வங்காளதேசத்தில் கடந்த சில நாட்களாக நிலவி வரும் சூழல் அராஜகத்தின் உச்சத்தை தொட்டுள்ளது. குறிப்பாக, அந்த நாட்டில் சிறுபான்மையினராக வாழும் இந்துக்கள் குறிவைத்து தாக்கப்படுவதும், அவர்களின் வீடுகள் மற்றும் வணிக நிறுவனங்கள் எரிக்கப்படுவதும் சர்வதேச அளவில் பெரும் கவலையை ஏற்படுத்தியுள்ளது. சமீபத்தில் இந்து கடை உரிமையாளர் ஒருவர் வீதியில் வைத்து கொடூரமான முறையில் தாக்கப்பட்டு கொல்லப்பட்ட சம்பவம், அங்குள்ள சட்ட ஒழுங்கு எந்த அளவிற்கு சீர்குலைந்துள்ளது என்பதற்கு சான்றாகும். இத்தகைய வன்முறைகள் தற்செயலானவை அல்ல, மாறாக ஒரு திட்டமிட்ட வகுப்புவாத மோதலின் வெளிப்பாடாகவே பார்க்கப்படுகிறது.
இந்திய தூதரகங்கள் மற்றும் அதன் கிளை அலுவலகங்களுக்கு எதிராக முன்னெடுக்கப்படும் போராட்டங்கள் வியன்னா உடன்படிக்கைக்கு எதிரானது. டாக்கா, ராஜஷாகி, குல்னா மற்றும் சிட்டகாங் ஆகிய இடங்களில் உள்ள இந்திய தூதரக அதிகாரிகளுக்கு பாதுகாப்பு அச்சுறுத்தல்கள் விடுக்கப்பட்டு வருகின்றன. உஸ்மான் ஹாதி என்பவரின் மரணத்தை முன்வைத்து, அதற்கு பழிவாங்கும் நோக்கில் இந்திய தூதரகங்களை முற்றுகையிட இஸ்லாமிய தீவிரவாத அமைப்புகள் அழைப்பு விடுத்துள்ளன. ஒரு நாட்டின் தூதரகத்திற்கு பாதுகாப்பு வழங்க வேண்டியது அந்த நாட்டு அரசாங்கத்தின் கடமை என்ற போதிலும், அங்குள்ள இடைக்கால அரசு இதை கட்டுப்படுத்த தவறிவிட்டது.
வங்காளதேசத்தின் தற்போதைய இடைக்கால அரசாங்கத்தின் தலைவர் முகமது யூனுஸ், அந்த நாட்டில் தேர்தலை நடத்துவதில் ஆர்வம் காட்டாமல் அதிகாரத்தை தக்கவைக்க முயல்வதாக விமர்சனங்கள் எழுந்துள்ளன. ஒருவேளை அங்கு நியாயமான முறையில் தேர்தல் நடந்தால், தற்போது அதிகாரத்தில் இருக்கும் ஜமாத்-இ-இஸ்லாமி போன்ற தீவிரவாத அமைப்புகள் செல்வாக்கை இழக்கக்கூடும். இதனால், பொதுமக்களின் கவனத்தை திசைதிருப்பவும், இந்தியாவுக்கு எதிராக ஒரு போலி தேசியவாதத்தை உருவாக்கவும் இத்தகைய வன்முறைகள் தூண்டப்படுகின்றன. “இந்தியா எதிர்ப்பு” என்பதே வங்காளதேசத்தின் புதிய அரசியல் நாணயமாக மாற்றப்பட்டு வருகிறது.
ஊடகங்களின் குரல்வளையை நெரிக்கும் செயல்களும் அங்கு அரங்கேறி வருகின்றன. ‘ப்ரோதம் ஆலோ’ மற்றும் ‘டெய்லி ஸ்டார்’ போன்ற நடுநிலையான ஊடக நிறுவனங்களின் அலுவலகங்கள் தாக்கப்பட்டு எரிக்கப்பட்டுள்ளன. உண்மையை உரக்க சொல்லும் ஊடகங்களை ஒடுக்குவதன் மூலம், ஒரு மௌனத்தை ஏற்படுத்த தீவிரவாதிகள் முயல்கின்றனர். உலக நாடுகளுக்கு அங்கு நடக்கும் உண்மை நிலை தெரியக்கூடாது என்பதில் அவர்கள் உறுதியாக உள்ளனர். பாகிஸ்தான் ராணுவத்தின் நிழலில் வளரும் இத்தகைய அமைப்புகள், வங்காளதேசத்தை மீண்டும் ஒரு இருண்ட காலத்திற்கு இட்டு செல்கின்றன.
இந்தியா இந்த விவகாரத்தில் மிகவும் நிதானமாக செயல்பட்டு வருகிறது. வங்காளதேசத்தின் உள்நாட்டு பிரச்சனையில் இந்தியாவை இழுப்பதன் மூலம் ஒரு விக்டிம் கார்டை விளையாட அவர்கள் திட்டமிட்டுள்ளனர். “இந்தியா எங்களின் உள்விவகாரங்களில் தலையிடுகிறது” என்று குற்றம் சாட்டவே அவர்கள் காத்திருக்கிறார்கள். ஆனால், இந்தியா தனது எல்லைகளை பாதுகாப்பதிலும், தனது நாட்டு குடிமக்களின் பாதுகாப்பை உறுதி செய்வதிலும் மட்டும் கவனம் செலுத்தி வருகிறது. இருப்பினும், தூதரகங்கள் மீதான தாக்குதல்கள் தொடர்ந்தால் இந்தியா தனது வெளியுறவு கொள்கையில் ஒரு பெரிய மாற்றத்தை செய்ய வேண்டிய கட்டாயத்திற்கு தள்ளப்படும்.
இறுதியாக, வங்காளதேசத்தில் நிலவும் இந்த நிலையற்ற தன்மை தெற்காசியாவின் பாதுகாப்பிற்கே ஒரு பெரிய அச்சுறுத்தலாகும். இந்தியாவை நோக்கி ஊடுருவும் சட்டவிரோத குடியேறிகள் மற்றும் தீவிரவாத குழுக்களை தடுப்பதில் இந்திய பாதுகாப்பு படைகள் கூடுதல் எச்சரிக்கையுடன் செயல்பட வேண்டும். அண்டை நாட்டில் அமைதி திரும்புவது இந்தியாவின் வளர்ச்சிக்கும் முக்கியமானது. ஆனால், தூதரகங்கள் மற்றும் சிறுபான்மையினர் மீதான தாக்குதல்களை ஒருபோதும் ஏற்றுக்கொள்ள முடியாது.
வங்காளதேச இடைக்கால அரசு விரைவாக செயல்பட்டு வன்முறையாளர்களை ஒடுக்காவிட்டால், அந்த நாடு மீள முடியாத அழிவை சந்திக்கும் அபாயம் உள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
