2026 ஆம் ஆண்டு நடைபெறவுள்ள தமிழக சட்டமன்ற தேர்தல், வழக்கமான இருமுனை போட்டியை தாண்டி ஒரு புதிய பரிமாணத்தை எட்டியுள்ளது. குறிப்பாக, தேசிய கட்சிகளான பாஜக மற்றும் காங்கிரஸ் ஆகியவற்றின் பலம் அதிகரிப்பது, திராவிட கட்சிகளான திமுக மற்றும் அதிமுகவிற்கு மறைமுகமான லாப நஷ்ட கணக்குகளை உருவாக்கியுள்ளது. தற்போதைய அரசியல் சூழலில், பாஜக அதிக இடங்களில் அதிமுகவில் வாங்கி போட்டியிடுது திமுகவுக்கு லாபம். அந்த தொகுதிகளில் திமுக எளிதில் வெற்றி பெற்றுவிடும்.
மறுபுறம், காங்கிரஸ் கட்சி திமுகவிடம் அதிக தொகுதிகள் வாங்கி போட்டியிடுவது அதிமுகவிற்கு சாதகமாக அமைய வாய்ப்புள்ளது. காங்கிரஸிற்கு ஒதுக்கப்படும் இடங்கள் பெரும்பாலும் திமுகவின் நேரடி பலத்தைக் குறைக்கும் காரணியாக மாறக்கூடும் என்பது அரசியல் கணக்கு. இதனால், இந்த முறை திமுக மற்றும் அதிமுக ஆகிய இரு கட்சிகளுமே தங்களது கூட்டணி கட்சிகளுக்கு அதிக இடங்களை ஒதுக்காமல், தாங்களே அதிக தொகுதிகளில் நேரடி போட்டியில் இறங்குவதே புத்திசாலித்தனம் என்ற விவாதம் மேலெழுந்துள்ளது. கூட்டணி கட்சிகளின் தயவில் வெற்றி பெறுவதை விட, சுய பலத்தில் களம் காண்பதே தங்களின் இருப்பை தக்கவைக்க உதவும் என இரு தரப்பும் கருதுகின்றன.
இதற்கிடையில், நடிகர் விஜய்யின் ‘தமிழக வெற்றிக் கழகம்’ ஏற்படுத்தியுள்ள தாக்கம் திராவிட கட்சிகளின் தூக்கத்தை கெடுத்துள்ளது. வழக்கமாக திமுக மற்றும் அதிமுகவின் கூட்டணி கட்சிகளுக்குச் செல்லும் வாக்குகள், குறிப்பாக இளைஞர்கள் மற்றும் நடுநிலை வாக்காளர்களின் ஆதரவு, இந்த முறை ஒட்டுமொத்தமாக விஜய் பக்கம் ‘ஸ்வீப்’ ஆகிவிட்டதாக புள்ளிவிவரங்கள் தெரிவிக்கின்றன. சிறு கட்சிகள் மற்றும் ஜாதி ரீதியான கட்சிகளின் வாக்கு வங்கியை விஜய் எளிதாக கவர்ந்துள்ளதால், கூட்டணி கட்சிகளால் இனி பெரிய வெற்றிகளை ஈட்ட முடியாது என்ற எதார்த்தத்தை திராவிட கட்சிகள் உணர தொடங்கியுள்ளன.
கூட்டணி கட்சிகளுக்கு ஒதுக்கப்படும் தொகுதிகளில் அந்தந்த கட்சிகளின் வேட்பாளர்கள் ஜெயிக்க முடியாமல் போனால், அது ஒட்டுமொத்த கூட்டணியின் தோல்விக்கு வழிவகுக்கும். கடந்த காலங்களில் கூட்டணி கட்சிகள் பெற்று தந்த வாக்குகளை விட, தற்போது விஜய் பிரிக்கும் வாக்குகள் மிக அதிகம். இதனால், கூட்டணி கட்சிகளை சார்ந்து நிற்பதை விட, திமுகவும் அதிமுகவும் நேரடியாக மோதிக்கொள்வதே வாக்குகளைத் தக்கவைக்கச் சிறந்த வழி. விஜய் என்ற புதிய சக்தியை எதிர்கொள்ள வேண்டுமானால், பாரம்பரிய வாக்கு வங்கிகளை முழுமையாகத் திரட்ட வேண்டிய கட்டாயம் திராவிடக் கட்சிகளுக்கு ஏற்பட்டுள்ளது.
இந்த அதிரடி மாற்றங்களை உணர்ந்து திராவிட கட்சிகள் சுதாரிக்குமா என்பதே தற்போதைய கேள்வி. திமுக தனது அமைச்சர்களின் செயல்பாடுகள் மற்றும் அரசு நலத்திட்டங்களை நம்பி களம் இறங்குகிறது. அதே சமயம், அதிமுக தனது இழந்த செல்வாக்கை மீட்க போராடுகிறது. ஆனால், இருவருமே விஜய்யின் வருகையால் ஏற்படப்போகும் வாக்கு சிதறலை எப்படி கையாளப் போகிறார்கள் என்பதில் இன்னும் தெளிவான முடிவுக்கு வரவில்லை. கூட்டணி கட்சிகளை திருப்திப்படுத்துவதா அல்லது சொந்த கட்சியைப் பலப்படுத்துவதா என்ற தர்மசங்கடத்தில் இரு கட்சிகளுமே சிக்கியுள்ளன.
இறுதியாக, 2026 தேர்தல் என்பது வெறும் ஆட்சி மாற்றத்திற்கான தேர்தல் மட்டுமல்ல, அது திராவிட அரசியலின் எதிர்காலத்தை தீர்மானிக்கும் ஒரு யுத்தமாக இருக்கும். விஜய் ஸ்வீப் செய்துள்ள அந்த முக்கியமான ‘இளம் வாக்காளர்’ பகுதியை மீண்டும் தங்கள் பக்கம் இழுக்க தவறினால், திராவிட கட்சிகள் பெரும் பின்னடைவை சந்திக்க நேரிடும். தேசிய கட்சிகளின் மறைமுக லாப கணக்குகள் ஒருபுறம் இருந்தாலும், அடிமட்ட தொண்டர்களின் பலமும், நேரடி போட்டியும் மட்டுமே திமுக அல்லது அதிமுகவை ஆட்சி கட்டிலில் அமர்த்தும். திராவிட கட்சிகள் காலத்திற்கு ஏற்ப தங்களை மாற்றிக்கொள்ளுமா என்பதை பொறுத்திருந்தே பார்க்க வேண்டும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
