நடிகர் விஜய் தலைமையிலான தமிழக வெற்றிக் கழகம் தமிழக அரசியல் களத்தில் தீவிரமாக தடம் பதிக்கும் முனைப்பில் உள்ளது. இந்த நிலையில், அக்கட்சியின் அரசியல் நகர்வுகள் மறைந்த முன்னாள் முதல்வர் எம்.ஜி.ஆரின் அரசியல் அத்தியாயங்களை ஒத்திருக்கிறதா என்ற கேள்விகள் எழுந்துள்ளன.
எம்.ஜி.ஆர். தமிழ்நாட்டில் ஆட்சி அமைப்பதற்கு முன்பே, 1974 ஆம் ஆண்டு புதுச்சேரியில் நடந்த சட்டமன்ற தேர்தலில் அவரது அ.தி.மு.க. கூட்டணி வெற்றிபெற்று ஆட்சியை கைப்பற்றியது. அதை தொடர்ந்து, மூன்று ஆண்டுகளுக்கு பிறகு, 1977 ஆம் ஆண்டு நடைபெற்ற தமிழ்நாடு சட்டமன்ற தேர்தலில் அ.தி.மு.க. தனிப்பெரும்பான்மையுடன் வெற்றி பெற்று தமிழகத்தின் ஆட்சி கட்டிலில் அமர்ந்தது. இந்த ‘புதுச்சேரி வழியே தமிழ்நாட்டு அதிகாரம்’ என்ற வரலாற்று பாதையை தான் நடிகர் விஜய் தற்போது பின்பற்றுகிறாரா என்று அரசியல் நோக்கர்கள் விவாதிக்கின்றனர்.
த.வெ.க. தலைவர் விஜய், வரவிருக்கும் 2026 ஆம் ஆண்டு சட்டமன்ற தேர்தலில் புதுச்சேரியில் தனது கட்சி நிச்சயம் ஆட்சியமைக்கும் என்று நம்பிக்கை தெரிவித்துள்ளார். தமிழ்நாட்டை பொறுத்தவரையில், 2026 சட்டமன்ற தேர்தலில் தவெக ஆட்சி அமைக்கும் அல்லது தொங்கு சட்டசபை ஏற்பட்டால் இன்னொரு தேர்தலை சந்திக்கும். ஒருவேளை தமிழகத்தில் ஆட்சி அமைக்க முடியாமல் எதிர்க்கட்சி வரிசையில் உட்கார்ந்தால், அதை தொடர்ந்து 2031 ஆம் ஆண்டு நடைபெறவுள்ள தேர்தலில் தனது கட்சி வெற்றிபெற்று ஆட்சி அமைக்கும் என்றும் அவர் நம்புகிறார்.
முதலில் புதுச்சேரி, அடுத்து தமிழகம் என்ற இந்த தெளிவான அரசியல் வியூகம், 1970களில் எம்.ஜி.ஆர். கையாண்ட அதே பாணியின் நவீனப் பிரதியாகவே பார்க்கப்படுகிறது. எம்.ஜி.ஆர். தனது கட்சிக்கு ஒரு வலுவான தொடக்கம் கொடுக்க புதுச்சேரியைப் பயன்படுத்தியதை போலவே, விஜய்யும் புதுச்சேரியை த.வெ.க.வின் முதல் அதிகார மையமாக உருவாக்க விரும்புகிறார்.
புதுச்சேரி யூனியன் பிரதேசம் தமிழக அரசியலிலிருந்து முற்றிலும் வேறுபட்டது என்றாலும், புவியியல் ரீதியாகவும், கலாச்சார ரீதியாகவும் அண்டை மாநிலத்துடன் நெருங்கிய பிணைப்பை கொண்டுள்ளது. இந்த சிறிய யூனியன் பிரதேசத்தில் முதல் வெற்றியை பதிவு செய்வது, தமிழ்நாட்டில் த.வெ.க.வின் அரசியல் இருப்பை வலுப்படுத்தவும், கட்சி அமைப்பை கட்டமைக்கவும், தேர்தல் உத்திகளை சோதித்து பார்க்கவும் ஒரு சோதனை சாலையாக அமையும் என்று விஜய் கருதுவதாக தெரிகிறது. இங்கு பெறும் வெற்றி, கட்சியின் மீதான நம்பகத்தன்மையை அதிகரித்து, தமிழ்நாட்டு வாக்காளர்கள் மத்தியில் ஒரு சாதகமான மனநிலையை உருவாக்க உதவும் என்பது த.வெ.க.வின் எதிர்பார்ப்பாக உள்ளது.
எம்.ஜி.ஆர். அரசியலுக்கு வந்தபோது மக்கள் மத்தியில் ஒரு கவர்ச்சியான நடிகராகவும், திராவிட இயக்கத்தின் ஒரு பகுதியாகவும் அறியப்பட்டார். ஆனால், அவர் தி.மு.க.வில் இருந்து பிரிந்து வந்து தனது ‘புதிய கட்சி’க்கு மக்களைத் திரட்ட வேண்டியிருந்தது. அதேபோல, நடிகர் விஜய் தனது திரைப்படப் புகழ் மற்றும் மக்கள் ஆதரவை மூலதனமாக கொண்டு, புதிதாக உருவாக்கப்பட்ட த.வெ.க.வுக்கு ஒரு திடமான அரசியல் அடித்தளத்தை உருவாக்க வேண்டிய சவாலை எதிர்கொள்கிறார். இந்த சவாலை சமாளிக்க, எம்.ஜி.ஆர். பின்பற்றிய அதிகாரத்திற்கான பாதை ஒரு வெற்றிகரமான முன்மாதிரியாக விஜய்க்கு அமைந்துள்ளது.
எனினும், எம்.ஜி.ஆர். காலத்தில் இருந்த அரசியல் சூழலும், இன்றைய டிஜிட்டல் மற்றும் கூட்டணி அரசியலும் முற்றிலும் வேறானவை. இன்று தி.மு.க., அ.தி.மு.க. போன்ற வலுவான கட்சிகளின் ஆதிக்கம், தேசிய கட்சிகளின் அதிகரித்த தலையீடு, மற்றும் கூட்டணி அரசியல் ஆகியவை விஜய்க்கு சவாலாக உள்ளன. ஆனாலும், எம்.ஜி.ஆர். தான் முதல்வராக ஆவதற்கு முன்பு ஒரு சிறிய அண்டை மாநிலத்தின் வெற்றியை ஒரு தொடக்கப் புள்ளியாக அமைத்து கொண்டது போல, விஜய்யும் புதுச்சேரி வெற்றியை தனது அரசியல் பயணத்தின் தொடக்க புள்ளியாகவே பார்க்கிறார். இது த.வெ.க.வுக்கு ஒரு உளவியல் ரீதியான ஊக்கத்தையும், அரசியல் அங்கீகாரத்தையும் வழங்கக்கூடும்.
ஆகவே, 2026-இல் புதுச்சேரியில் ஆட்சியை கைப்பற்றுவதன் மூலம், தமிழ்நாட்டு அரசியல் அதிகாரத்திற்கான தனது பயணத்தை தொடங்க விஜய் திட்டமிட்டுள்ளார். இந்த திட்டம் எம்.ஜி.ஆர். கையாண்ட உத்தியின் நவீன பதிப்பாக இருக்கிறதா என்பதை த.வெ.க.வின் எதிர்கால செயல்பாடுகளும், தேர்தல் வெற்றிகளுமே உறுதிப்படுத்தும்.
புதுச்சேரி வெற்றி, விஜய்யின் அரசியல் கனவுகளுக்கு ஒரு புதிய நம்பிக்கையையும் உத்வேகத்தையும் அளிக்கும் என்பதில் சந்தேகமில்லை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
