நடிகர் விஜய் அவர்கள் தமிழக வெற்றி கழகம் என்ற கட்சியை தொடங்கியதிலிருந்து, வரும் 2026 சட்டமன்றத் தேர்தலை ஒட்டிய அரசியல் களம் பரபரப்படைந்துள்ளது. குறிப்பாக, அதிமுகவுடன் கூட்டணி அமைப்பாரா என்ற கேள்விதான் மைய விவாதமாக உள்ளது. தவெக தரப்பில் இருந்து வரும் ஆரம்பகட்ட மறுப்புகள் மற்றும் அரசியல் ஆலோசகர்கள் விஜய்க்கு அளித்துள்ளதாக கருதப்படும் ஆலோசனைகளின் அடிப்படையை வைத்து பார்க்கும்போது, அதிமுகவுடன் கூட்டணி வேண்டாம் என்பதே அந்தக் கட்சியின் வியூகமாக இருக்க அதிக வாய்ப்புள்ளது.
சமீப காலமாக, அதிமுக பொதுச் செயலாளர் எடப்பாடி பழனிசாமி பொதுக்கூட்டங்களில் தவெக கொடிகள் காணப்பட்டதை குறிப்பிட்டு, “இதுவே கூட்டணிக்கு ஒரு பிள்ளையார் சுழி” என்று பேசியது, அதிமுக தரப்பு தவெக-வுடன் கூட்டணி அமைக்க எவ்வளவு ஆர்வமாக உள்ளது என்பதை காட்டுகிறது. திமுக கூட்டணியை சமாளிக்க, திமுக எதிர்ப்பு வாக்குகளை பிரிய விடாமல் இருக்க, விஜய்யின் புதிய கட்சியின் செல்வாக்கு அதிமுகவுக்கு அத்தியாவசியமாகிறது.
ஆனால், தவெக தரப்பு உடனடியாக இந்த கூட்டணி பேச்சுகளை மறுத்துள்ளனர். திமுக-வை அரசியல் எதிரியாகவும், பாஜக-வை கொள்கை எதிரியாகவும் அறிவித்துள்ள தவெக, அதிமுக கூட்டணி பேச்சுக்களை நிராகரிப்பதன் பின்னணியில், நீண்ட கால அரசியல் வியூகம் இருப்பதாக அரசியல் நோக்கர்கள் கருதுகின்றனர்.
விஜய் மற்றும் அவரது கட்சி தலைமைக்கு அளிக்கப்பட்டுள்ளதாக கருதப்படும் பிரதான ஆலோசனை, 2026-ல் தனிக்கட்சி என்ற அடையாளத்தை கெடுத்துக்கொள்ளக் கூடாது என்பதுதான். அ
தவெக ஒரு புதிய அரசியல் மாற்றத்திற்கான ‘சக்தி’ என்ற பிம்பத்தை உருவாக்க முயல்கிறது. இந்த நிலையில், ஏற்கனவே இருக்கும் ஒரு திராவிட கட்சியுடன் கூட்டணி அமைத்து, ஈபிஎஸ்-ஐ மீண்டும் முதல்வராக்கினால், அது தவெக-வின் தனித்தன்மையையும், மாற்று அரசியல் என்ற பிம்பத்தையும் உடைக்கும்.
மக்கள் மத்தியில் தவெக, அதிமுகவின் அல்லது பாஜகவின் ‘பி’ டீம் என்றே பார்க்கப்படும். இது, அரசியல் மாற்றத்தை விரும்பும் இளைஞர்கள் மற்றும் நடுநிலை வாக்காளர்களை தவெக-வை விட்டு விலக செய்யும். அதிமுகவுடன் கூட்டணி வைத்து வென்றாலும், அந்த வெற்றி கூட்டணி தலைமைக்கே சொந்தமாகும். விஜயால் தனிப்பட்ட முறையில் அரசியல் ஆதாயம் அடைய முடியாது.
தவெக-வின் நோக்கம் 2026-ல் ஆட்சியை பிடிப்பதைவிட, திமுக-வுக்கும் அதிமுக-வுக்கும் மாற்றாக, மாநிலத்தில் மூன்றாம் சக்தி என்ற நிலையை உறுதிசெய்வதே முதல் இலக்காக இருக்க வேண்டும். தனித்து போட்டியிட்டு, கணிசமான எண்ணிக்கையிலான இடங்களை கைப்பற்றுவதுடன், அதிமுகவை முந்துவது அதாவது அதிக வாக்கு சதவீதத்தை பெற்று இரண்டாம் இடத்தை பிடித்தால் கூட அது மிகப்பெரிய வெற்றியாக கருதப்படும். ஒ
ஆட்சியைப் பிடிப்பது என்ற அதீத எதிர்பார்ப்புடன் களமிறங்காமல், வாக்கு சதவீதத்தை உயர்த்துவது மற்றும் சில தொகுதிகளில் வெற்றி பெறுவதே முதல் கட்ட வெற்றி. இது, அடுத்த 2031 தேர்தலுக்கான வலுவான அடித்தளத்தை அமைக்கும்.
எம்ஜிஆர் மற்றும் ஜெயலலிதா போன்ற ஆளுமைகளின் மறைவுக்கு பிறகு, தமிழகத்தில் ஒரு ஆளுமை வெற்றிடம் உருவாகியுள்ளது. இந்த வெற்றிடத்தை உடனடியாக நிரப்புவதற்கு பதிலாக, மக்கள் மத்தியில் விஜய்யை ஒரு மாற்று அரசியல் சக்தியாக நிலைநிறுத்த கால அவகாசம் தேவை.
2026-ல் தனித்துப் போட்டியிட்டு, தவெக ஒரு வலிமையான சக்தியாக உருவானால், அது அடுத்த 5 ஆண்டுகளில் அதிமுக-வை மேலும் பலவீனப்படுத்த வாய்ப்புள்ளது. அதிமுக, பாஜக போன்ற கட்சிகளுடன் மீண்டும் கூட்டணி அமைத்து, அல்லது உட்கட்சி சண்டையில் மேலும் தேய்மானம் அடையும்போது, 2031-ல் தவெக-வுக்கு நேரடியாக ஆட்சியை கைப்பற்றும் வாய்ப்பு உருவாகும்.
விஜய் தனது கட்சியின் ஆரம்ப கூட்டங்களிலேயே, 1967 மற்றும் 1977 ஆகிய தேர்தல்களின் முக்கியத்துவத்தை பேசியுள்ளார். இது, தமிழக அரசியலில் ஒரு புதிய கட்சி நீண்ட காலத்திற்கு பிறகு பெரிய கட்சிகளை வீழ்த்தி ஆட்சியைப் பிடிக்கும் வரலாற்று வாய்ப்பை அவர் 2031-ஐ நோக்கியே இலக்கு வைத்திருப்பதை உணர்த்துகிறது.
தவெக தரப்பு வெளிப்படையாக பேசியுள்ள விஷயங்களை கூர்ந்து கவனித்தால், அவர்கள் இந்த நீண்ட கால வியூகத்திலேயே உறுதியாக இருப்பது தெரிகிறது. தவெக ரகசிய உடன்பாடுகள் செய்யும் அல்லது கூட்டணியால் மக்களை ஏமாற்றும் கட்சி அல்ல,” என்று மக்களை நம்ப வைக்க வேண்டும் என்று விஜய் திட்டமிடுகிறார்.
அதனால் தான் அவர் 2026 தேர்தல் தவெக-வுக்கும் திமுக-வுக்கும் இடையிலான நேரடி போட்டி என்று அறிவித்துள்ளார். இது, அதிமுக-வை முக்கிய எதிர்க்கட்சியாகவே அவர் கருதவில்லை என்பதை காட்டுகிறது. தனது தேர்தல் சின்னத்தின் மூலம் மக்கள் தன்னை அனைத்து தொகுதிகளிலும் வேட்பாளராக கருத வேண்டும் என்று கூறியது, அவர் தனது ஆளுமை செல்வாக்கை மட்டுமே நம்பி அரசியலில் இறங்கியுள்ளார் என்பதையே வெளிப்படுத்துகிறது.
மொத்தத்தில், அதிமுக உடன் கூட்டணி அமைத்து ஈபிஎஸ்-ஐ முதல்வராக்குவது தற்காலிக வெற்றியை அளிக்குமே தவிர, தவெக-வின் நீண்ட கால அரசியல் அபிலாஷைக்கு பின்னடைவாகவே அமையும் என்ற ஆலோசனை விஜய்க்கு அளிக்கப்பட்டுள்ளதாக கருதப்படுகிறது. 2026-ல் தனித்துப் போட்டியிட்டு, வாக்கு சதவீதத்தை உயர்த்தி, இரண்டாம் இடத்தையோ அல்லது கணிசமான இடங்களையோ கைப்பற்றுவதே, 2031-ல் ஆட்சியைப் பிடிக்கும் இலக்குக்கான வலுவான அஸ்திவாரமாக இருக்கும் என தவெக தலைமை நம்புகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
