தமிழக அரசியல் களத்தில் நீண்ட கால எதிர்பார்ப்புகளை ஏற்படுத்தி, சமீபத்தில் தமிழக வெற்றிக் கழகம் என்ற பெயரில் கட்சியை தொடங்கிய நடிகர் விஜய், தனது அரசியல் நிலைப்பாடு குறித்து உறுதியான முடிவை எடுத்துள்ளார். களத்திற்கே வராமல் தயக்கம் காட்டிய ரஜினிகாந்த் போலவோ அல்லது முதல் தேர்தலிலேயே படுதோல்வியை சந்தித்த கமல்ஹாசன் போலவோ அல்லாமல், தான் தனித்து நின்று வெற்றியை கொடுப்பேன் என்று தனக்கு நெருக்கமானவர்களிடம் கூறியதாக தகவல் கசிந்துள்ளது,
தமிழகத்தின் இருபெரும் சினிமா ஆளுமைகளான ரஜினிகாந்த் மற்றும் கமல்ஹாசன் ஆகியோர் அரசியலில் எதிர்கொண்ட சவால்களை சுட்டிக்காட்டி, விஜய்யின் அரசியல் வியூகம் முற்றிலும் மாறுபட்டதாக இருக்கும் என்று அவரது கட்சி வட்டாரங்கள் தெரிவிக்கின்றன.
ரஜினிகாந்த் அரசியலுக்கு வருவதாக அறிவித்தும், இறுதி கட்டத்தில் உடல்நலன் மற்றும் காலச்சூழலை காரணம் காட்டி, களத்திற்கே வராமல் பின்வாங்கிய முடிவை விஜய் விரும்பவில்லை. மக்கள் மத்தியில் ஒரு நம்பிக்கையை ஏற்படுத்திவிட்டு, கடைசி நேரத்தில் விலகுவது மக்கள் பணியாகாது என்று அவர் கருதுகிறார்.
கமல்ஹாசன் மக்கள் நீதி மய்யம் கட்சியைத் தொடங்கி, சட்டமன்ற தேர்தலை சந்தித்து, குறிப்பிடத்தக்க வெற்றியை பெறாமல் படுதோல்வி அடைந்தார். தேர்தல் களத்தில் இறங்கிய பிறகு, கூட்டணி அமைத்து தப்பிக்கும் நிலைக்கு தள்ளப்படுவதை விஜய் முற்றிலும் நிராகரித்துள்ளார்.
இந்த இருவரின் பாதையில் செல்லாமல், “நான் விஜய்; தனியாக நிற்பேன், வெற்றியும் தருவேன்!” என்ற உறுதியான மனநிலையில் தமிழக வெற்றி கழகத்தை விஜய் வழிநடத்த உள்ளார்.
விஜய் தனது அரசியல் பிரவேசம் குறித்து மிகவும் உறுதியான முடிவை எடுத்துள்ளதாக கூறப்படுகிறது. அவரது அரசியல் முடிவு ‘வெற்றி அல்லது தோல்வி’ என்ற இரண்டு பிரதான புள்ளிகளை சுற்றியே அமைக்கப்பட்டுள்ளது. தேர்தலில் போட்டியிட்டு மக்கள் ஆதரவுடன் வெற்றி பெற்றால், முழு நேர அரசியலில் ஈடுபட்டு மக்கள் பணியாற்றுவது, அதாவது ஆட்சியில் அமர்வது உறுதி. மக்களிடம் எதிர்பார்த்த வரவேற்பு கிடைக்காமல், தோல்வி ஏற்பட்டால், உடனடியாக அரசியலில் இருந்து விலகி மீண்டும் திரைப்பட துறைக்கு சென்றுவிடுவது.
இந்த முடிவானது, தன்னுடைய முழு கவனத்தையும் சக்தியையும் அரசியல் களத்தில் மட்டுமே முதலீடு செய்யும் அவரது உறுதியை காட்டுகிறது. வெற்றிபெறாத நிலையில், அரசியல் களத்தில் தொடர்ந்து தடுமாறாமல், மக்கள் தீர்ப்பை ஏற்றுக்கொண்டு விலகி செல்லும் கொள்கையுடன் விஜய் இருப்பதாகவும் தகவல்கள் தெரிவிக்கின்றன.
விஜய் தொடர்ந்து தனது கட்சியை தனித்தே வழிநடத்தி செல்வார் என்பதில் உறுதியாக இருக்கிறார். மற்ற அரசியல் கட்சிகளின் கூட்டணியில் இணைந்து, தங்கள் கட்சியின் தனித்துவத்தையும் கொள்கைகளையும் அடகு வைக்க அவர் தயாராக இல்லை.
அரசியலில் நிரந்தரமாக நீடிக்க விரும்பும் பலர் கூட்டணி அமைத்து தங்கள் இருப்பை தக்க வைத்து கொள்ளும் நிலையில், “ஒன்று வெற்றி; இல்லையென்றால் விலகல்” என்ற விஜய்யின் இந்தத் தீவிரமான அணுகுமுறை, தமிழக அரசியலில் ஒரு புதிய மற்றும் சவால் நிறைந்த பாதையாக பார்க்கப்படுகிறது. வரும் தேர்தலில் விஜய்யின் இந்த சபதம் பலிக்குமா என்பதை அறிய தமிழகமே காத்திருக்கிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
