், இங்கிலாந்தில் 135 பவுண்டுகளுக்குக் கீழும் உள்ள பார்சல்களுக்கு இப்போதும் வரி விதிக்கப்படுவதில்லை. இதனால் ஹங்கேரி, டென்மார்க் போன்ற நாடுகளுக்கு செல்லும் சீன மின்-வணிக ஏற்றுமதி நான்கு மடங்கு அதிகரித்துள்ளது.
சீன விற்பனையாளர்களை பொறுத்தவரை, இந்த திசைமாற்றம் வியக்கத்தக்க அளவில் உள்ளது. சீனாவின் மலிவான பார்சல் சந்தையில் இப்போது அமெரிக்காவை ஐரோப்பிய ஒன்றியம் முந்தியுள்ளது. சரக்கு விமானங்கள் இந்த தேவையை பூர்த்தி செய்ய போட்டி போடுகின்றன. மத்திய ஆசியா வழியாக ஐரோப்பாவிற்கு சீன தொழிற்சாலை பொருட்களை கொண்டு செல்லபுதிய வான்வழி பாதைகள் உருவாக்கப்பட்டுள்ளன. நேரடியாக தொழிற்சாலைகளில் இருந்து அனுப்புவதற்கு பதிலாக, ஐரோப்பாவிற்குள்ளேயே பொருட்களை குவித்து வைத்து விநியோகிக்கும் முறையை சீனத் தளங்கள் இப்போது பின்பற்றுகின்றன.
இருப்பினும், இந்த சீன பொருட்களின் வெள்ளம் ஐரோப்பாவில் கடும் எதிர்ப்பையும் கிளப்பியுள்ளது. பாரிஸில் உள்ள ஒரு வரலாற்று சிறப்புமிக்க துணிக்கடையில் ‘ஷைன்’ நிறுவனம் தனது கிளையை திறந்தபோது அங்கு போராட்டங்கள் வெடித்தன. சட்டவிரோத பட்டியல்கள் கண்டறியப்பட்டதை தொடர்ந்து அந்த தளத்தின் சில பகுதிகளை பிரெஞ்சு அதிகாரிகள் முடக்கினர். சுமார் 3 கோடி பேருக்கு வேலைவாய்ப்பு வழங்கும் ஐரோப்பிய சில்லறை வர்த்தகத்துறை, இத்தகைய மிக மலிவான இறக்குமதிகளால் அழிந்துவிடும் என வணிகர்கள் எச்சரிக்கின்றனர். ஆனாலும், ஐரோப்பிய நுகர்வோரை பொறுத்தவரை, தரத்தை விட மலிவான விலையும் வேகமான விநியோகமுமே முக்கியமாக தெரிகிறது.
தற்போது ஐரோப்பிய ஒழுங்குமுறை அமைப்புகள் இந்த சூழலைச் சமாளிக்க போராடி வருகின்றன. அடுத்த ஆண்டு முதல் சிறிய பார்சல்களுக்கு கட்டணம் அறிமுகப்படுத்தவும், 2028-க்குள் வரிவிலக்கு ஓட்டையை முழுமையாக அடைக்கவும் ஐரோப்பிய ஒன்றியம் திட்டமிட்டுள்ளது. உள்நாட்டு வேலைவாய்ப்புகளை பாதுகாக்க இங்கிலாந்தும் இதே பாதையை பின்பற்றும் என எதிர்பார்க்கப்படுகிறது. ஆனால், இந்த வேகத்தைத் தடுப்பது அவ்வளவு எளிதல்ல. அமெரிக்க-சீன வர்த்தக போராக தொடங்கியது இப்போது சீனாவின் ஏற்றுமதி இயந்திரத்தை புதிய பாதையில் திருப்பி விட்டுள்ளது. ட்ரம்பின் வரிவிதிப்பு ஒரு கதவை மூடியபோது, ஐரோப்பா தனது பின்வாசல் எவ்வளவு அகலமாக திறந்திருக்கிறது என்பதை இப்போதுதான் உணர்ந்து வருகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
