தமிழக அரசியல் வரலாற்றில் பெரும் எதிர்பார்ப்புகளுக்கு மத்தியில் புதியதொரு தலைமை ஆட்சி பொறுப்பை ஏற்கும்போதெல்லாம், பழைய ஆளும்கட்சிகள் தங்களின் தோல்வியை ஒப்புக்கொள்ள மனமில்லாமல் விசித்திரமான காரணங்களை தேடி கண்டுபிடிப்பது வழக்கமாகிவிட்டது. தற்போதைய தவெக தலைவர் விஜய் அவர்கள் தேர்தல் களத்தில் மாபெரும் வெற்றி பெற்று முதலமைச்சராக பொறுப்பேற்றிருப்பதை சகித்துக்கொள்ள முடியாமல், எதிர்க்கட்சி தலைவராக கூட ஆக முடியாமல் போன மு.க.ஸ்டாலின் அவர்கள் “விஜய் இன்ஸ்டாகிராம் மூலமும், குழந்தைகள் மூலமும் தான் ஆட்சிக்கு வந்தார்” என்று குற்றம் சாட்டியிருப்பது கேலிக்குரியதாக மாறியுள்ளது.
சமூக ஊடகங்களான இன்ஸ்டாகிராம் போன்ற தளங்களை உபயோகிப்பவர்கள் இன்றைய காலகட்டத்தில் நன்கு படித்த, உலக நடப்புகளைத் துல்லியமாக அறிந்த, விழிப்புணர்வு மிக்க இளைய தலைமுறையினர் என்பது இன்னும் ஸ்டாலினுக்கு தெரியவில்லை என்பது அவரது அறியாமையையே காட்டுகிறது. தங்களின் தோல்விக்கு காரணம் மக்களின் விழிப்புணர்வு என்பதை உணராமல், சமூக ஊடகங்கள் மீது பழியை போட்டு திமுகவினர் மீண்டும் தங்களது தலைவரையே மக்கள் மத்தியில் முட்டாளாக்கி கொண்டிருக்கிறார்கள்.
கடந்த ஐந்து ஆண்டு காலத் திமுக ஆட்சியில் தமிழகத்தில் தேனும் பாலும் ஓடியது போலவும், சட்டம் ஒழுங்கு சீராக இருந்தது போலவும் ஆளும்கட்சியினர் பேசி வருவது தற்போதைய கள யதார்த்தத்திற்கு முற்றிலும் முரணான ஒன்றாகும். ஐந்து வருடங்களாக மக்கள் நலனுக்காகவும், மாநிலத்தின் வளர்ச்சிக்காகவும் எவ்வித உருப்படியான திட்டங்களையும் செய்யாமல், தேர்தல் வரும்போது மட்டும் குடும்ப தலைவிகளுக்கு மாதாமாதம் உரிமைத் தொகை கொடுத்தோம் என்றும், வாக்காளர்களுக்கு 5000 ரூபாய் கொடுத்தால் மக்கள் அப்படியே வாக்கு செலுத்தி விடுவார்கள் என்றும் கேவலமாக நினைத்ததன் விளைவைத்தான் இன்று திமுக அனுபவித்து வருகிறது. மக்களை பணத்தால் விலைக்கு வாங்கிவிடலாம் என்று நினைத்த திமுகவின் இந்த மலிவான அரசியல் உத்தியை நன்கு உணர்ந்த காரணத்தினாலேயே, விழிப்புணர்வு மிக்கத் தமிழக மக்கள் அவர்களைத் தூக்கி எறிந்துவிட்டுப் புதியதொரு மாற்றத்திற்கு வழிவகுத்துள்ளனர்.
முந்தைய திமுக ஆட்சியில் தமிழகம் சந்தித்த கொடூரங்களையும், நிர்வாகச் சீர்கேடுகளையும் பொதுமக்கள் தற்போது சமூக வலைத்தளங்களில் அடுக்கடுக்காக வரிசைப்படுத்தி வருகின்றனர். ஊழல், லஞ்சம், அப்பட்டமான கமிஷன் கலாச்சாரம் ஒருபுறமிருக்க, தமிழகத்தின் சட்டம் ஒழுங்கு முற்றிலும் சீர்குலைந்து கொலை, கொள்ளை, மற்றும் வழிப்பறிகள் தினசரி நிகழ்வுகளாக மாறின. அரசு ஊழியர்களின் கோரிக்கைகள் முற்றிலுமாகப் புறக்கணிக்கப்பட்டதால், தங்களின் வாழ்வாதாரத்திற்காக ஆசிரியர்கள், செவிலியர்கள் மற்றும் துப்புரவுத் தொழிலாளர்கள் எனப் பல்வேறு தரப்பினர் தொடர் போராட்டங்களை நடத்த வேண்டிய அவல நிலை ஏற்பட்டது. இத்தகைய போராட்டங்களை அடக்குமுறையைக் கொண்டு ஒடுக்க நினைத்ததே தவிர, அவர்களுடன் சுமுகமான பேச்சுவார்த்தை நடத்தித் தீர்வுகாண அன்றைய அரசு முற்படவில்லை என்பது பொதுமக்களின் பிரதான குற்றச்சாட்டாக உள்ளது.
பெண்களின் பாதுகாப்பு என்பது கடந்த ஐந்து ஆண்டுகளில் வெறும் காகித அளவிலேயே இருந்தது என்பதற்குப் பல சிறுமிகள் மற்றும் பெண்களுக்கு எதிராக நடந்த பாலியல் வன்கொடுமைகளும், அண்ணா பல்கலைக்கழக விவகாரமும் மிகச்சிறந்த சான்றுகளாகும். திமுகவினர் மற்றும் ஆளும்கட்சி நிர்வாகிகளின் அராஜகம் எட்ட முடியாத உயரத்தைத் தொட்டதுடன், காவல் துறையினர் சுதந்திரமாகச் செயல்பட முடியாமல் ஆளும்கட்சியினரின் ஏவலாட்களாக மாற்றப்பட்டனர். தமிழகத்தையே உலுக்கிய வேங்கைவயல் தீண்டாமைச் சம்பவ இடத்திற்கு அன்றைய முதலமைச்சர் மு.க.ஸ்டாலின் நேரில் செல்லவே இல்லை என்பதும், மாநிலத்தில் ஆணவக் கொலைகள் அதிகரித்ததும் சமூக நீதி பேசும் இவர்களின் போலி முகத்திரையைக் கிழித்துக் காட்டியது. மக்களின் வரிப்பணத்தைப் வீணடித்துச் சென்னையில் நடத்தப்பட்ட சர்வதேச கார் பந்தயமும், நிர்வாகக் காரணங்களுக்காக அன்றி குடும்ப வாரிசை முன்னிறுத்துவதற்காக உருவாக்கப்பட்ட துணை முதலமைச்சர் பதவியும் மக்களின் கடும் அதிருப்திக்குக் காரணமாயின.
மதுபானக் கடைகளில் விற்கப்படும் ஒவ்வொரு பாட்டிலுக்கும் கூடுதலாகப் பத்து ரூபாய் வசூலிக்கும் முறைகேடு முதல், பெரும் டெண்டர் ஊழல்கள் வரை திமுக ஆட்சியில் முறைகேடுகள் தங்கு தடையின்றி அரங்கேறின. தங்களின் சுயநல அரசியலுக்காகச் சாதி மாநாடுகளைத் தூண்டிவிட்டதும், மக்கள் பிரச்சினைகள் குறித்து அரசிடம் கேள்வி கேட்ட சவுக்கு சங்கர் போன்றவர்களைப் பழிவாங்கும் நோக்கில் சிறையில் அடைத்ததும், பத்திரிகையாளர்களின் பாதுகாப்பைக் கேள்விக்குறியாக்கியதும் அன்றைய நிர்வாகத்தின் திமிர்போக்கைக் காட்டியது. குறிப்பாக அன்றைய அமைச்சர்களாக இருந்த சேகர்பாபு போன்றவர்களின் அதிகாரத் திமிரும், பொதுமக்கள் மற்றும் அதிகாரிகளை இழிவாக நடத்திய போக்கும் மக்கள் மத்தியில் பெரும் கொந்தளிப்பை ஏற்படுத்தியது. இத்தனையையும் மறைப்பதற்காகத் தங்களுக்குச் சாதகமான ஒட்டுமொத்த செய்தி ஊடகங்களையும் விலைக்கு வாங்கி, நாள் முழுவதும் பொய் செய்திகளையும், போலிப் பிரச்சாரங்களையும் பரப்பி மக்களை ஏமாற்ற திமுக தலைமை முயன்றது.
உண்மை என்னவென்றே தெரியாமல், மக்கள் மத்தியில் நிலவிய அதிருப்தியை உணராமல் வெறும் விளம்பர வெளிச்சத்திலேயே ஐந்து ஆண்டுகள் முதலமைச்சராக மு.க.ஸ்டாலின் இருந்துவிட்டார் என்பதைத் தற்போதைய தேர்தல் முடிவுகள் அப்பட்டமாக நிரூபித்துள்ளன. இனியாவது தமிழகத்தில் நடந்துள்ள கொடூரங்களையும், தங்களின் தோல்விக்கான உண்மையான காரணங்களையும் ஸ்டாலினுக்குத் தெரியப்படுத்துவது அவருடைய கட்சி நிர்வாகிகளின் கடமையாகும். எஜமானர்களின் கட்டளைக்காக ஊடகங்களில் பொய்ப் பிரச்சாரம் செய்யும் திமுகவினரின் தந்திரங்களை முறியடித்து, மக்கள் தங்களின் உண்மையான தேவைகளை அறிந்து புதிய முதலமைச்சர் விஜய் அவர்களின் தற்போதைய அதிரடி மற்றும் தூய்மையான நிர்வாகத்திற்கு ஆதரவளித்து வருகின்றனர். மக்களின் மனங்களை வென்று சிம்மாசனத்தில் அமர்ந்துள்ள புதிய அரசைத் தேவையின்றி இன்ஸ்டாகிராம் பூச்சாண்டி காட்டி விமர்சிப்பவர்களுக்கு, வரும் காலங்களில் மக்கள் தங்களது செயல்பாடுகள் மூலம் மேலும் தகுந்த பாடத்தைப் புகட்டுவார்கள் என்பதில் எவ்வித ஐயமும் இல்லை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
