பங்களாதேஷில் ஷேக் ஹசீனாவின் நீண்டகால ஆட்சி மாணவர் புரட்சி மூலம் முடிவுக்கு வந்ததை தொடர்ந்து, தற்போது அங்கு நடைபெற்று முடிந்துள்ள நாடாளுமன்ற தேர்தல் அந்த நாட்டின் எதிர்காலத்தை மட்டுமல்லாது இந்தியாவின் பாதுகாப்பையும் தீர்மானிக்கக்கூடிய மிக முக்கியமான நிகழ்வாக பார்க்கப்படுகிறது. சுமார் 12 கோடியே 70 லட்சம் வாக்காளர்களை கொண்ட இந்த தேர்தலில், 44 சதவீதத்திற்கும் அதிகமானோர் இளைஞர்கள் என்பது குறிப்பிடத்தக்கது.
கடந்த 18 ஆண்டுகளாக ஆட்சியில் இருந்த அவாமி லீக் கட்சி தடை செய்யப்பட்டு, அக்கட்சி இல்லாமல் நடத்தப்படும் முதல் தேர்தல் இது என்பதால், இதன் முடிவுகள் அந்த நாட்டின் ஜனநாயக கட்டமைப்பில் பெரும் மாற்றங்களை ஏற்படுத்தும் என எதிர்பார்க்கப்படுகிறது. இடைக்கால அரசின் தலைவராக இருந்த முகமது யூனுஸ், அவசர அவசரமாக அமெரிக்காவுடன் மேற்கொண்ட வர்த்தக ஒப்பந்தங்கள் வரப்போகும் புதிய அரசுக்கு மிகப்பெரிய பொருளாதார சவாலாக அமையும் என்பதில் ஐயமில்லை.
இந்த தேர்தல் முடிவுகள் இந்தியாவின் எல்லைப்புற மாநிலங்களான மேற்கு வங்காளம் மற்றும் அசாம் ஆகியவற்றின் உள்நாட்டு பாதுகாப்பில் நேரடி தாக்கத்தை ஏற்படுத்தும். பங்களாதேஷில் இந்தியாவுக்கு சாதகம் இல்லாத அல்லது அடிப்படைவாதக் கொள்கை கொண்ட ஒரு அரசு அமைந்தால், அது எல்லை தாண்டிய ஊடுருவலை அதிகரிக்க செய்யும். ஏற்கனவே மேற்கு வங்காளம் மற்றும் அசாமின் சில பகுதிகளில் நிலவும் ஜனத்தொகை மாற்றங்கள் குறித்த சர்ச்சைகள் உச்ச நீதிமன்றம் வரை சென்றுள்ள நிலையில், பங்களாதேஷின் புதிய அரசியல் சூழல் இந்த பிரச்சனையை மேலும் தீவிரப்படுத்தக்கூடும். குறிப்பாக, சிலிகுரி பகுதியை துண்டித்து வடகிழக்கு மாநிலங்களை பங்களாதேஷுடன் இணைக்க வேண்டும் என்பது போன்ற சில தீவிரவாத போக்குள்ள கருத்துக்கள் அங்குள்ள புதிய கட்சிகளால் முன்வைக்கப்படுவது இந்தியாவிற்கு விடுக்கப்பட்ட எச்சரிக்கையாகவே பாதுகாப்பு நிபுணர்களால் கருதப்படுகிறது.
இந்தியாவைப் பொறுத்தவரை பிஎன்பி மற்றும் ஜமாத்தே இஸ்லாமி ஆகிய இரண்டுமே தங்களது கொள்கை அளவில் இந்தியாவுக்கு எதிரான நிலைப்பாட்டை கொண்டவைதான். “குறைவான தீமை” என்ற அடிப்படையில் பார்த்தால், பிஎன்பி கட்சி ஜமாத்தே இஸ்லாமியை விட சற்றே மேலானதாக கருதப்படுகிறது. ஜமாத்தே இஸ்லாமி போன்ற அடிப்படைவாத அமைப்புகள் லஷ்கர்-இ-தைபா போன்ற பயங்கரவாத அமைப்புகளுடன் தொடர்பு வைத்திருப்பதாக கூறப்படும் புகார்கள், இந்திய எல்லை பகுதிகளில் வன்முறையை தூண்டக்கூடும் என்ற அச்சத்தை ஏற்படுத்துகிறது. பங்களாதேஷில் உள்ள 64 மாவட்டங்களிலும், குறிப்பாக இந்திய எல்லையை ஒட்டியுள்ள பகுதிகளில் சிறுபான்மை இந்து சமூகத்தினர் மீது நடத்தப்படும் தாக்குதல்கள் இந்தியாவின் உள்நாட்டுப் பாதுகாப்பிற்குப் பெரும் அச்சுறுத்தலாக திகழ்கின்றன.
பங்களாதேஷின் பொருளாதார நிலை தற்போது இக்கட்டான சூழலில் உள்ளது. அமெரிக்காவுடன் 0% Tariff அடிப்படையில் போடப்பட்டுள்ள வர்த்தக ஒப்பந்தம், அந்த நாட்டை அமெரிக்காவின் பிடிக்குள் கொண்டு சென்றுள்ளது போன்ற தோற்றத்தை ஏற்படுத்துகிறது. முகமது யூனுஸ் தனது பதவியை தக்கவைத்து கொள்வதற்காக இத்தகைய ஒப்பந்தங்களில் கையெழுத்திட்டுள்ளதாக விமர்சனங்கள் எழுகின்றன. மக்களால் தேர்ந்தெடுக்கப்பட்ட ஒரு நிரந்தர அரசு அமையாத சூழலில், இடைக்கால அரசு எடுத்த இத்தகைய முக்கிய முடிவுகளை புதியதாக அமையப்போகும் பிஎன்பி எப்படி ஏற்றுக்கொள்ள போகிறது என்பது பெரிய கேள்விக்குறியாகும். இது அந்த நாட்டில் எதிர்காலத்தில் பொருளாதார ரீதியான உள்நாட்டு போராட்டங்களுக்கு வழிவகுக்கலாம்.
முடிவாக, பங்களாதேஷின் இந்த தேர்தல் முடிவுகள் தெற்காசியாவின் புவிசார் அரசியலில் ஒரு திருப்புமுனையாக அமையும். பாகிஸ்தான் போன்ற நாடுகள் பங்களாதேஷின் புதிய அரசியல் சூழலை பயன்படுத்தி இந்தியாவிற்கு எதிராக தீவிரவாத் தாக்குதல்களைத் துரிதப்படுத்த முயலக்கூடும். குறிப்பாக, மேற்கு வங்காளத்தின் முர்ஷிதாபாத் போன்ற பகுதிகளில் இன்னும் பார்டர் பென்சிங் முழுமையாக முடிக்கப்படாதது ஊடுருவல்காரர்களுக்கு சாதகமாக அமையலாம். எனவே, பங்களாதேஷில் அமையப்போகும் புதிய அரசுடன் இந்தியா மிகவும் எச்சரிக்கையுடனும், ராஜதந்திர ரீதியாகவும் உறவு கொள்ள வேண்டியது அவசியம். இல்லையெனில், அதன் தாக்கம் மேற்கு வங்காளம், அசாம் தாண்டி பீகார், உத்தரப்பிரதேசம் வரை கூட எதிரொலிக்கக்கூடும் என்பதே நிதர்சனம்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
