பாகிஸ்தான் ராணுவ தளபதி ஆசிம் முனீர் தற்போது ஒரு இக்கட்டான சூழலில் சிக்கியுள்ளார். ஒரு தவறான முடிவிலிருந்து மற்றொரு தவறான முடிவை நோக்கி அவர் பயணிப்பது அந்த நாட்டுக்கு பெரும் பின்னடைவை ஏற்படுத்தி வருகிறது. குறிப்பாக, ஆப்கானிஸ்தான் எல்லையில் நடத்தப்பட்ட ஆளில்லா விமானத் தாக்குதல் ஒரு மிகப்பெரிய தோல்வியாக முடிந்துள்ளது. ஈரானிய தொழில்நுட்பத்தை பயன்படுத்தி உருவாக்கப்பட்ட ட்ரோன் தொழிற்சாலையை தகர்த்ததாக பாகிஸ்தான் கூறினாலும், உண்மையில் அந்த ஏவுகணைகள் இலக்கை தவறவிட்டு 150 மீட்டர் தொலைவில் விழுந்துள்ளன. இது பாகிஸ்தான் ராணுவத்தின் தாக்குதல் துல்லியம் எந்த அளவில் உள்ளது என்பதை உலகிற்கு அம்பலப்படுத்தியுள்ளது.
இந்த ராணுவ நடவடிக்கைகளுக்கு பின்னால் ஒரு ரகசிய அரசியல் நகர்வு ஒளிந்துள்ளது. சவூதி அரேபியாவுடன் பாகிஸ்தான் செய்துகொண்டுள்ள பாதுகாப்பு ஒப்பந்தத்தின்படி, ஈரான் அல்லது பிற அச்சுறுத்தல்களுக்கு எதிராக பாகிஸ்தான் தனது படைகளை அனுப்ப வேண்டும். ஆனால், உள்நாட்டு பாதுகாப்பு மற்றும் ஆப்கானிஸ்தான் எல்லை பதற்றத்தை காரணம் காட்டி, சவூதிக்கு உதவ முடியாமல் தப்பிக்கவே ஆசிம் முனீர் இந்த திட்டமிட்ட மோதலை உருவாக்கியதாக கருதப்படுகிறது. “நாங்கள் ஏற்கனவே போரில் இருக்கிறோம், எனவே கூடுதல் படைகளை அனுப்ப முடியாது” என்று சவூதியிடம் கூறுவதே இவரது முக்கிய வியூகமாக உள்ளது.
மறுபுறம், பாகிஸ்தான் ராணுவம் தனது சொந்த நாட்டு ஷியா முஸ்லிம்களுடன் தேவையற்ற மோதலில் ஈடுபட்டுள்ளது. சமீபத்தில் ஷியா மத தலைவர்களுடன் நடத்திய சந்திப்பில் ஆசிம் முனீர் மிகவும் கடினமான மற்றும் கோபமான தொனியில் பேசியது அந்த மக்களிடையே பெரும் கொந்தளிப்பை ஏற்படுத்தியுள்ளது. “உங்களுக்கு ஈரான் மீது அவ்வளவு பாசம் இருந்தால், அங்கேயே சென்றுவிடுங்கள்” என்று ராணுவ தரப்பில் கூறப்பட்டதாக தகவல்கள் கசிந்துள்ளன. பாகிஸ்தானின் மக்கள் தொகையில் கணிசமான பகுதியினராக உள்ள ஷியா பிரிவினரை இழிவுபடுத்துவது, அந்த நாட்டில் ஒரு உள்நாட்டு போர் ஏற்படுவதற்கான அறிகுறியாகவே பார்க்கப்படுகிறது.
ஆசிம் முனீர் ஒரே நேரத்தில் பல நாடுகளை ஏமாற்றி வருவதாக புகார்கள் எழுந்துள்ளன. ஒருபுறம் அமெரிக்காவிற்கு தனது வான்வெளியை பயன்படுத்த அனுமதி வழங்கிவிட்டு, மறுபுறம் சீனாவின் உதவியுடன் ஈரானுக்கு ராணுவ தளவாடங்களை அனுப்பி வருகிறார். கடந்த காலங்களில் இத்தகைய இரட்டை வேடங்களை பாகிஸ்தான் பல ஆண்டுகளாக மெதுவாக செய்து வந்தது, ஆனால் ஆசிம் முனீர் வெறும் மூன்று மாதங்களில் அனைத்தையும் செய்து முடித்து தன்னைத்தானே சிக்கலில் ஆழ்த்திக் கொண்டுள்ளார். அமெரிக்கா மற்றும் சவூதி அரேபியா ஆகிய இரு நாடுகளுமே இப்போது பாகிஸ்தானின் நம்பகத்தன்மையைக் கேள்வி கேட்க தொடங்கியுள்ளன.
பாகிஸ்தான் ராணுவத்தின் பிரச்சார அமைப்பான DG ISPR, தங்களது ட்ரோன்கள் அகமதாபாத் மற்றும் டெல்லி வரை பறந்து சென்றதாகவும், இந்தியாவால் அவற்றை தடுக்க முடியவில்லை என்றும் காமெடி கருத்துக்களை தெரிவித்து வருகிறது. ஆனால், உண்மையில் ஈரானின் ஏவுகணைகளை தடுப்பதற்கே பாகிஸ்தான் திணறி வருகிறது. தங்களது தோல்விகளை மறைக்க பொய்யான தகவல்களை பரப்புவது பாகிஸ்தான் ராணுவத்திற்கு புதியதல்ல. இருப்பினும், சர்வதேச உளவு அமைப்புகள் பாகிஸ்தானின் ஒவ்வொரு அசைவையும் கூர்ந்து கவனித்து வருவதால், இனி இத்தகைய பொய்கள் எடுபடாது.
எப்போதும் ஒரு நெருக்கடியில் சிக்கி கொள்ளும் போது, அதிலிருந்து தப்பிக்க இந்தியாவுடன் மோதலை உருவாக்குவது பாகிஸ்தானின் வழக்கமான யுக்தியாகும். தற்போது உள்நாட்டிலும் எல்லையிலும் தோல்விகளை சந்தித்து வரும் ஆசிம் முனீர், மக்களின் கவனத்தை திசைதிருப்ப இந்தியா மீது ஏதேனும் தாக்குதல்களை திட்டமிடக்கூடும் என்று அஞ்சப்படுகிறது. ஆனால், இந்தியாவின் தற்போதைய ராணுவ வலிமை மற்றும் தயார்நிலை பாகிஸ்தானுக்கு பேரழிவை உண்டாக்கும் என்பதை அவர் மறந்துவிடக் கூடாது. ஆசிம் முனீரின் இந்த தொடர் குளறுபடிகள் பாகிஸ்தானை ஒரு மிகப்பெரிய சரிவை நோக்கி இட்டு செல்கின்றன.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
