முன்னாள் தமிழக பாஜக தலைவர் கே. அண்ணாமலை மீது பிரதமர் நரேந்திர மோடிக்கு தனிப்பட்ட அன்பு இருப்பதாகவும், அவரை ‘பிள்ளை’ போல மதித்து, அவர் போன்ற இளம் தலைவர்கள்தான் இந்தியாவுக்கு தேவை என்று பாராட்டியதாகவும் மூத்த பத்திரிகையாளர் பிரகாஷ் எம் சாமி சமீபத்தில் ஒரு நேர்காணலில் தெரிவித்தார். எனினும், அண்ணாமலைக்கு முக்கிய பதவி கொடுக்கப்படுவதை தடுக்கும் டெல்லியின் இரண்டாம் கட்ட தலைவர்களின் அரசியல் சூழ்ச்சிகளாலேயே அவர் இன்னும் தேசிய அளவில் கௌரவிக்கப்படவில்லை என்றும் அவர் குற்றம் சாட்டினார்.
கோவாவில் நடைபெற்ற ‘அயன் மேன்’ போட்டியில் அண்ணாமலை வெற்றி பெற்றதை குறித்து பிரதமர் மோடி வாழ்த்து தெரிவித்தார். அண்ணாமலைக்கு மோடியின் மீது மிகுந்த் அபிமானமும், மோடிக்கு அண்ணாமலை மீது ‘தந்தை மகனுக்கான’ உறவும் உள்ளது. மோடி எப்போதுமே அண்ணாமலைக்கு தேசிய அரசியலில் ஒரு பெரிய இடத்தை கொடுக்க விரும்புகிறார்.
ஆனால் மோடியின் விருப்பத்திற்கு எதிராக, டெல்லியில் உள்ள இரண்டாம் கட்ட தலைவர்கள் குறிப்பாக அமித் ஷா மற்றும் அவரது ஆதரவாளர்கள் முட்டுக்கட்டை போடுகின்றனர் என்று கூறப்படுகிறது. அண்ணாமலையின் திறமையும், சாதுரியமும் டெல்லியில் உட்கார்ந்தால், தங்களுக்கு அது அச்சுறுத்தலாக மாறும் என்று அவர்கள் அஞ்சுவதே இதற்கு காரணம்.
அண்ணாமலையை மத்திய உள்துறை இணையமைச்சர் போன்ற பதவிக்கு அழைத்தால் அவர் நிச்சயம் மறுக்க மாட்டார். ஆனால், அவர் எம்பி ஆவதையும் மத்திய அமைச்சராக போவதையும் டெல்லியின் சில தலைவர்கள் தடுப்பதாக கூறப்படுகிறது. மோடியும் உலக தலைவராக சர்வதேச அரசியலில் கவனம் செலுத்துவதால், கட்சி செயல்பாடுகளை அமித்ஷாவிடம் விட்டுவிட்டார். அமித்ஷா, நட்டா போன்ற ‘பொம்மை’ தலைவர்களை வைத்துக்கொண்டு, எல்லாவற்றையும் தன் கட்டுப்பாட்டில் வைத்திருக்கிறார்.
அண்ணாமலை தமிழக பாஜக தலைவராக இருந்தபோது, அமைப்புச் செயலாளர் கேசவ விநாயகம் மீது பல்வேறு குற்றச்சாட்டுகள் வந்ததாகவும், அண்ணாமலை ஆதாரங்களுடன் டெல்லிக்கு புகார் அளித்தும் நடவடிக்கை எடுக்கப்படவில்லை என்றும் கூறப்படுகிறது. அண்ணாமலை கட்சியில் தூய்மையை கொண்டு வர விரும்பினார்.
அண்ணாமலை தனி கட்சி ஆரம்பிப்பார் என்ற யூகங்கள் வலுத்தாலும், அவர் மோடியை எதிர்த்து அரசியல் செய்ய விரும்பவில்லை. ஆர்.எஸ்.எஸ்.கூட, தமிழகத்தில் அண்ணாமலையை ஏன் பயன்படுத்தவில்லை என்று பாஜக தலைமைக்கு அழுத்தம் கொடுத்து வருவதாக தெரிகிறது.
அண்ணாமலை விலகிய பின், புதிய தலைவரான நயினார் நாகேந்திரனை குறை சொல்ல முடியாது என்றாலும், கட்சியின் மாவட்ட பொறுப்புகள் பல தவறான நபர்களுக்கும், கிரிமினல் பின்னணி கொண்டவர்களுக்கும் வழங்கப்படுவதாகவும், கட்சியில் பணம் பண்ணுவதே நோக்கமாக உள்ளது என்றும் குற்றச்சாட்டுகள் எழுகின்றன. இதனால், உண்மையான பாஜக தொண்டர்கள் மன வருத்தத்தில் உள்ளனர்.
அண்ணாமலை தற்போது “காத்திருக்கும் நேரத்தில்” இருக்கிறார். ஆர்.எஸ்.எஸ். தலையீட்டால், விரைவில் தேசிய பாஜக தலைவர் நியமிக்கப்பட்டால், அண்ணாமலைக்கு தேசிய பொதுச் செயலாளர் அல்லது தென்னிந்தியாவின் ஒருங்கிணைப்பாளர் போன்ற ஒரு முக்கியப் பொறுப்பு வழங்கப்படும் என எதிர்பார்க்கப்படுகிறது.
இது மோடியின் விருப்பமாகவும் உள்ளது. அண்ணாமலை மீதான மோடியின் நம்பிக்கை அப்படியே இருக்கிறது என்பதைத்தான் அவரது சமீபத்திய பாராட்டு காட்டுகிறது. ஆனால் அண்ணாமலை தமிழக அரசியலில் இருந்து ஒதுக்கினால் பாஜக மீண்டும் நோட்டாவுடன் தான் போட்டி போட வேண்டியிருக்கும் என்றும், அண்ணாமலை இல்லாத தமிழக பாஜக ஜீரோ என்றும் அரசியல் விமர்சகர்கள் கருத்து தெரிவித்து வருகின்றனர்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
