தமிழக அரசியலில், புதிய கட்சி தொடங்கியுள்ள விஜய் மற்றும் நாம் தமிழர் கட்சியின் ஒருங்கிணைப்பாளர் சீமான் இடையே ஒரு புதிய போட்டி மனப்பான்மை உருவாகியுள்ளது. சீமான் தொடர்ந்து விஜய்யை விமர்சித்து வரும் நிலையில், விஜய் அதற்கு எந்த எதிர்வினையும் ஆற்றாமல் இருப்பது, பல கேள்விகளை எழுப்பியுள்ளது.
சீமான் பல ஆண்டுகளாக தி.மு.க.வை கடுமையாக விமர்சித்து வந்தார். ஆனால், தி.மு.க. தலைமை அவரை பெரிதாக கண்டுகொள்ளவில்லை. அதன்பின்னர் அதிமுக, காங்கிரஸ், பாஜக என கிட்டத்தட்ட அனைத்து பெரிய கட்சிகளையும் விமர்சனம் செய்தார். எந்தவொரு கட்சியும் அவரது குற்றச்சாட்டுக்களை கண்டுகொண்டதே இல்லை. தற்போது, விஜய்யை அவர் விமர்சனம் செய்கிறார். அவர் விஜய்யை விமர்சிப்பதற்கான ஒரே காரணம், விஜய் தனக்கு ஒரு பெரிய போட்டியாக உருவெடுத்துவிடுவார் என்று அவர் உணர்ந்திருப்பதுதான். விஜய்யின் வருகை, சீமானின் வாக்கு வங்கியை கடுமையாக பாதிக்கும் என அஞ்சுகிறார். ஆனால், விஜய், சீமானை ஒரு போட்டியாக கருதவில்லை. தனது இலக்கு ஆளுங்கட்சியான தி.மு.க.தான் என்று அவர் நினைப்பதே இதற்கு முக்கிய காரணம். எனவே அவர் சீமானின் எந்தவொரு விமர்சனத்திற்கும் பதில் கூறி நேரத்தை வீணடிக்க விரும்பவில்லை.
விஜய் தனது பயணத்தை “வார இறுதி அரசியல்” என்ற பாணியில் மேற்கொள்கிறார் என்ற விமர்சனம் பரவலாக உள்ளது. ஒரு சனிக்கிழமை அவர் பேசும் பேச்சு, அடுத்த ஆறு நாட்களுக்கு விவாதத்தை உருவாக்கும் வகையில் திட்டமிடப்பட்டுள்ளது. இதன் மூலம், ஊடகங்களில் தனது இருப்பை அவர் வாரம் முழுவதும் தொடர்ந்து உறுதி செய்கிறார்.
தி.மு.க. எதிர்ப்பை மட்டுமே வைத்து ஒரு கட்சி வளர்ந்துவிட முடியாது என்று அரசியல் விமர்சகர்கள் கூறுகின்றனர். ஆனால், அ.தி.மு.க.வும் தி.மு.க. எதிர்ப்பு அரசியலின் மூலம்தான் வளர்ந்தது என்பதை மறுக்க முடியாது. இருப்பினும், அ.தி.மு.க.வுக்கு எம்.ஜி.ஆர் என்ற வலுவான தலைமை இருந்தது. விஜய்க்கு அதுபோல உடனடி ஆதரவு கிடைக்கும் என எதிர்பார்க்கலாம். தி.மு.க. மீதான அதிருப்தி வாக்குகளை விஜய் பெறுவார். இந்த தேர்தல் முடிவுகள், விஜய் அ.தி.மு.க.வின் இடத்தை பிடிப்பாரா அல்லது ஆளுங்கட்சியாக மாறுவாரா? என்பதை பொறுத்திருந்துதான் பார்க்க வேண்டும்.
சீமான் தொடர்ந்து விஜய்யை விமர்சித்து வருகிறார். ஆனால், தி.மு.க.வும் பி.ஜே.பி.யும் விஜய்க்கும் சீமானுக்கும் பொதுவான எதிரிகள். இருவரும் ஒரே இலக்கை கொண்டவர்கள். அப்படியிருக்கையில், சீமான் விஜய்யை ஏன் எதிர்க்கிறார் என்ற கேள்வி எழுகிறது. மாறாக, தி.மு.க.வை போல விஜய்யும் சீமானின் விமர்சனங்களை கண்டுகொள்ளாமல் இருக்கிறார். இது ஒரு சரியான உத்தி. ஏனெனில், தேவையில்லாமல் எதிர்வினை ஆற்றி எதிரியை வளர்த்துவிட கூடாது என்று அவர் நினைக்கிறார்.
விஜய்யின் அரசியல் எதிர்காலம், அவரது செயல்பாடுகள், கூட்டணி முடிவுகள் மற்றும் மக்கள் அளிக்கும் ஆதரவை பொறுத்தது. அவர் தற்போது ஒரு புதிய அரசியல் முகமாக பார்க்கப்பட்டாலும், தொடர்ச்சியான களப்பணி மற்றும் மக்கள் ஆதரவை தக்கவைத்து கொள்வதில்தான் அவரது உண்மையான வெற்றி அடங்கியுள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
