2026-ம் ஆண்டு தொடக்கத்தில் வங்காளதேசத்தின் அரசியல் களம் மிக முக்கியமான மாற்றங்களை சந்தித்து வருகிறது. ஜூலை மாத புரட்சியின் நாயகனாக கொண்டாடப்பட்ட அபு சயீத் போன்றவர்கள் மக்கள் மனதிலிருந்து மெல்ல மறக்கடிக்கப்பட்டு, தற்போது உஸ்மான் ஹாடி மற்றும் தாரிக் ரஹ்மான் ஆகியோரை சுற்றியே விவாதங்கள் நகர்கின்றன.
முகமது யூனுஸ் தலைமையிலான இடைக்கால அரசு, ஆரம்பத்தில் சர்வதேச அங்கீகாரத்தை பெற்றிருந்தாலும், தற்போது அவரது செல்வாக்கு சரிந்து வருவதை காண முடிகிறது. யூனுஸ் வெறும் புகைப்படங்களுக்குப் போஸ் கொடுக்கும் ஒரு நபராக மாறிவிட்டாரோ என்ற சந்தேகம் எழுந்துள்ள நிலையில், அவர் பிஎன்பி கட்சியுடன் ஒரு ரகசிய ஒப்பந்தம் செய்திருப்பதாக கூறப்படுகிறது. அதன்படி, தாரிக் ரஹ்மான் பிரதமரானால், யூனுஸ் அந்நாட்டின் ஜனாதிபதியாக அமர்த்தப்படுவார் என்ற எதிர்பார்ப்பு நிலவுகிறது.
தாரிக் ரஹ்மானின் மீள்வருகை வங்காளதேச அரசியலில் ஒரு ‘டார்க் பிரின்ஸ்’ உதயத்தை மீண்டும் உறுதிப்படுத்துகிறது. கடந்த காலங்களில் அவர் மீது சுமத்தப்பட்ட ஊழல் குற்றச்சாட்டுகள் மற்றும் அவரது சிண்டிகேட் செயல்பாடுகள் குறித்த செய்திகள் தற்போது அந்நாட்டு ஊடகங்களிலிருந்து திட்டமிட்டு நீக்கப்பட்டு வருகின்றன. தாரிக் ரஹ்மானின் பிம்பத்தை ஒரு புனிதராக காட்டும் முயற்சியில் உள்ளூர் ஊடகங்கள் தீவிரமாக ஈடுபட்டுள்ளன.
காலிதா ஜியாவின் மறைவு மற்றும் அவருக்கு கிடைத்துள்ள இறுதி மரியாதை ஆகியவை ஷேக் ஹசீனாவின் வெளியேற்றத்துடன் ஒப்பிட்டு பேசப்படுகின்றன. ஹசீனா நாட்டை விட்டு ஓடியவர் என்றும், காலிதா ஜியா வீட்டு சிறையிலும் மரண தறுவாயிலும் நாட்டை விட்டு பிரியாதவர் என்றும் சித்தரிக்கப்படுவது பிஎன்பிக்கு பெரும் சாதகமாக மாறியுள்ளது.
வங்காளதேசத்தின் தற்போதைய சூழல் ஒரு தீவிரவாத இஸ்லாமிய சாயலை நோக்கி திரும்புவதை அங்குள்ள வன்முறை சம்பவங்கள் உணர்த்துகின்றன. குறிப்பாக, டிசம்பர் 18 மற்றும் 19 ஆகிய தேதிகளில் அரங்கேறிய வன்முறைகள் தற்செயலானவை அல்ல; அவை சிறுபான்மையினருக்கும், சுதந்திர ஊடகங்களுக்கும், முற்போக்கு சிந்தனையாளர்களுக்கும் விடுக்கப்பட்ட ஒரு திட்டமிட்ட எச்சரிக்கையாகவே பார்க்கப்படுகிறது.
கலாச்சார மையங்கள் மற்றும் தாராளவாத பத்திரிகை அலுவலகங்கள் தீக்கிரையாக்கப்பட்டது ஒரு குறிப்பிட்ட சித்தாந்தத்தின் மேலாதிக்கத்தை நிலைநிறுத்தும் முயற்சியாகும். இது வெறும் சட்ட ஒழுங்குப் பிரச்சினை மட்டுமல்ல, வங்காளதேசத்தின் எதிர்கால சமூகக் கட்டமைப்பை மாற்றியமைக்கும் ஒரு ‘ரோட் மேப்’ போன்றது.
ஜமாத்-இ-இஸ்லாமி கட்சியின் வளர்ச்சி மற்றும் அதன் அரசியல் நகர்வுகள் வியக்கத்தக்க வகையில் உள்ளன. ஒரு காலத்தில் ஒதுக்கி வைக்கப்பட்ட இந்த கட்சி, தற்போது ஆட்சி அதிகாரத்தை தீர்மானிக்கும் சக்தியாக உருவெடுத்துள்ளது. ஜமாத் தலைவர்கள் தற்போது ஜனநாயகம் மற்றும் கிலாபத் ஆகிய இரண்டுக்கும் இடையிலான வேறுபாடுகளை களைந்து, இஸ்லாமிய சட்டங்களைக் கொண்டு நாட்டை ஆள தயாராகி வருகின்றனர். அவர்கள் தங்களை சிறுபான்மையினருக்கு பாதுகாப்பானவர்களாக காட்டிக் கொள்ளும் அதே வேளையில், அடிமட்டத்தில் அவர்களின் செயல்பாடுகள் மாறுபட்டே இருக்கின்றன. ஒரு இந்து வேட்பாளரை ஜமாத் முன்னிறுத்துவது போன்ற நாடகங்கள் சர்வதேச சமூகத்தை ஏமாற்றும் ஒரு உத்தியாகவே அரசியல் விமர்சகர்களால் கருதப்படுகிறது.
இந்தியாவிற்கும் வங்காளதேசத்திற்கும் இடையிலான உறவு தற்போது ஒரு சிக்கலான நிலையில் உள்ளது. இந்தியா தனது வெளியுறவுத்துறை அமைச்சரை அனுப்பி தனது நட்பை வெளிப்படுத்தினாலும், வங்காளதேசத்தின் புதிய அதிகார வர்க்கம் பாகிஸ்தானுடன் நெருக்கம் காட்டி வருகிறது. இருப்பினும், பாகிஸ்தான் வங்காளதேசிகளை ஒருவித இனவெறுப்புடன் அல்லது கீழ்த்தரமாக பார்க்கும் மனநிலை இன்னும் மாறவில்லை. வங்காளதேசத்தின் உயர்மட்ட பொருளாதார பகுதியான குல்ஷன் போன்ற இடங்கள் மேற்கத்திய கலாச்சாரத்தை பிரதிபலித்தாலும், நாட்டின் பிற பகுதிகள் மெல்ல மெல்ல தீவிரவாத கொள்கைகளுக்குள் இழுக்கப்படுகின்றன. ராணுவத்திலும் ஜமாத் ஆதரவு அதிகாரிகள் ஊடுருவி வருவதால், வங்காளதேச ராணுவத்தின் எதிர்கால நிலைப்பாடும் கேள்விக்குறியாகியுள்ளது.
நிர்வாக ரீதியாகவும், சமூக ரீதியாகவும் வங்காளதேசம் ஒரு மிகப்பெரிய பிளவை நோக்கி நகர்கிறது. பிப்ரவரி 12-ம் தேதி நடைபெறவுள்ள தேர்தல்கள் ஒரு மாற்றத்தைக்கொண்டுவரும் என்று எதிர்பார்க்கப்பட்டாலும், ஒரு மிகப்பெரிய அரசியல் கட்சியின் பங்களிப்பு இல்லாத அந்த தேர்தல் முழுமையான ஜனநாயகமாக இருக்காது.
நாட்டின் பொருளாதாரம் மற்றும் பாதுகாப்பு கட்டமைப்பு சிதைந்து வரும் நிலையில், வங்காளதேசம் ஒரு ஒன்றுபட்ட நாடாக தன்னை தக்க வைத்துக் கொள்ளுமா அல்லது உள்நாட்டு பூசல்களால் இரண்டாக பிளவுபடுமா என்பது வரும் மாதங்களில் தெரியவரும். யூனுஸ் போன்றவர்கள் தங்களின் தனிப்பட்ட கௌரவத்திற்காக செய்யும் அரசியல் சமரசங்கள், அந்த நாட்டின் சாமானிய மக்களுக்கு பெரும் சுமையாக மாறப்போவது நிச்சயம்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
