மதுரையில் நடைபெறவிருக்கும் விஜய்யின் தமிழக வெற்றி கழக மாநாடு, தமிழக அரசியலில் ஒரு முக்கிய திருப்புமுனையாக பார்க்கப்படுகிறது. இந்த மாநாட்டிற்கு நேரடியாகவும் மறைமுகமாகவும் பல தடைகள் வரக்கூடும் என்ற எதிர்பார்ப்பு நிலவினாலும், அவற்றை எல்லாம் தாண்டி இந்த மாநாட்டை விஜய் வெற்றிகரமாக நடத்திக் காட்டுவார் என்று அரசியல் வட்டாரங்களில் பரபரப்பாக பேசப்படுகிறது. மாலை 4 மணிக்கு மாநாடு தொடங்கவிருந்தாலும், தொண்டர்கள் காலை முதலே குவிய தொடங்குவார்கள் என்பது உறுதி.
ஸ்டாலினா? விஜயா?
2026 சட்டமன்றத் தேர்தலை பொருத்தவரை, அது நான்கு முனை போட்டியாக இருந்தாலும், ஐந்து முனை போட்டியாக இருந்தாலும், உண்மையான போட்டி தி.மு.க-விற்கும், தமிழக வெற்றிக் கழகத்திற்கும் தான் என்று அரசியல் ஆய்வாளர்கள் கருத்து தெரிவிக்கின்றனர். மக்கள் மத்தியில் எழுந்துள்ள ஒரே கேள்வி “ஸ்டாலினா? விஜய்யா?” என்பதுதான். இது குறித்து அரசியல் ஆய்வாளர் சி.கே. மதிவாணன் என்பவர் தெரிவித்த கருத்துக்கள் தற்போது பெரும் விவாதத்திற்கு உள்ளாகியுள்ளன.
உதயநிதி – விஜய் போட்டி:
மதிவாணன் கூறுகையில், “2021-ல் உதயநிதி ஸ்டாலின் சட்டமன்ற உறுப்பினரானார். 2022-ல் அமைச்சரானார். 2024-ல் துணை முதல்வரானார். இதன் மூலம் 2026 தேர்தலில் உதயநிதி தான் தி.மு.க-வின் அடுத்த முதல்வர் வேட்பாளராக அறிவிக்கப்படுவார் என்று எதிர்பார்க்கப்பட்டது. ஆனால், திடீரென விஜய் கட்சி ஆரம்பித்து மக்கள் மத்தியில் மிகப்பெரிய செல்வாக்கைப் பெற்றதால், முதல்வர் ஸ்டாலின் சுதாரித்துக் கொண்டார். விஜய்யா, உதயநிதியா என்று இந்த தேர்தலை சந்தித்தால், உதயநிதியை விஜய் ஓரங்கட்டிவிடுவார் என்று ஸ்டாலின் உணர்ந்தார். அதனால்தான், 2026 தேர்தலில் மீண்டும் அவரே முதல்வர் வேட்பாளராக பிரகடனம் செய்ய போகிறார்” என்று அவர் தெரிவித்துள்ளார். இந்த கருத்து அரசியல் அரங்கில் ஒரு புயலைக் கிளப்பியுள்ளது.
விஜய்க்கு ஏன் இந்த வரவேற்பு?
மற்ற அரசியல் தலைவர்கள் கூட்டம் சேர்க்க பணம் கொடுத்து மக்களை கூட்டுவார்கள். ஆளுங்கட்சியாக இருந்தால் அரசு பேருந்துகள் மூலம் கூட கூட்டத்தை கொண்டு வருவார்கள். ஆனால், விஜய்க்கு வரும் கூட்டம் என்பது ‘தானாக சேர்ந்த கூட்டம்’. சொந்த பணத்தைச் செலவழித்து, மனமுவந்து வரும் தொண்டர்களின் கூட்டம் இது. இப்போதுள்ள எந்த அரசியல்வாதிக்கும் இல்லாத ஒரு ‘கரிஷ்மா’ விஜய்க்கு இருக்கிறது என்றும் மதிவாணன் சுட்டிக்காட்டியுள்ளார். இந்த ‘கரிஷ்மா’ தான், விஜய்யின் அரசியல் பயணத்தில் அவரது பலமாக அமையும் என்று எதிர்பார்க்கப்படுகிறது.
மதுரை மாநாடு, விஜய்யின் அரசியல் பயணத்தில் ஒரு திருப்புமுனையாக அமையுமா என்பதை பொறுத்திருந்துதான் பார்க்க வேண்டும். ஆனாலும், இந்த மாநாடு, 2026 தேர்தலுக்கான அரசியல் களத்தை இப்போதே சூடுபிடிக்க செய்துள்ளது என்பதில் சந்தேகமில்லை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
