ஈரான் மற்றும் பாகிஸ்தான் நாடுகளுக்கு இடையே தற்போது நிலவி வரும் பதற்றமான சூழல், மத்திய ஆசிய அரசியலில் ஒரு புதிய திருப்பத்தை ஏற்படுத்தியுள்ளது. ஈரானில் சமீபகாலமாக நடந்து வரும் வன்முறை சம்பவங்கள் மற்றும் குண்டுவெடிப்புகளுக்கு பின்னால் பாகிஸ்தானின் மறைமுக பங்களிப்பு இருப்பதாக ஈரான் பாதுகாப்புத் துறை அதிகாரிகள் சூசகமாக தெரிவித்துள்ளனர். நேரடி போரில் ஈடுபடாமல், அமெரிக்கா மற்றும் இஸ்ரேல் போன்ற நாடுகளுடன் கைகோர்த்துக்கொண்டு முஸ்லிம் நாடுகளே ஈரானுக்கு எதிரான நடவடிக்கைகளை ஊக்குவிப்பதாக ஈரான் வைக்கும் குற்றச்சாட்டு, நேரடியாக பாகிஸ்தானை நோக்கியே திரும்பியுள்ளது. ஈரானிய புரட்சிகர காவல் படையின் அதிகாரப்பூர்வ ஊடகங்கள் மூலமாக தொடங்கும் இந்த விமர்சனங்கள், மெல்ல மெல்ல ராஜதந்திர தளங்களுக்கு நகர்ந்து, சர்வதேச அளவில் பாகிஸ்தானுக்கு ஒரு நெருக்கடியை உருவாக்கி வருகின்றன.
பாகிஸ்தான் மற்றும் ஈரான் நாடுகளுக்கு இடையேயான இந்த மோதலின் மையப்புள்ளியாக Jaish al-Adl போன்ற பயங்கரவாத குழுக்கள் விளங்குகின்றன. பலுசிஸ்தான் விடுதலைக்காக போராடுவதாக கூறிக்கொள்ளும் இந்த குழுக்களுக்கு, அமெரிக்காவின் சி.ஐ.ஏ மற்றும் இஸ்ரேலின் மொசாட் போன்ற உளவு அமைப்புகள் நிதியுதவி மற்றும் ஆயுதங்களை வழங்குவதாக நீண்டகாலமாக புகார்கள் உள்ளன. ஈரானின் உள்நாட்டு பாதுகாப்பை குலைக்க பாகிஸ்தான் மண்ணை பயன்படுத்திக்கொள்ளும் இந்த உத்தியை ஈரான் தற்போது மிக கூர்மையாக கவனித்து வருகிறது. பாகிஸ்தானின் கராச்சி துறைமுகத்தில் சமீபத்தில் ஏற்பட்ட தீ விபத்து போன்ற சம்பவங்கள், இத்தகைய எல்லை தாண்டிய சதிவேலைகளுக்கான ஒரு உடனடி பதிலடியாகவோ அல்லது பாகிஸ்தானின் பலவீனமான உள்நாட்டு பாதுகாப்பின் வெளிப்பாடாகவோ இருக்கலாம் என்று அரசியல் விமர்சகர்கள் கருதுகின்றனர்.
பாகிஸ்தான் தனது பொருளாதார நெருக்கடிகளில் இருந்து மீள அமெரிக்கா மற்றும் இஸ்ரேலின் நலன்களுக்கு துணை நிற்பது ஒரு வெளிப்படையான ரகசியமாகவே உள்ளது. குறிப்பாக, பாகிஸ்தானில் உள்ள விமானப்படை தளங்களில் இருந்து அமெரிக்காவின் ட்ரோன்கள் மற்றும் துருப்புக்கள் ஈரான் எல்லைகளை கண்காணிப்பதாக வரும் தகவல்கள் ஈரானை எரிச்சலடைய செய்துள்ளன. நூர் கான் விமானத்தளம் போன்ற இடங்களில் நடப்பதாக கூறப்படும் ரகசிய ஆலோசனைகள் மற்றும் உளவு தகவல்களை பகிர்தல் போன்றவை, பாகிஸ்தான் ஒரு ‘இரட்டை நிலைப்பாட்டை’ கொண்டிருப்பதை உறுதிப்படுத்துகின்றன. ஒருபுறம் அண்டை நாடு என்று கூறிக்கொண்டே, மறுபுறம் மேற்குலக நாடுகளின் ‘ஏஜென்ட்’ போல செயல்படும் பாகிஸ்தானின் இந்தப் போக்கு, இரு நாடுகளுக்கும் இடையேயான நீண்டகால நட்புறவில் ஒரு நிரந்தர விரிசலை ஏற்படுத்தியுள்ளது.
அமெரிக்க துருப்புக்கள் பாகிஸ்தானில் தங்கி ‘பயங்கரவாத எதிர்ப்பு பயிற்சிகளில்’ ஈடுபடுவதாக கூறப்படுவது ஒரு திசைதிருப்பும் முயற்சியாகவே பார்க்கப்படுகிறது. உண்மையில், ஈரானுக்குள் இன ரீதியான பிரிவினையை தூண்டிவிட பலுச் மற்றும் குர்து இனக்குழுக்களை பயன்படுத்துவதே இதன் முக்கிய நோக்கமாக இருக்கக்கூடும். பாகிஸ்தான் தனது நிலப்பரப்பில் அமெரிக்க வீரர்களை அனுமதிப்பதன் மூலம், ஈரானின் சிஸ்தான்-பலுசிஸ்தான் மாகாணத்தில் நிலையற்ற தன்மையை உருவாக்க முனைகிறது. இதற்கு பதிலடியாக, பாகிஸ்தானின் குர்ரம் மற்றும் பாராச்சினார் போன்ற ஷியாக்கள் அதிகம் வாழும் பகுதிகளில் ஈரான் தனது பிடியை இறுக்கக்கூடும், இது பாகிஸ்தானுக்குள்ளேயே ஒரு மத கலவரத்தை அல்லது உள்நாட்டு போரை தூண்டும் அபாயத்தை கொண்டுள்ளது.
இந்தியாவின் நிலைப்பாட்டை பொறுத்தவரை, சாபஹார் துறைமுக திட்டத்தில் இந்தியா தற்போது மிகவும் எச்சரிக்கையுடன் செயல்பட்டு வருகிறது. ஈரானுக்குள் செயல்படும் ஐ.எஸ்.கே.பி மற்றும் சில அமைப்புகள் சாபஹார் போன்ற முக்கியமான பொருளாதார மையங்களை தாக்கக்கூடும் என்ற அச்சம் நிலவுகிறது. பாகிஸ்தான் இத்தகைய பயங்கரவாத குழுக்களை தனது அரசியல் ஆதாயத்திற்காக பயன்படுத்துவதை இந்தியா ஏற்கனவே பலமுறை சர்வதேச மேடைகளில் சுட்டிக்காட்டியுள்ளது. ஈரானில் காசிம் சுலைமானியின் நினைவிடத்தில் நடத்தப்பட்ட தற்கொலை தாக்குதல் போன்ற சம்பவங்கள், பாகிஸ்தானின் மறைமுக ஆதரவின்றி சாத்தியமில்லை என்பதே ஈரானின் பலமான நம்பிக்கையாக இருக்கிறது.
மொத்தத்தில் பாகிஸ்தான் தற்போது ஒரு பயன்படுத்திவிட்டு எறியப்படும் டிஷ்யூ பொருளை போலவே சர்வதேச அரசியலில் கையாளப்படுகிறது. அமெரிக்காவின் தேவைகளுக்காக தன்னை முழுமையாக ஒப்படைத்துவிட்ட பாகிஸ்தான், அதன் விளைவாக அண்டை நாடுகளின் பகையை சம்பாதித்து வருகிறது. ஈரானின் உள்நாட்டு விவகாரங்களில் பாகிஸ்தான் தலையிடுவது தொடர்ந்தால், அதன் எதிரொலி பாகிஸ்தானின் எல்லைகளுக்குள்ளும் பயங்கரமான குண்டுவெடிப்புகளாகவும் வன்முறையாகவும் மாறும் காலம் தொலைவில் இல்லை. 2026-ல் உலக அரசியல் புதிய மாற்றங்களை கண்டுவரும் நிலையில், பாகிஸ்தானின் இந்த ஆபத்தான விளையாட்டு அந்த நாட்டை ஒரு பெரும் தனிமைப்படுத்தலை நோக்கி தள்ளிவிடும் என்பது மட்டும் நிதர்சனம்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
